2017-11-23 07:40:03 clouds 27o High | Kigali Rwanda

Dukurikire:
 
 

Imikino y’igikombe cy’Amahoro igeze muri 1/8

Yanditswe na IMVAHO NSHYA

Kuya 2017-05-10 11:34:19

 
Share on:
 
Yasuwe:240
 
Yavuzweho:200
 
10
 
10

Uyu munsi: Musanze FC-Rayon (Musanze-15h30); Sunrise-APR FC (Nyagatare-15h30); Mukura-AS Kigali (Huye-15h30); Marines FC-Kiyovu (Rubavu-15h30)
AS Muhanga-Bugesera (Muhanga-15h30); La Jeunesse-Amagaju (Mumena-15h30); Police FC- Gicumbi (Kicukiro-15h30)

Ejo, tariki 11-05-2017: Etincelles FC-Espoir (Rubavu-15h30)

Uyu munsi tariki 10 Gicurasi 2017 ni bwo haza kuba imikino ibanza ya 1/8 mu gikombe cy’Amahoro. Iyi mikino hafi ya yose irabera hanze y’Umujyi wa Kigali aho amakipe menshi akomeye agomba kubanza hanze nyuma akazakinira imikino yo kwishyura muri Kigali.

Musanze FC irakira ikipe ya Rayon Sports ubu iyoboye urutonde rwa shampiyona ndetse iyi kipe ikaba ari nayo ifite igikombe cy’Amahoro giheruka cya 2016. Uyu mukino ubanza urabera kuri Sitade ya Musanze. Rayon Sports ikaba yaraye i Musanze mu rwego rwo kwitegura uyu mukino kugira ngo yitware neza kuko yifuza kwisubiza iki gikombe. Umukino uheruka guhuza aya makipe, tariki 29 Mata 2017 , Rayon Sports yatsindiye Musanze FC iwayo igitego 1-0.

JPEG - 134.4 kb
Umukino uheruka kubera i Nyagatare, APR FC yatsinze Sunrise FC igitego 1-0 cya Hakizimana Muhadjiri (Foto Bugingo F)

Ikipe ya APR FC nayo yageze ku mukino wa nyuma umwaka ushize akaba ari nayo ifite iki gikombe inshuro nyinshi iraba iri i Nyagatare aho igomba gukina na Sunrise FC.

Casa utoza Sunrise FC ni umwe mu batoza bakoze amateka muri iki gikombe dore ko amaze guhesha amakipe abiri ariyo AS Kigali na Police FC iki gikombe cy’Amahoro kuva mu 2013, birashoboka ko yakongera gukora amateka akaba yakuramo ikipe APR FC ndetse akaba yagera kure.

Gusa ikipe ya APR FC nyuma yo kubura igikombe cya shampiyona gisa n’icyamaze gutwarwa na Rayon Sports, umutoza Mulisa Jimmy ahanze amaso igikombe cy’Amahoro kuko umwaka urangiye nta gikombe na kimwe atwaye bishobora kutazamubera byiza ndetse bikaba byatuma atongererwa amasezerano muri iyi kipe ya APR FC imenyereye gutwara ibikombe.

Umukino uheruka kubera kuri iki kibuga, APR FC yahatsindiye Sunrise FC igitego 1-0 cyatsinzwe na Hakizimana Muhadjiri.

Indi mikino iteganyijwe, Mukura irakira AS Kigali, Marines FC ikine na Kiyovu, AS Muhanga ikine na Bugesera FC, La Jeunesse yakire Amagaju FC naho Police FC yakire Gicumbi FC. Umukino wundi uzaba ejo tariki 11 Gicurasi 2017 aho Etincelles FC izakira Espoir FC.

Imikino yo kwishyura izaba tariki 13-15 Gicurasi 2017, amakipe yitwaye neza akomeze muri ¼ cy’irangiza aho biteganyijwe ko izaba muri Kamena 2017.

Igikombe cy’Amahoro giheruka mu 2016 cyegukanwe na Rayon Sports itsinze APR FC ku mukino wa nyuma igitego 1-0. Ikipe itwaye iki gikombe ikaba ihita ibona itike yo guhagararira u Rwanda mu mikino y’Afurika y’amakipe yitwaye neza iwayo “CAF Confederation cup”.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE