2017-09-24 09:25:05 clouds 27o High | Kigali Rwanda

Dukurikire:
 
 

Abiga muri STES-Rwanda bagiye kumurikira Abanyarwanda imodoka bakoze

Yanditswe na IMVAHO NSHYA

Kuya 2017-05-08 08:32:24

 
Share on:
 
Yasuwe:53
 
Yavuzweho:200
 
10
 
10

Abanyeshuri 10 biga muri Kaminuza ya STES-Rwanda (Sinhgad Technical Education Society-Rwanda) iherereye mu Karere ka Kicukiro mu Mujyi wa Kigali, bagiye kumurikira Abanyarwanda imodoka bakoze ikoresha imirasire y’izuba.

Iki gikorwa kizabera i Kigali, ahazaba hateraniye inama mpuzamahanga ku ikoranabuhanga (Transform Africa Summit 2017) kuva ku itariki ya 10 kugeza ku ya 12 Gicurasi 2017.

Imodoka aba banyeshuri bakaba baherutse kwegukana igikombe mu marushanwa yabereye mu Buhinde yo gukora imodoka ikoresha imirasire y’izuba, yateguwe na kaminuza yo mu Buhinde SKN Sinhgad College Engineering, yahuje Kaminuza 15 zo mu Buhinde harimo n’iyi yo mu Rwanda.
 Kabera Kevin umwe mu banyeshuri bakoze imodoka ikoresha imirasire y'izuba ( Foto Gisubizo G.)
Umuyobozi wa STES-Rwanda ari na we wayishinze Nzitonda Kiyengo, avuga ko bariya banyeshuri bageze mu Rwanda bahise bakora indi modoka kugira ngo bayimurikire Abanyarwanda muri rusange, banereke abaterankunga Minisiteri y’Urubyiruko, Ikoranabuhanga n’Isakazabumenyi, FABLAB Rwanda n’Ikigo gishinzwe kubaka ubushobozi bw’abakozi, ko inkunga batanze itapfuye ubusa.

Yakomeje avuga ko iyi modoka nishyirwa ku isoko izafasha abaturage cyane kuko yaborohereza mu mirimo yabo ya buri munsi nko mu gutwara ibicuruzwa, gutwara umusaruro ukomoka ku buhinzi n’ubworozi bawugeza ku isoko,… kandi ntikenera lisansi dore ko ubu mu Rwanda igihenze. Ikindi ni imodoka itangiza ibidukikije kuko nta byotsi isohora.

Nzitonda arahamagarira Abanyarwanda guha agaciro ibikorerwa mu Gihugu cyabo. Yagize ati “ kudaha agaciro ibikorerwa mu Rwanda ni ukuguma mu bukoloni bwo gutungwa n’iby’abanyamahanga, kandi iterambere twifuza ntitwarigeraho.”

Kabera Kevin umwe muri bariya banyeshuri avuga ko iyi modoka bakoze ifite ubushobozi bwo kugenda ibilometero 40 ku isaha, ishobora no kwikorera ibilo 500, ifite n’imyanya itatu harimo n’uw’umushoferi. Barateganya no gukora izindi modoka nini z’ubwoko butandukanye.

Iyi kaminuza itegereje guhabwa ibyangombwa birimo icyemezo cy’ubuziranenge gitangwa n’Ikigo gitsura ubuziranenge (RSB) kugira ngo itangira gukoreshwa mu muhanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE