2017-11-24 09:36:46 clouds 27o High | Kigali Rwanda

Dukurikire:
 
 

Rulindo:Abayobozi b’amashuri basabwe gukuraho imbogamizi abana bahura na zo mu myigire

Yanditswe na IMVAHO NSHYA

Kuya 2017-04-25 08:54:52

 
Share on:
 
Yasuwe:145
 
Yavuzweho:200
 
10
 
10

Abayobozi b’ibigo by’amashuri akorera mu karere ka Rulindo basabwe gukoresha uko bashoboye abana bagakunda ishuri, mu rwego rwo kugabanya umubare w’abarivamo, rimwe na rimwe ugasanga bajya gukora imirimo ibavuna.

JPEG - 287.7 kb
Abayobozi b’ibigo by’amashuri basabwe kwita ku bana barera bakabakundisha ishuri

Ubuyobozi bw’aka karere bugaragaza ko hari bamwe mu banyeshuri bata ishuri bakajya gusoroma icyayi, abandi bakajya mu yindi mirimo ibahemba amafaranga y’intica ntikize.

Umuyobozi w’Akarere wungirije ushinzwe imibereho myiza y’abaturage Gasanganwa Marie Claire, yasabye abayobozi b’ibigo by’amashuri guhorana ubushishozi bakamenya ikibazo umwana afite, cyaba ari igishakirwa umuti ukaboneka kare, hatarindiriwe ko umwana ava mu ishuri.

Yagize ati “Umuyobozi w’ikigo nta bwo wagombye kuba ntibindeba, kuko mu gihe ubigenje utyo n’abo uyoboye bizarangira nta n’umwe wujuje inshingano ze, ibyo bituma umwana mushinzwe kurera nta reme ry’uburezi abona muri icyo kigo”.

Abayobozi b’amashuri kandi basabwe konoza isuku mu bigo by’amashuri bayobora, kugaburira abana biga mu mashuri yisumbuye ifunguro rya saa sita, n’ibindi byose bikuraho imbogamizi ku myigire y’umwana.

Gasanganwa yakomeje agira ati “Turabasaba kugira indangagaciro z’abayobozi no kuba intangarugero muri byose, mukarangwa n’ikinyabufura, mukitabira akazi ku gihe kandi mugaharanira ko ibigo muyoboye biza mu myanya ya mbere muri byose, kandi mugakunda abana”.

Bamwe mu bayobozi b’ibigo by’amashuri bavuze ko bagiye kwikosora bagashaka uburyo bakorana n’ababyeyi ndetse bagatanga serivise nziza bahereye ku banyeshuri babana umunsi ku wundi, bakamenya ikibazo umunyeshuri afite ndetse no gukorana hafi n’ababyeyi mu gihe umwe muri abo banyeshuri atujuje inshingano asabwa ku ishuri.

Abo bayobozi b’ibigo by’amashuri bijeje umuyobozi w’akarere wungirije ushinzwe imibereho myiza y’abaturage ko ibanga bagiye gukoresha ari ukwegera abana, bakabakunda, abarimu bakorana na bo bakafasha kumenya ibibazo abanyeshuri bafite mu miryango iwabo.

Ntirenganya Alphonse, umuyobozi muri REB (Ikigo cy’Igihugu cy’Uburezi) yabwiye abarimu ko ikizatuma ikigo cy’amashuri kibona umusaruro ushimishije ari ugushyira mu bikorwa integanyanyigisho nshya ku gihe cyagenwe, ndetse no kuyubahiriza uko bikwiye.

Abayobozi b’ibigo by’amashuri biyemeje ko bagiye kuba bandebereho muri byose, kugira ngo ibigo bayoboye bizabe intangarugero mu gutsindisha neza ku rwego rw’igihugu, bagahesha isura nziza Akarere ka Rulindo n’ibigo bayoboye by’umwihariko.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE