2017-12-11 14:03:29 clouds 27o High | Kigali Rwanda

Dukurikire:
 
 

Ngoma:Umworozi yavumbuye Biyogaze ikomoka mu matotoro y’inkoko

Yanditswe na IMVAHO NSHYA

Kuya 2017-05-03 07:00:19

 
Share on:
 
Yasuwe:379
 
Yavuzweho:200
 
10
 
10

Mutabaruka utuye mu murenge wa Kibungo, akarere ka Ngoma, avuga ko yishimira ko akoresha ingufu za Biyogaze zituruka ku matotoro y’inkoko zigera kuri 350 yoroye.

Inkoko 350 Mutabaruka yoroye zirya ibiryo bibarirwa mu biro 50 ku munsi, zigatanga ifumbire (amatotoro) agera ku biro 30 buri munsi, ari nayo ibyazwamo ingufu za Biyogaze.

Mu kiganiro n’Imvaho Nshya, Mutabaruka yasobanuye ko kugira ngo agire igitekerezo cyo kubyaza amatotoro y’inkoko Biyogaze yabitewe nuko uburyo bwo gucunga uwo mwanda bwari bugoranye kubera umunuko, n’uburyo aho bawurundaga habaga hashyuhiranye, ku buryo nta buhinzi yashoboga kuhakorera.

Yagize ati “Mu gihe cya mbere imicungire y’iyi myanda yari bigoye. Twumvise umunuko n’uburyo byagendaga bibora, dutekereza ko hashobora kuba harimo izindi mbaraga za Gaze. Ubwo rero mu buryo bw’imicungire twabajije ababishinzwe ko byavamo Gaze, batubwira ko ibitabo bigaragaza ko mu matotoro y’inkoko havamo gaze, ndetse ishobora kuba ikubye kabiri n’igice iva mu mase y’inka.”

JPEG - 167.8 kb
Biyogaze akoresha kuri iri shyiga ni iva mu matotoro y’inkoko (Foto Manishimwe N.)

Nyuma yo kumenya ko mu matotoro y’inkoko havamo Biyogaze, Mutabaruka yahise asaba ko yakubakirwa ikigega cya Biyogaze nk’uko Leta ibishishikariza Abanyarwanda, maze muri Mutarama 2017 yubakirwa ikigega cya meterokibe 6, atangira gukoresha gaze iva mu matotoro y’inkoko nkuko akomeza asobanura uko ikora.

Agira ati “Ubu Gaze iraboneka neza. Dukora ibyo bita Feeding, tugasiba umunsi umwe, buri minsi 2 muri kino kigega dushyiramo ibiro 60 by’amatotoro. Iyo Gaze irimo dutekaho igihe cy’amasaha ane tudakuraho inkono, hanyuma tugategereza ko yiyongera.”

Gutekesha Biyogaze byashoboje umuryango wa Mutabaruka korohererwa n’amafaranga bakoreshaga bagura amakara yo gutekesha, kuko mu gihe cy’amezi agera kuri 5 amaze akoresha Biyogaze yo mu matotoro y’inkoko, ikibazo cyo gukoresha ibicanwa by’amakara n’inkwi cyakemutse ku kigero cya 80%.

Ikindi avuga nuko ubu ifumbire iva mu kigega cya Biyogaze iba ari nziza cyane, kandi igahita ikoreshwa kuko iba yarahoze, kandi itanuka.

Turyareba Sylvestre, umukozi w’akarere ka Ngoma ushinzwe gukwirakwiza ingufu za Biyogaze, avuga ko ari ubwa mbere yubatse Biyoyaze iva ku matotoro y’inkoko, kandi byagaragaye ko ifite ingufu nyinshi.

Ati “Na we yayubatse afite ubwoba kuko nanjye ni bwo bwa mbere nari nyibonye, ariko twarayubatse irarangira, dushyiramo amatotoro havamo Gaze, iruta kure cyane iy’amase y’inka, ku buryo igipimo ubundi kigera kuri 7, ariko iyo Biyogaze y’amatotoro yageze ku 9. Twabikoze ari ubwa mbere ariko twasanze harimo Biyogaze nyinshi cyane.”

Akomeza avuga ko kuri ubu ahamagarira abaroye inkoko gukoresha Biyogaze iva ku matotoro y’inkoko.

Agira ati “Ubundi ariya matotoro y’inkoko kugira ngo uzabone aho uyashyira ni ibintu bigorana, agira gaze nyinshi. Uyashyira ku myaka gatoya igahita ishya, n’aho uyarunze, ntushobora kuhahinga, bivuze ko abantu bafite inkoko bafite ikibazo cy’ariya matotoro. Uwo rero iyo tumugezeho tumugira inama yo kubakisha Biyogaze kugira ngo bimworohere.”

Umukozi w’akarere ka Ngoma ushinzwe gukwirakwiza ingufu za Biyogaze avuga ko umworozi ufite inkoko ziri hagati ya 200 na 300 yakoresha Biyogaze iva ku mwanda wazo, akubakirwa ikigega gito cya meterokibe enye.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE