2017-10-18 07:01:40 clouds 27o High | Kigali Rwanda

Dukurikire:
 
 

Abayobozi ba Rayon Sports bariyunze, banashyigikira amasezerano ya SKOL

Yanditswe na IMVAHO NSHYA

Kuya 2017-05-08 07:31:46

 
Share on:
 
Yasuwe:951
 
Yavuzweho:200
 
10
 
10

Nyuma y’impaka no kutumvikana bimaze igihe mu banyamuryango bakuru b’umuryango wa Rayon Sports, habayeho gusasa inzobe hagati y’ubuyobozi bw’umuryango buyobowe na Kimenyi Vedaste, urwego ngenzuzi ’’Board’’ ruyobowe na Ngarambe Charles na komite nyobozi y’ikipe y’umupira w’amaguru y’umuryango iyoborwa na Gacinya Chance Denis.

Uku kutumvikana kwasembuwe n’imbanziriza masezerano ya rwihishwa yabaye hagati y’umuryango wa Rayon Sports n’uruganda rwa ’’SKOL’’ bikorwa komite nyobozi ya Rayon Sports FC itabizi.

Amakuru yatanzwe na bamwe mu bari mu buyobozi bwa Rayon Sports FC avuga ko bo batari bishimiye amafaranga make uru ruganda rwatangaga. Biniyongeraho ko SKOL yavugaga ko itifuza gukorana na komite ya Rayon Sports FC iyobowe na Gacinya.

JPEG - 200.6 kb
Abayobozi ba Rayon Sports

Nyuma yo kugirana inama yo gucoca ibi bibazo n’ibindi bibishamikiyeho, ku wa Gatandatu taliki 06 Gicurasi 2017, impande eshatu zashyize umukono ku itangazo rigenewe abanyamakuru rivuga ko ’’Bashimye amasezerano y’igihe gito umuryango wa Rayon Sports wagiranye n’umufatanyabikorwa SKOL, barayashyigikira, kandi bemeza ko inzego zose zizafatanya mu kuyashyira mu bikorwa nta ruhande ruhejwe’’.

Perezida wa Rayon Sports FC, Gacinya Denis, avuga ko hari ibyari byumvikanye nabi, gusa mu mvugo ica ku ruhande yemeye ko SKOL yari yasabye ko itakorana na komite ya Rayon Sports FC.

Ati ’’Ababisobanura ni bo babivuga uko bitari. Skol ni uruganda na Rayon Sports ni urwego. Baramutse bavuze ngo ntitwifuza umuntu, natwe twababwira tuti ntitwifuza ko umuyobozi mukuru mufite ari we ubayobora. Ibyo ntibishoboka, si bo nteko rusange badutoye uretse ko atari nako bimeze’’.

Yakomeje agira ati ’’SKOL yasabaga ko Komite ya FC itajya mu gucunga ubuzima bw’ikipe kuko urwego ruzwi ari umuryango, gusa basobanurirwa ko Komite ya FC ari urwego umuryango washyizeho rwo gucunga ikipe’’.

Gacinya asaba abafana ba Rayon Sports gushyira hamwe bakanashyigikira ikipe yabo muri ibi bihe bakareka ubuyobozi bugakora akazi kabwo.

Iby’ingenzi bikubiye mu masezerano mashya ya Rayon Sports na SKOL

Uruganda rwa Skol rwemera kujya ruha Rayon Sports miliyoni 5 n’ibihumbi 200 buri kwezi avuye kuri miliyoni 3 n’ibihumbi 200, amasezerano ari mu mwaka wa nyuma. Aha haziyongeraho ikibuga cy’imyitozo yubakiye Rayon Sports mu Nzove.

Yanemeye gutanga umushahara w’ukwezi kwa Gicurasi na Kamena 2017. Inizeza Rayon Sports kuzayishingira niramuka ikeneye inguzanyo ya miliyoni 40 zo kugura abakinnyi bashya.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE