2017-11-23 07:40:03 clouds 27o High | Kigali Rwanda

Dukurikire:
 
 

Amateka ya N’Golo Kante, umukinnyi mwiza w’umwaka muri shampiyona y’u Bwongereza

Yanditswe na IMVAHO NSHYA

Kuya 2017-05-01 07:51:55

 
Share on:
 
Yasuwe:318
 
Yavuzweho:200
 
10
 
10

Tariki ya 23 Mata 2017, ni umunsi utazibagira mu mateka y’umukinnyi w’ikipe ya Chelsea, N’Golo Kante kuko ari bwo yahawe igihembo cy’umukinnyi witwaye neza “PFA Award” muri shampiyona y’umupira w’amaguru mu cyiciro cya mbere mu Bwongereza “Premier League” muri uyu mwaka wa 2017.

Ibirori byabereye muri Grosvenor Hotel i London, N’Golo Kante utari uzwi cyane muri shampiyona y’u Bwongereza mu myaka ibiri ishize yatowe n’abakinnyi b’umupira w’amaguru bakina nk’ababigize umwuga muri iyi shampiyona akaba yaratsinze abo bari bahanganye barimo mugenzi we bakinana Eden Hazard ugifite mu 2015, rutahizamu wa Tottenham Harry Kane, Romelu Lukaku wa Everton, Zlatan Ibrahimovic wa Manchester United na Alexis Sanchez wa Arsenal.

JPEG - 125.2 kb
N’Golo Kante, ukinira Chelsea uheruka guhabwa igihembo cy’umukinnyi mwiza w’umwaka mu Bwongereza

Nyuma yo guhabwa iki gihembo, N’Golo Kante abinyujije ku rubuga nkoranyambaga rwa “Instagram” yatangaje ko ari ibintiu bimushimije kandi bitangaje.

Yongeyeho ko ari umusaruro wo gukora nk’ikipe byabaheje iki gihembo, ashimira byimazeyo bagenzi be bakinana, abayobozi n’abafana b’ikipe ya Chelsea.

Uyu mukinnyi abikesha kuba yaragize ibihe byiza muri uyu mwaka w’imikino 2016-2017, kuko yagize uruhare rukomeye mu gufasha ya Chelsea iri ku mwanya wa mbere muri shampiyona y’u Bwongereza ifite n’amahirwe yo kuyegukana anayihesha kugera ku mukino wa nyuma w’igikombe cy’igihugu “FA Cup 2017” bazahuramo na Arsenal tariki 27 Gicurasi 2017 i Wembley.

Kante ushimwa, agakundwa na buri mukinnyi muri Chelsea kubera ubwitange, umurava n’imbaraga akoresha mu kibuga, mu mikino amaze gukina 37 yabashije gutsinda ibitego 2 muri uyu mwaka w’imikino 2016-2017.

Iki gihembo ngarukamwaka gitangwa n’Ishyirahamwe ry’abakinnyi babigize umwuga bakina muri shampiyona y’u Bwongereza cyaherukaga gutwarwa na Riyad bakinananaga muri Leicester City mu mwaka ushize wa 2016.

N’Golo Kante w’imyaka 26 y’amavuko, afite amahirwe yo gukora amateka yo kwegukana ibikombe 2 bya shampiyona y’u Bwongereza mu myaka 2 ikurikirana mu makipe abiri atandukanye biheruka gukorwa na Eric Cantona.

Amavu n’amavuko ya N’Golo Kante

N’Golo Kante yabonye izuba tariki 29 Werurwe 1991, avukira i Paris mu Bufaransa nyuma y’uko ababyeyi be bombi bakomoka muri Mali ariho bari bimukiye mu 1980. Uyu mukinnyi afite ubwenegihugu bw’u Bufaransa apima uburebure bwa metero 1 na sentimetero 69 (1, 69 cm) n’ibiro 69. Yambara nimero 7 muri Chelsea akaba akina mu kibuga hagati afasha ba myugariro.

Yagize intangiriro mu mupira w’amaguru yatangazaga abamurebaga

N’Golo Kante yatangiye umwuga w’umupira w’amaguru afite imyaka 8 mu ikipe y’abatarabigize umwuga ya JS Suresnes yo mu Burengerazuba bw’i Paris, umurwa mukuru w’u Bufaransa ahamara imyaka igera ku 10.

Pierre Ville, umunyamabanga akaba n’umutoza wungirije w’ikipe ya JS Suresnes avuga ko uyu mukinnyi atangira gukina muri iyi kipe yari umwana wari utangaje cyane kuko ubwoya yigeragamo yari afite igihagararo cya ½ cya bagenzi be ndetse yari muto ugereranyije n’abandi bana bagiye bamunyura imbere.

Yemeza ko n’ubwo yari muto, igihe yatangiraga gukina yigaragaje kurenza abandi bose, akaba yarakinaga mu makipe yarimo abakinnyi bari bakuru kuri we. Kante yari afite ibiro bikeya, ariko yakinaga mu makipe yose mu byiciro by’imyaka itandukanye.

Akiri muto ntiyashimwe n’abatoza b’amakipe yamurambagije

Mu myaka y’ubuto bwe, yagiye yirengagizwa n’abatoza b’amakipe akomeye yagiye akoramo igeragezwa kubera ingano ye nto n’uburyo bw’imikinire ye kubera ko atakundaga kwiharira umupira.

Pierre Ville avuga ko atari PSG yonyinye, yagiye akora igeragezwa inshuro nyinshi mu makipe arimo Lorient, Rennes kuva afite imyaka 14 cyangwa 15 hamwe n’amakipe yo mu cyiciro cya mbere nka Sochaux bose bakavuga ari umukinnyi mwiza ariko ko bafite abakinnyi beza nka we.

Mu Bufaransa barebaga abakinnyi bafite imbaraga byatumye abashinzwe gushakira amakipe abakinnyi bafite impano batabasha kubona ubuhanga bwe nyakuri kubera ko yabaga yirengajwe ntiyigaragaze.

Georges Tournay wamutoje mu ikipe ya Boulogne FC avuga ko iyo aza kuba yaracitse intege ntabwo aba ageze kuri uru rwego agezeho kubera ko yagiye asigwa inyuma inshuro nyinshi.

Inzira yanyuzemo kugera aho ageze muri iki gihe

N’Golo Kante yatangiriye mu ikipe y’abato mu ikipe ya JS Suresnes (1999-2010), ahava yerekeza muri Boulogne ahamara imyaka ibiri (2010-2012).

Yaje kuzamurwa mu ikipe nkuru ya Boulogne(2012-2013), ayikinira imikino 38 atsinda ibitego 3.

Mu 2013 yerekeje mu ikipe ya Caen yo mu cyiciro cya 2 mu Bufaransa ayifasha kuzamuka muri shampiyona y’icyiciro cya mbere “Ligue 1”, akaba yarayikiniye imikino 75 ayitsindira ibitego 4.

Mu 2015 yerekeje muri Leicester City aguzwe miliyoni 5, 6 z’amapawundi, atsinda igitego cya mbere muri shampiyona y’u Bwongereza tariki 7 Ukwakira 2015 mu mukino Leicester City yatsinzemo Watford ibitego 2-1.

Kante wabaye umukinnyi ngenderwaho afasha Leicester City gukora amateka yo kwegukana igikombe cya shampiyona y’u Bwongereza “Premier League”, yashyizwe ku rutonde rw’abakinnyi 4 b’iyi kipe bagaragaye mu ikipe y’umwaka muri ya shampiyona y’u Bwongereza “PFA Team of the Year 2016”.

Nyuma yo kuva muri iyi kipe yabuze umusimbura biba intandaro y’umusaruro mubi yagize mu ntangiriro ya shampiyona y’uyu mwaka byaje kuviramo umutoza Claudio Ranieri kwirukanwa.

Mu mwaka wakurikiyeho yasinye muri Chelsea aguzwe miliyoni 32 z’amapawundi akaba yaratangiye gukinira iyi kipe tariki 15 Kamena 2016 mu mukino batsinzemo West Ham United ibitego 2-1. Yatsinze igitego cya mbere muri Chelsea tariki 23 Ukwakira 2017 batsinda Manchester United ibitego 4-0.

Tariki 20 Mata 2017 yongeye gutorwa mu ikipe y’umwaka muri shampiyona y’u Bwongereza ku nshuro ya Kabiri yikurikiranya “PFA Team of the Year 2016”.

N’Golo Kante yasabwe gukinira igihugu ababyeyi be bakomokamo
N’Golo Kanté uvuka ku babyeyi bombi bakomoka muri Mali, byaje gutuma yifuzwa n’ikipe y’igihugu ya Mali mbere y’imikino y’igikombe cy’Afurika “CAN 2015” mbere y’uko akinira ikipe y’u Bufaransa.

Mali yongeye kumusaba kuba yaza kubakinira muri Mutarama 2016 ariko aza gutangaza ko atari yafata umwanzuro w’ikipe y’igihugu agomba gukinira.

Yahamagawe bwa mbere mu ikipe y’u Bufaransa hitegurwa “Euro 2016”

Kanté yahamagawe mu ikipe y’igihugu y’u Bufaransa ku nshuro ya mbere tariki 17 Werurwe 2016 ubwo biteguraga imikino ya gicuti u Bufaransa bwakinnye n’u Buholandi n’u Burusiya.

Yatangiye gukinira iyi kipe mu mukino Bufaransa batsinzemo u Buholandi ibitego 3-2 asimbuye Lassana Diarra. Yagaragaye mu ikipe y’u Bufaransa yitabiriye imikino y’igikombe cy’u Burayi “Euro 2016” akaba yarayifashije kwegukana umwanya wa wa 3. Kuri ubu, afatwa nk’umukinnyi mwiza kuri iyi isi ukina ku mwanya we bamwe bamugereranya na Claude Makerere mushya.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE