2017-11-24 09:36:46 clouds 27o High | Kigali Rwanda

Dukurikire:
 
 

Muhanga:Hari abagabo bahohoterwa n’abagore babo ntibabigaragaze

Yanditswe na IMVAHO NSHYA

Kuya 2017-04-26 08:25:25

 
Share on:
 
Yasuwe:153
 
Yavuzweho:200
 
10
 
10

Bamwe mu baturage bo mu karere ka Muhanga bagaragaza ko hari bamwe mu bagabo bahohoterwa n’abagore babo bakinumira, banga gusekwa.
Iki kibazo cy’abagabo bamwe bahohoterwa n’abagore ntigikunze kuboneka ahantu henshi, ahubwo aba baturage bavuga ko iyi ngeso isanzwe izwi kuri bamwe mu bagabo.

JPEG - 375 kb
Ibiganiro byo mu mugoroba w’ababyeyi ni kimwe mu bigabanya amakimbirane mu miryango

Bamwe mu baturage bo mu murenge wa Muhanga, bagaragaje ko hari umubare utari muto w’abagabo bahohoterwa n’abagore, bikabaviramo guta ingo bakigendera, batinya ko nibabivuga abo baturanye bazajya babaseka cyangwa bakabafata nk’inganzwa.

Butera Emmanuel wo mu mudugudu wa Gitongati, Akagari ka Nganzo, mu Murenge wa Muhanga, avuga ko afite ingero nyinshi n’amazina y’abagabo baturanye mu mudugudu bakubiswe inshuro nyinshi n’abagore babo, bagatinya kubivuga uwo mwanya, ahubwo bakazabivuga hashize igihe, cyangwa bagacikwa bakabivuga nk’igihe basinze.

Yagize ati “Nubwo hari abagore nabo bagikubitwa, ntitwirengagize ko hari abagabo bagenzi bacu bamerewe nabi, ibi bibazo byose bikwiye guhagurukirwa.»
Umuyobozi w’umuryango ugamije guteza imbere indangagaciro na Kirazira mu Muryango (Reactivation of Family Values Organisation) Rutanga David, atangaza ko uyu ari wo mwanya wo gucoca ibibazo by’amakimbirane avugwa mu muryango kandi ku mpande zose, kuko ibi bibazo by’ihohoterwa nta ruhande na rumwe bitavugwamo.

Yagize ati:«Ibi byose biraterwa na bamwe bafite imyumvire mibi ku buringanire n’ubwuzuzanye, ariko icyangombwa n’uko abashakanye bagirana ibiganiro bakagarura n’indangagaciro na kirazira by’umuco nyarwanda.»

Rurangwa Laurent, Umunyamabanga Nshingwabikorwa w’Umurenge wa Muhanga, avuga ko hari dosiye zitari nke afite z’abagabo bagiye kurega abagore babo ko babakubita, ariko akavuga ko nta muntu n’umwe muri abo wemerewe guhohotera uwo bashakanye kuko bihanwa n’amategeko kandi bigira ingaruka mbi ku burere bw’abana ndetse n’igihugu muri rusange.

Yagize ati: “Ibibazo by’amakimbirane bikunze kuboneka usanga bishingiye ku micungire mibi y’umutungo bamwe bashaka kwiharira, twe tugasaba ko uwajya agaragaraho ikosa yajya aca bugufi agasaba imbabazi mugenzi we.”

Kugeza ubu mu murenge wa Muhanga hari ingo zibanye nabi zigera kuri 42, uyu mubare ukaba ugenda ugabanuka bitewe n’ibiganiro bibera mu mugoroba w’ababyeyi, ndetse n’ubundi bukangurambaga bukorwa n’inzego z’ubuyobozi zitandukanye.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE