2017-11-17 14:59:33 clouds 27o High | Kigali Rwanda

Dukurikire:
 
 

Gakenke: I Rusenge bamaze imyaka 2 bafite amapoto nta mashanyarazi

Yanditswe na IMVAHO NSHYA

Kuya 2017-04-24 06:15:10

 
Share on:
 
Yasuwe:301
 
Yavuzweho:200
 
10
 
10

Abaturage bo mu mirenge ihuriye kuri santere y’ubucuruzi ya Rusenge, bavuga ko baheze mu icuraburindi, mu gihe ngo bari bijejwe umuriro w’amashanyarazi, none ngo imyaka ikaba ibaye ibiri amapoto ashinze mu mirima yabo, ariko nta rusinga rurajyaho.

Aba baturage bafite ikibazo baganiriye n’Imvaho Nshya ni abo mu mirenge ya Gashaki muri Musanze, na Kivuruga muri Gakenke, yombi ikora kuri iyi santere ya Rusenge.

Iryamukuru William, wo mu murenge wa Kivuruga, yagize ati “Kuri ubu hashize imyaka igera kuri ibiri, mu midugudu dutuyemo hafi ya yose hashinzwe amapoto twizezwa ko bagiye kuduha umuriro, ayandi na yo bakayarunda mu mirima yacu ategereje gushingwa, ariko dutangazwa n’uko icyo gihe cyose nta rutsinga na rumwe rwari rwajya kuri ayo mapoto, rwose iyo tugeze ahandi tukabona ukuntu abandi baturage bagenda biteza imbere dusanga twarasigaye inyuma kandi imirenge yacu ikora ku muhanda munini”.

Iryamukuru yongeraho ko ngo kuba nta muriro w’amashanyarazi kuri ubu ngo usanga hari abagifite umuco wo gucana Peteroli, abandi bakagerageza kumanika amatoroshi mu nzu ngo aho bashyiraho amabuye ya radiyo, ibintu basanga ngo bibatwara amafaranga menshi, aha ngo ni ho bahera basaba inzego zibishinzwe kubaha umuriro w’amashanyarazi.

Ubuyobozi bw’ikigo gishinzwe gukwirakwiza ingufu z’amashanayarazi mu Rwanda, buratangaza ko iki gikorwa cyadindijwe n’imwe mu makompanyi y’Abahinde yari yatsindiye iri soko nyuma bikaza kuyinanira, gusa ngo hari gushakwa undi rwiyemezamirimo wakomeza kiriya gikorwa.

Umuyobozi w’ikigo gishinzwe gukwirakwiza ingufu z’amashanyarazi, ishami rya Musanze, Nzamurambaho Marcel, yagize ati “Umushinga wo kugeza amashanyarazi ku baturage bo muri aka gace ndetse n’ahandi wari umushinga mugari biteganyijwe ko ugera no mu tundi turere gusa waje kudindira bitewe n’ikompanyi yo mu gihugu cy’Ubuhinde yari yatsindiye isoko ryo kugeza amashanayarazi muri aka gace nyuma isoko riza riza kuyinanira.

Gusa hari gushakwa uburyo iri soko ryahabwa undi rwiyemezamirimo kugira ngo aba baturage babone amashanyarazi nk’uko bari babisezeranyijwe”.

Kuri ubu akarere ka Musanze kamaze kugera ku gipimo cy’umuriro w’amashanyarazi kiri kuri 34% by’ingo zigize aka karere, mu gihe kuri ubu mu gihugu hose igipimo kiri hagati ya 20 na 25 % by’abagituye.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE