2017-12-13 09:46:30 clouds 27o High | Kigali Rwanda

Dukurikire:
 
 

Musanze:Urubyiruko rurasabwa kwitondera amakuru rukura ku mbuga nkoranyambaga

Yanditswe na IMVAHO NSHYA

Kuya 2017-04-25 09:01:36

 
Share on:
 
Yasuwe:138
 
Yavuzweho:200
 
10
 
10

Bamwe mu babyeyi bo mu karere ka Musanze barasaba urubyiruko kujya rusesengurana ubushishozi, amakuru yose ruhura na yo ku mbuga nkoranyambaga nka Facebook na Whatsapp, ngo kuko haba harimo ashobora kuruyobya.

JPEG - 358 kb
Abaturage bo mu kagari ka Cyabararika mu biganiro byo kwibuka ku nshuro ya 23 Jenoside yakorewe Abatutsi

Aba babyeyi bagaragaza ko ku mbuga nkoranyambaga hari ubwo hari abahashyira amakuru ahakana akanapfobya Jenoside yakorewe Abatutsi, ku buryo urubyiruko ruba rukwiye gushishoza kuri buri makuru rusoma.

Bamwe mu rubyiruko baganiriye n’Imvaho Nshya nabo bagaragaje ko hari ubwo bajya babona amakuru atandukanye n’ukuri kuri Jenoside, bakurikije amasomo bahabwa mu ishuri ndetse n’ibiganiro bitangwa mu gihe cyo kwibuka.

Nsanzimana Albert utuye mu murenge wa Muhoza, yagize ati “Imbuga nkoranyambaga mbona kuri ubu ari nk’ikiyobyabwenge ku bana bacu kubera ko zibatwara ubwenge, umwana aho kwiga amasomo akura mu ishuri ndetse n’inama z’ababyeyi, ahubwo ugasanga aripakiramo inkuru zivuga ku Rwanda zivuye mu mahanga, kandi mbi zivuga byacitse, na we yagera mu bandi bagenzi be akayikwirakwiza ugasanga ingengabitekerezo ya Jenoside ibonye urwaho.

Ndasaba rwose uretse n’urubyiruko, ko buri Munyarwanda yajya abanza agasesengura amakuru yo ku mbuga nkoranyambaga, aho gupfa kugotomera amakuru yose bahuye na yo kandi ibyabaye byarabaye mu gihugu cyabo, bakaba babizi kuruta abanyamahanga.”

Akomeza avuga ko ngo hari ubwo abona n’umwana amweretse ubutumwa bugufi buhakana Jenoside yakorewe Abatutsi, yamubaza aho abuvanye akamusobanurira ko na we aba abwohererejwe n’abandi kuri WhatsApp no kuri za Facebook, ari naho ahera asaba ko bene aya makuru aba acaracara ku mbuga nkoranyambaga akwiye kwitonderwa.

Ishimwe Redempta, umwe mu rubyiruko rwo mu murenge wa Muhoza, yagize ati “Imbuga nkoranyambaga rero buriya zitera urujijo cyane, ibi bikaba bisaba gusesengura neza amakuru yose uhasanze, cyane ku birebana na Jenoside yakorewe Abatutsi.

Ubu niyemeje kujya mvuguruza abo bantu bavuga amakuru atari yo mbifashijwemo n’amasomo nkura mu ishuri no ku babyeyi ndetse no mu biganiro duhabwa mu gihe cyo kwibuka.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE