2017-12-12 14:14:08 clouds 27o High | Kigali Rwanda

Dukurikire:
 
 

Mulisa adatwaye igikombe si we wa mbere waba ukibuze – Camarade

Yanditswe na IMVAHO NSHYA

Kuya 2017-05-11 06:46:55

 
Share on:
 
Yasuwe:527
 
Yavuzweho:200
 
10
 
10

Umunyamabanga mukuru wa APR FC, Kalisa Adolphe ’’Camarade’’ aravuga ko nta gitutu bashyize ku mutoza Jimmy Mulisa cyo gutwara igikombe cy’Amahoro cyangwa se n’icya shampiyona y’uyu mwaka.

Ibi yabitangarije Imvaho Nshya mu kiganiro kihariye kibanze ku ntego za APR FC zo guhatanira igikombe kimwe mu bikinirwa mu Rwanda no ku hazaza h’umutoza Jimmy Mulisa urimo gusoza amasezerano ye.

Camarade yasobanuye ko bashyize imbaraga zingana mu marushanwa yombi, ashimangira ko nta ntego zihariye bahaye Mulisa zo kuba yatwara igikombe cy’Amahoro kuko bo babona n’icya shampiyona bashobora kugitwara.

Ati ’’Twebwe dushyira imbaraga hose kugeza ku munota wa nyuma, n’ahandi ntabwo twabinaniwe kubera ko hose tutashyizemo imbaraga; imbaraga twazishyizemo hose. N’ubundi zari zihari, icyabayeho ni udukosa tumwe na tumwe, ibyo sinabyinjiramo kuko ni uruhande rw’abatoza. Naho twe tubaha ibyo tugomba kubaha byose nk’uko byari bisanzwe kugira ngo batware ibikombe”.

JPEG - 79.8 kb
Umunyabanga wa APR FC, Kalisa Adolphe Camarade aremeza ko nta gitutu bashyize ku mutoza Mulisa Jimmy

Abajijwe niba Mulisa atazirukanwa nabura igikombe muri uyu mwaka, Umunyamabanga mukuru wa APR FC yatsindagiye ko atari we mutoza wa mbere waba ubuze igikombe.

Camarade yagize ati “Ni we mutoza wa mbere uzaba unaniwe gutwara igikombe? Oya iyi si impamvu yo gusezerera umutoza ngo n’uko atatwaye igikombe. Umutoza atwara igikombe cyangwa bikanga, ikipe itwara igikombe cyangwa bikanga’’.

Camarade yavuze ko bagifitanye amasezerano n’abatoza, bityo batakwirirwa bavuga ku hazaza habo kandi bakiri mu marushanwa.

Mulisa Jimmy, kuri ubu urushwa amanota 10 na Rayon Sports ya mbere ku rutonde, asobanura ko yabanje guhura n’ikibazo cy’imyumvire y’abakinnyi.

Ati ’’Abakinnyi bacu baracyafite ya myumvire yo gukina umukino umwe cyangwa ibiri indi bakayikina uko biboneye, ibyo nari maze iminsi mbaganiriza ukuntu nanjye byigeze kumbaho. Si ibintu ukora umunsi umwe bisaba igihe, ikindi twakira impinduka mu buryo butandukanye. Ubu abakinnyi batangiye kubyumva kandi birimo kubafasha’’.

Yanongeyeho ko yagize ikibazo mu busatirizi bwe.

Ati “Ikindi navuga imikino myinshi twabonaga amahirwe menshi ariko bikatunanira kuyakoresha tukabona amahirwe atanu y’ibitego tukananirwa gutsinda igitego .Ibyo ni byo byatumye tunganya cyane tunatakaza amanota. Ubu twatangiye kugaruka’’.

APRFC kuri ubu icungiye ku gikombe cy’Amahoro aho muri 1/8 cy’irangiza isabwa gusezerera Sunrise FC. Umwaka ushize wa 2016 yari yageze ku mukino wa nyuma itsindwa na Rayon Sports igitego 1-0.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE