2017-10-16 07:05:01 clouds 27o High | Kigali Rwanda

Dukurikire:
 
 

Jeannette Kagame yerekanye igikwiye gukorwa ngo ubuhezanguni bucike ku Isi

Yanditswe na IMVAHO NSHYA

Kuya 2017-05-08 07:01:37

 
Share on:
 
Yasuwe:334
 
Yavuzweho:200
 
10
 
10

Umufasha wa Perezida wa Repubulika, Jeannette Kagame, yavuze ko ibihugu nibifasha abaturage bititaye ku bwoko, igitsina, idini … ubuhezanguni buzagenda bucika ku Isi.

Yabivugiye mu gihugu cya Azerbaijan mu nama Mpuzamahanga ya Kane ku biganiro mpuzamico, mu kiganiro yatanze ku kurwanya ubutagondwa binyuze mu guha uburezi abana b’abakobwa.

Iyi nama yitabiriwe n’abantu basaga 800 baturutse mu bihugu 120 bahagarariye za kaminuza, abikorera na sosiyete sivile.

Baganiriye ku bufatanye mu gukemura ibibazo byugarije Isi muri iki gihe birimo ubutagondwa, abimukira bakomeje kwiyongera, ubusumbane mu bukungu, n’imyumvire ya politiki icamo abantu ibice n’ibindi.

Madamu Jeannette Kagame yasobanuye ko kugeza uburezi bufite ireme kuri bose kandi budaheza hitabwa ku byo abagore n’abakobwa bakeneye cyane bizaca umuco w’ubutsimbanyi n’ubutagondwa.

Ati “Hakwiye kwitabwa cyane ku byo abakobwa n’abagore bakeneye, dore ko bamaze igihe kinini batisanzura. Kurwanya ubutagondwa binyuze mu burezi ni ngombwa kuko sosiyete ibaho neza ari ihuje imyemerere yuko buri wese akwiye kwitabwaho ku rwego rungana n’urwa mugenzi we.”

Yongeyeho ko mu gihe abana bahawe ubumenyi bubafasha gutekereza no gusesengura, ndetse n’abakuze bakababibafashamo ahazaza h’abatuye Isi hazaba hazira amacakubiri.

Madamu Kagame yatanze urugero ku buryo amateka y’u Rwanda yaranzwe n’ivangura n’amacakubiri , na politiki mbi yabibaga urwango mu baturage, igaca indagagaciro bigatuma habaho Jenoside yakorewe Abatutsi mu 1994.

Yongeyeho ko Jenoside yasize abapfakazi n’impfubyi babarirwa mu bihumbi ndetse hakaba n’abandi benshi bandujwe SIDA. Ariko nyuma yaho u Rwanda rwariyubatse binyuze mu bumwe n’ubwiyunge no guteza imbere abagore.

Umufasha wa Perezida yasobanuye ko kuri ubu abagore bagize 64% mu Nteko Ishinga Amategeko, 40% muri guverinoma, 38% mu bacamanza b’inkiko zisumbuye na 42% mu nkiko z’ibanze.

Iyo nama yateguwe na guverinoma ya Azerbaijan , UNESCO n’andi mashami ya Loni afite mu nshingano umuco , amadini, ubukerarugendo n’ubumenyi, yari igamije guteza imbere ibiganiro bishingiye ku muco byo kubiba umutekano w’abatuye Isi, kwimakaza amahoro n’iterambere rirambye.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE