2017-12-12 14:14:08 clouds 27o High | Kigali Rwanda

Dukurikire:
 
 

Rubavu:Abifuza kuva mu manegeka batuyemo bemerewe amabati

Yanditswe na IMVAHO NSHYA

Kuya 2017-04-27 12:48:30

 
Share on:
 
Yasuwe:511
 
Yavuzweho:200
 
10
 
10

Ubuyobozi bw’akarere ka Rubavu bwemereye amabati abaturage batishoboye bagera ku 120, bashaka kuva mu manegeka, mu rwego rwo kubafasha gutura mu mudugudu.

Ubuyobozi bw’aka karere buvuga ko igikorwa cyo kugurira amabati aba baturage kizatwara amafaranga miliyoni 43, ariko ngo akarere kiteguye kuyatanga ariko abantu bakava ahashobora gushyira ubuzima bwabo mu kaga.

Abaturage bose bafite iki kibazo bakaba basabwa kudapfusha ubusa aya mahirwe bahawe yo guhabwa ubu bufasha, ndetse bakanasabwa kwishyira hamwe bakubakirana, ahasigaye bagashyikirizwa amabati bemerewe.

JPEG - 228 kb
Niyonsenga Leonard, umuyobozi w’ibiro by’ubutaka mu karere ka Rubavu(Foto Iyaremye Y)

Niyonsenga Leonard, umuyobozi w’ibiro by’ubutaka mu karere ka Rubavu, yemeza ko iki gikorwa kimaze amezi gitangiye, ariko ngo nticyari cyatangira kwitabirwa cyane nk’uko ubuyobozi bubyifuza.

Yagize ati “Ubu turi mu bukangurambaga dushaka uburyo abaturage bacu bava mu manegeka begera ahantu heza kandi mu mudugudu hafi y’iterambere, aya mabati arimo gutangwa ubundi agenewe bamwe mu bantu baba batuye bonyine ahantu hatatanye, murumva kugira ngo ibikorwa by’iterambere bibagereho biragorana.”

Akomeza agira ati “Ikindi hari abantu batuye mu buryo bw’amanegeka ahantu nabo baba bazi ko umunsi ku munsi bashobora kwisanga mu kabande bagwiriwe n’imisozi, turabakangurira gushaka aho batura bagaturana n’abandi, mu rwego rwo kwegera ahantu bashobora kugerwaho n’iterambere mu buryo bwihuse.”

Gakuru Fufuka Benoit, umunyamabanga nshingwabikorwa w’umurenge wa Cyanzarwe, avuga ko iyi ari impano ikomeye Leta y’ubumwe yageneye abaturage ngo barusheho gutura neza, nabo bakaba bagiye kuyitabira ku bwinshi.

Aragira ati “Nta handi twabonye Leta yita ku muturage ikamuha amabati muri ubu buryo, ubu turimo gukangurira abaturage batuye mu manegeka aho umuturage ashobora gushaka aho yimukira mu mudugudu akagurana na ba nyiri ubutaka ubundi akiyubakira, ariko hari n’igihe abaturage bafata umwanzuro wo kumukorera umuganda kandi tugiye gushyiramo imbaraga turebe ko twabyaza umusaruro aya mahirwe.”

Ayinkamiye Germaine, umwe mu baturage batuye mu murenge wa Cyanzarwe aragira ati “Byo hari ubona umuntu atuye ahantu ku buryo nta gikorwa remezo cyamugeraho, ubwo abo rero kugira ngo bazatere imbere batuye bonyine ni intambara, turashima Leta y’ubumwe yashyizeho iyi gahunda yo kuduha amabati kandi natwe turashyiramo akacu.”

Ubuyobozi bw’akarere butangaza ko aya mabati ahabwa umuntu wamaze kubaka ageze igihe cyo gusakara mu rwego rwo kwirinda ko yayagurisha. Amabati aho abitse ku karere ka Rubavu yatangiye gutangwa mu kwezi kwa Werurwe.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE