2017-10-18 07:01:40 clouds 27o High | Kigali Rwanda

Dukurikire:
 
 

RURA yagize uruhare rukomeye mu kunoza serivisi zihabwa Abanyarwanda

Yanditswe na IMVAHO NSHYA

Kuya 2017-04-28 08:43:33

 
Share on:
 
Yasuwe:339
 
Yavuzweho:200
 
10
 
10

o Nta bantu bakirara ku muhanda bategereje imodoka zigomba kubageza aho bajya
o Umubare w’imirongo ya telefone zigendanwa umaze kwiyongeraho miliyoni eshanu n’ibihumbi magana atatu (5,300,000)
o Abantu bakoresha interineti bavuye kuri 1,6% bagera kuri 36%
o Abaje gushora imari mu bijyanye n’ikoranabuhanga bamaze kugera 45%
o Ijwi ry’Umuturage niryo rituyobora ku bikenewe n’ibigomba gukorwa- Major. Nyirishema

Ibi ni bimwe mu bikorwa Urwego rw’Igihugu ngenzuramikorere rw’imirimo imwe n’imwe ifitiye igihugu akamaro (RURA) rumaze kugeraho ndetse n’ibindi byinshi mu myaka irindwi ishize.

Ubuyobozi bw’ Urwego rw’Igihugu ngenzuramikorere rw’imirimo imwe n’imwe ifitiye igihugu akamaro (RURA) buvuga ko ijwi ry’umuturage ariryo ribayobora ku bikenewe ndetse n’ibigomba gukorwa.

Umuyobozi wa RURA Major Nyirishema Patrick

Umuyobozi w’Urwego rw’Igihugu ngenzuramikorere rw’imirimo imwe n’imwe ifitiye igihugu akamaro (RURA) Major Nyirishema Patrick avuga ko RURA igenzura inzego zirimo ba rwiyemezamirimo ariko bakaba batanga serivisi z’ingenzi mu gihugu zigira ingaruka ku baturage.

RURA yashyizweho n’Itegeko n°09/2013 ryo kuwa 01/03/2013 riyiha inshingano zo kugenzura imikorere y’inzego zimwe na z’imirimo ifitiye igihugu akamaro rikanagena inshingano, ububasha, imiterere, n’imikorere byazo

Muri iyo mirimo igenzurwa, RURA ishinzwe ibi bikurikira gushyiraho amabwiriza, gutanga ibyemezo, uburenganzira n’impushya, kugenzura iyubahirizwa ry’amategeko n’amabwiriza, gushishikariza abatanga serivizi n’ibyangombwa kubigeza hirya no hino, gukora ku buryo imirimo ifitiye igihugu akamaro ikomeza gutangwa idahagaze no kubungabunga inyungu rusange, kurengera no guteza imbere inyungu z’abahabwa n’abatanga serivisi, guteza imbere ikwirakwizwa rya serivisi zigenzurwa, zikagera ku bafatabuguzi bose harimo abafite ubushobozi buke, abatuye mu cyaro n’abanyantege nke, guteza imbere imikorere hakurikijwe politiki ya Leta y’ubukungu n’imari, guteza imbere no kongera ubumenyi rusange, ubukangurambanga, n’imenyakanisha ry’imirimo ngenzuramikorere.

Muri ubwo bukanguramabaga havugwa nko ku bijyanye n’inshingano, ububasha n’imirimo bya RURA, uburenganzira n’inshingano z’abafatabuguzi n’abatanga serivisi, uko ibirego bitangwa n’uburyo bikemurwa.

Mu kiganiro Umuyobozi wa RURA yagiranye n’itangazamakuru ku bikorwa RURA yagezeho mu myaka irindwi ishize yavuze ko habayeho iterambere mu nzego zose ariko byagera ku ikoranabuhanga bikaba akarusho.

Major Nyirishema yagize ati “ Inshingano dufite ni ukureba ko Politike ya Leta ishyirwa mu bikorwa mu nzego zirimo ba rwiyemezamirimo batanga serivisi zingenzi mu gihugu zikaba zigira ingaruka ku baturage. Ni byinshi bimaze kugerwaho mu myaka irindi ishize ariko ikoranabuhanga ryateye imbere cyane ugereranyije n’izindi nzego.”

Mu ikoranabuhanga n’itumanaho

Umuyobozi wa RURA avuga ko kuva mu mwaka 2010 kugera mu mwaka wa 2017 imirongo ya telefone zigendanwa yavuye kuri miliyoni eshatu n’ibihumbi ijana (3,100 000) igera kuri miliyoni umunani n’ibihumbi magana ane (8,400,000) . Abantu bakoresha interineti bavuye kuri 1,6% ubu bageze kuri 36% .

Yakomeje agira ati “ Iyo urebye abashoramari baje gushora imari mu Rwanda hagati y’umwaka wa 2010 na 2015 abenshi baje mu rwego rw’Ikoranabuhanga (ICT Sector). Ishoramari ryavuye hanze 45% bose n’ikoranabuhanga n’itumanaho.”

Ikoranaguhanga ryamaze kugera hose no mu mashuri

Politiki ya Leta yo gutwara abantu mu buryo bunoze yashyizwe mu bikorwa

Uburyo bwo gutwara abantu haba mu mujyi wa Kigali ndetse no mu ntara yarangwagamo akajagari. Mbere y’Umwaka wa 2013 imodoka yahagurukaga ahantu yagera mu nzira igakuramo abantu umushoferi agashyiramo abantu bitewe n’aho kujya bimworohera .Hari igihe cyageraga saa moya ukaba udashobora kubona imodoka yerekeza aho ujya ukirwariza

Umuyobozi w’Urwego rw’Igihugu ngenzuramikorere rw’imirimo imwe n’imwe ifitiye igihugu akamaro (RURA) avuga ko hamaze kujyaho Politike nshya ijyanye no gutwara abantu neza guhera mu mwaka wa 2013 serivisi yo gutwara abantu itangira saa kumi n’ebyiri za mu gitondo ikarangira saa tanu ndetse n’iyo bitakozwe haba hari umuntu wabibazwa.

Abagenzi bakoresha amakarita yo gutega ya Tap&Go bishimira ko yabakijije guhora bagendana amafaranga

Major Nyirishema yakomeje agira ati “ Tuvuye mu gihe hari za minibus ntoya ubu tugeze aho gukoresha bus nini, ni ibintu byiza cyane kuko imijyi yose itera imbere usanga hakoreshwa bus nini ni ikintu twishimira kuko bizajya bifasha abantu kugenda neza.

Serivisi yo gutwara abantu hagati y’Umujyi wa Kigali n’indi mijyi yakomeje kunozwa aho hasigaye hatangwa amatike hifashishijwe ikoranabuhanga(Electronic Ticketing), serivisi y’imodoka zigenda zidahagarara( Express services) yakomeje kuba nziza kurusha uko byari bimeze imodoka zifashishwa zakomeje kuba nziza n’ibindi.

Gutwara abantu birimo kuvugururwa bibandwa ku modoka nini kandi nziza

Mu zindi serivisi zigenzurwa na RURA

Ubundi mu Rwanda hari Ikigo kimwe cya Leta gitanga umuriro w’amashanyarazi ndetse kigashakisha n’uburyo umuriro waboneka ariko haje abashoramari benshi bahabwa ibyangombwa bibemerera gukora ndetse bafashije igihugu kuzamura umubare w’abakoresha umuriro.

Umuyobozi wa RURA avuga ko bashyizeho uburyo bufasha gushyiraho ibiciro mu nzego zitandukanye mu gutwara abantu, umuriro, amazi, isuku n’isukura cyane cyane ku bigo bikora imirimo yo kugenda bakusanya imyanda iba iri mu ngo z’abantu bakayijyana aho yagenewe bitandukanye no mu gihe cyashize aho wasangaga abantu batwika imyanda. Major Nyirishema Patrick avuga ko ibi byose bikorwa mu rwego rwo gufasha umuturage gukomeza kugira ubuzima bwiza

RURA ikorana bya hafi n’izindi nzego mu kunoza serivisi

RURA ikorana n’inzego zitandukanye zashyirwa mu byiciro bitatu. Inzego zishyiraho politiki: ni izishyiraho umurongo ngenderwaho ari zo zirimo guverinoma, misinisiteri, inteko ishinga amategeko n’izindi; mu by’ukuri, RURA igendera ku murongo wa politiki no ku mategeko izo nzego zishyiraho ariko ku rundi ruhande, mu bijyanye n’imirimo igenzura, RURA izigira inama, ibyibwirije cyangwa ibisabwe, mu ishyirwaho rya politiki cyangwa amategeko mashya.

Amazi meza amaze kugera mu gihugu hose kandi ari ku giciro cyo hasi cyane

Kubera ko inzego RURA igenzura hari ubwo ziba zegamiye kuri minisiteri zitandukanye (urugero ibijyanye n’ikoranabuhanga bibarizwa muri MYICT mu gihe ibijyanye no gutwara abantu, ingufu, amazi n’amashanyarazi bibarizwa muri MININFRA) hateganijwe iteka rya minisitiri w’Intebe rigena uburyo izo minisiteri zihuza ibikorwa na RURA mu gushyira mu bikorwa inshingano za buri ruhande. 3.2. Abagurisha ibintu bitandukanye ndetse na serivisi: hari abantu ku giti cyabo, koperative n’amasosiyeti. RURA ibashyiriraho amabwiriza, ikabereka ahari amahirwe mu gushora imari n’uburyo batera imbere, ikabaha uruhushya rwo gukora, ikagenzura ko bubahiriza amategeko n’amabwiriza agenga imirimo bakora ndetse ikanabagira inama mu bintu bitandukanye.

Nk’uko Umuyobozi wa RURA yakomeje abivuga ngo bakorana n’ibindi bigo bifite mu nshingano kugenzura ibikorwa bitandukanye, afatiye ku rugero rw’Ikigo cy’Igihugu gitsura ubuziranenge (RSB) gishyiraho ibipimo(Standards) ibyo bipimo byaba byuzuye RURA ikabona gushyiraho uburyo bwo kubikoresha (Regulations).

Yagize ati “ Uburyo dukorana n’Ikigo cya (RSB, ) gishyiraho ibipimo bya ngombwa( Standards) ibipimo bisabwa byaba byuzuye , tugendeye kuri ibyo bipimo tugashyiraho amabwiriza y’ikoreshwa bikagirira umuturrage akamaro.

Nka banki nkuru y’Igihugu (BNR) niyo itanga uburenganzira ku ikoreshwa ry’amafaranga. Niba itanze uburenganzira ku ikoreshwa rya Mobile Money kandi Serivisi ya Mobile Money ikaba ikoreshwa n’ibigo by’itumanaho(Telecom Companies) zigenzurwa na RURA, tuba dufitanye amasezerano y’ubufatanye na BNR asobanura imikorere ku buryo nta kintu gishobora gukorwa mu buryo butanoze.”

Umuyobozi w’ Urwego rw’Igihugu ngenzuramikorere rw’imirimo imwe n’imwe ifitiye igihugu akamaro (RURA) avuga ko n’ibindi bigo bakorana muri ubu buryo.

Muri rusange Inshingano nyamukuru ya RURA ngo ni ukureba ko abaturage babona serivisi nziza kandi ku giciro kinogeye buri wese ni nayo mpamvu hashyizweho uburyo bwo gutanga amakuru mu gihe umuntu agize ikibazo akaba yafashwa.

Gutwara abantu mu mutuzo byakomeje kunozwa, ubu serivisi yo gutwara abantu itangira saa kumi n'ebyiri za mu gitondo kugera saa kumi n'ebyiri za ni mugoroba

Major Nyirishema avuga ko hari umurongo wa Telefone utishyurwa(Toll Free 3988), e-mail info@rura.rw , imbuga nkoranyambaga Twitter na Facebook ndetse n’umuntu akaba ashobora kuza aho RURA ikorera akagaragaraza ikibazo yahuye nacyo bakaba bamufasha kugikemura mu buryo bworoshye. Nk’uko yakomeje abivuga muri rusange serivisi zose RURA ikurikirana hagiye habaho iterambere ku buryo nta kintu na kimwe cyasigaye inyuma.

Umuyobozi wa RURA yagize ati “ Muri Serivisi zose habaye iterambere, imibare ikomeza kugenda izamuka, yaba abantu bafite amazi n’amashanyarazi, yaba umubare wa Radio ndetse na Television ibigo bikora imirimo yo gutwara abantu byakomeje kwiyongera ibigo bicuruza ibijyanye n’ikoranabuhanga byariyongereye n’ibindi. Ibi bigaragaza ko abantu bishimira serivisi zitangwa n’ibigo n’abikorera batandukanye.”

Intego RURA yihaye mu myaka irindwi ishize yarazirengeje

Ubuyobozi w’ Urwego rw’Igihugu ngenzuramikorere rw’imirimo imwe n’imwe ifitiye igihugu akamaro (RURA) buvuga ko intego bihaye bafatanyije n’ibindi bigo kuva mu mwaka wa 2010 kugera mu waka wa 2017 inyinshi barazirengeje.

Major Nyirishema yagize ati “Intego tuba twarihaye inyinshi tubatuzihuriyeho n’ibindi bigo kuko dukorana n’inzego zitandukanye. Nko mu ikoranabuhanga intego twari dufite twarayirengeje. Mu mwaka wa 2010 twari twihaye intego ko kugera mu mwaka wa 2017 tuzaba tugeze kuri 70% y’abantu bakoresha Telefone zigendanwa ariko ubu tugeze kuri 79%. Izindi ntego dufitemo uruhare ku rwego rw’Igihugu nko gukwirakwiza umuriro dufitemo uruhare rwo kugena ibiciro. Mu mwaka wa 2010 twari dufite intego y’uko umwaka wa 2017 tuzaba tumaze kugira ibiciro by’umuriro byorohereza abashoramari. Tugereranyije n’ibihugu u Rwanda ruherereyemo twari dufite ibiciro biri hejuru ariko ubu twarabikoze ibiciro byacu biri hasi nk’ibyo mu bihugu duhana imbibi.”

Abatwara abantu kuri moto ndetse n'abandi boroherejwe uburyo bwo kubona ibyangombwa bibafasha mu kazi

Hari inzego zikeneye gushyirwamo imbaraga

Umuyobozi w’ Urwego rw’Igihugu ngenzuramikorere rw’imirimo imwe n’imwe ifitiye igihugu akamaro (RURA) avuga ko n’ubwo ibi byose byakozwe hari inzego zikeneye gushyirwamo imbaraga kugira ngo igihugu gikomeze kwihuta mu iterambere n’abantu bakomeze kubona serivisi nziza.

Yagize ati “Kongera umuriro w’amashyanyarazi bikwiye gushyirwamo imbaraga nyinsi, imiyoboro myinshi irashaje ndetse hakenewe n’imbaraga nyinshi mu bikorwa byo kugeza umuriro ku baturage.

Mu ikoranabuhanga naho hakewe gukomeza gushyirwamo imbaraga. Gukwirakwiza interineti byarakozwe ariko uko igihugu gitera imbere niko ibisabwa byiyongera hagomba gukomeza ibikorwa byo gushora imari mu ikoranabuhanga kugira ngo uko abaturage biyongera bakomeze kubona serivisi nziza. Gutanga serivisi nziza bigomba gukomeza gushyiramo imbaraga nyinshi.”

Major Nyirishema avuga ko byose bituruka ku miyoborere myiza ya Nyakubahwa Perezida Kagame

Major Nyirishema avuga ko ibikorwa byose bageraho ndetse n’iterambere igihugu gifite bikomoka kuri Politike nziza ya Nyakubahwa Perezida Paul Kagame. Yagize ati “Ibi byose kubigeraho tubikesha ubuyobozi bwiza dukesha Nyakubahwa Perezida wa Repubulika y’u Rwanda Paul Kagame uduha umurongo wa Politike tugenderaho ndetse n’inzego zitandukanye zafatanyije kugira ngo habeho uburyo buboneye abashoramari bakorera mu gihugu cyacu ndetse natwe bikatworohereza gufasha abashoramari bashaka kuza gukorera mu gihugu cyacu.

Uruhare rwa RURA ni ingenzi mu gushyiraho amabwiriza no kugenzura ko umurongo wifuzwa ukurikizwa bigatuma inzego z’imirimo ifitiye igihugu akamaro zigenzurwa na RURA ziriyongera kandi zitera imbere zunguka ariko na none zirushaho kunoza imikorere, gutanga serivisi nziza; hari ndetse n’izatangiye gushyiraho uburyo bwo gukemura ibibazo by’abafatabuguzi. Iyo ibibazo bidakemutse umufatabuguzi agana RURA ikamugoboka.

Nyuma yaho mu bice bitandukanye by'Igihugu hagereye amashanyarazi abaturage batangiye kwiteza imbere uyu ni Niyonteze Jean Claude wahise atangira umwuga w'ububaji mu murenge wa Musenyi mu Bugesera

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE