2017-12-12 14:14:08 clouds 27o High | Kigali Rwanda

Dukurikire:
 
 

Muhanga:Abahawe inka muri Girinka basabwe kwisuzuma bakareba niba bazifashe neza

Yanditswe na IMVAHO NSHYA

Kuya 2017-05-11 08:57:24

 
Share on:
 
Yasuwe:24
 
Yavuzweho:200
 
10
 
10

Mu Karere ka Muhanga kimwe n’ahandi hose mu gihugu hatangijwe icyumweru cyahariwe gahunda ya Girinka, aho mu Murenge wa Kibangu hatanzwe inka 40, abazihawe basabwa kuzitaho, bibutswa ko uko itungo ryitaweho ariko ritanga umusaruro.

Muri uyu muhango wo gutangiza icyumweru cyahariwe gahunda ya Girinka umuyobozi mu kigo cy’igihugu gishinzwe ubuhinzi n’ubworozi, RAB, Dusabirema Sylidion, yabagarutse ku kamaro kanini ubworozi bufitiye Abanyarwanda, avuga ko hari bamwe usanga bahabwa inka ariko ntibaziteho ahubwo bakavuga ko baragiriye abandi, cyane iyo babwiwe ko nizororoka bazoroza bagenzi babo.

Kuri we akavuga ko abavuga ayo magambo birengagiza nkana abo Girinka imaze kugirira akamaro kuva yatangira, akaba asaba abaturage kwita ku nka zabo kuko ari bwo zitanga umusaruro ushimishije.

Yagize ati “Izi Nka muhabwa, muzihabwa kugira ngo muzifate neza kandi zibasigire umusaruro, bityo imiryango yanyu nayo yiteze imbere, ariko iyo umuntu ahawe inka ntayifate neza aba yihima kuko ni we baba barahisemo ugomba korozwa mbere y’uko yoroza abandi, iki cyumweru kitubere icyo kwisuzuma no kureba ko inka duhawe tuzifashe neza».

JPEG - 123.4 kb
Inka zisigaye zivurwa neza

Murekezi Gaspard wari uhagarariye ubuyobozi bw’Akarere ka Muhanga muri uyu muhango, avuga ko kuba bahawe izi nka byerekana agaciro bahawe n’Umukuru w’Igihugu Paul Kagame.

Yabasabye guharanira iteka ko izi nka zagera ku mubare munini w’abandi baturage bagifite ubushobozi buke. Ati «Izi nka muhawe ni iz’agaciro gakomeye, mukwiye kuzitaho kugira ngo zizagire icyo zibasigira kuko abazibaha bashaka kubakura mu buzima musanzwe murimo mugatera intambwe mugana imbere».

Uwizeyimana Marthe utuye mu Kagari ka Gitega, Umudugudu wa Kaziba, avuga ko kuva gahunda ya Girinka yatangira yahawe inka imwe arayorora, akavuga ko kuri ubu afite zirindwi zikomoka kuri iyi imwe yahawe kandi ko amaze kwiteza imbere mu birebana n’ifumbire ndetse n’amata zikamwa.

Yagize ati “Nta nzu nagiraga ariko kuva batangira kutworoza byatumye nubaka inzu, nkaba mfite ubuzima bwiza njye n’umuryango wanjye, kandi urugo rufite imibereho myiza ntirugira amakimbirane.»

Iki gikorwa cyo gutanga inka Akarere ka Muhanga kazagifatanya n’itorero ry’Abangilikani mu Rwanda, Diyosezi ya Shyogwe, ndetse bagafatanya no mu guhugura abahawe inka mu rwego rwo kugira ngo barusheho kuzifata neza.

Insanganyamatsiko y’iki cyumweru iragira ti “Dushyigikire gahunda ya Girinka, tworozanya, dushyigikira ibyegezweho.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE