2017-09-23 09:22:12 clouds 27o High | Kigali Rwanda

Dukurikire:
 
 

Musanze: Bujuje isoko rya miliyari 7.5, bifuza ko ritahwa na Perezida

Yanditswe na IMVAHO NSHYA

Kuya 2017-04-24 05:59:40

 
Share on:
 
Yasuwe:396
 
Yavuzweho:200
 
10
 
10

Abacuruzi bo mu karere ka Musanze bibumbiye mu kigo “Gorilla Investment Co.”, barizeza abakorera ubucuruzi mu mujyi wa Musanze bose ko bagiye kubona aho bakorera hagezweho, kuko inyubako bamaze imyaka hafi itatu bubaka yuzuye.

Ubuyobozi bwa “Gorilla Investment Company” bwemeza ko iyi nyubako y’isoko rya kijyambere yuzuye itwaye amafaranga y’u Rwanda miliyari 7,5 bukaba bwifuza ko ryatahwa n’Umukuru w’Igihugu Paul Kagame.

Niyonzima Raymond, Umuyobozi w’inama y’ubutegetsi y’iki kigo yagize ati “Ntituramenya neza igihe rizatahirwa nubwo rwose ryuzuye, twifuza ko Umukuru w’Igihugu Paul Kagame yazitabira umuhango wo kuritaha kuko kuri njye mbona ari igikorwa cy’indashyikirwa nk’Abanyamusanze tumaze kugeraho”.

Yakomeje agira ati “Iyi nyubako yuzuye itwaye amafaranga y’u Rwanda agera kuri miliyari 7 n’igice. Nubwo bigaragara ko ihenze kandi ikaba iri mu rwego rugezweho, twakoze ku buryo buri muturage ku mikoro ye uko ameze kose azashobora gucururiza muri iri soko.”

Umuyobozi w’Akarere ka Musanze Habyarimana Jean Damascene yashimiye ababacuruzi ahamya ko buri munyarwanda ahinduye imyumvire iganisha ku iterambere byose bishoboka kubigeraho mu gihe gito.

PNG - 1.1 Mb
Iyi nyubako y’isoko rya kijyambere rya Musanze yatwaye amafaranga y’u Rwanda asaga miliyari zirindwi (Foto Ngaboyabahizi P)

Yagize ati “Ni igikorwa kigaragaza ko imyumvire y’abaturage imaze kuzamuka mu kwiteza imbere, aho bumva ko ubufatanye ari inkingi y’iterambere; nkaba nshishikariza n’abandi gukomeza kwishyira hamwe mu kwiteza imbere no kwihesha agaciro”.

Abacuruzi bato mu karere ka Musanze bavuga ko aya mahirwe yo gukorera ahantu hameze neza bazayabyaza umusaruro, bafata neza ibikorwaremezo by’iyi nyubako.

Umwe mu baturage wafashe umwanya muri iri soko rya kijyambere, yagize ati “Dukurikije uburyo ryubakwaga n’uko ubona rihagaze ubu, kuba tworoherejwe kurikoreramo ni ibintu byiza kuri twe twahoze turi abazunguzayi. Kuba rero iri soko na none ryuzuye tubikesha imiyoborere myiza y’u Rwanda aho abaturage batojwe kwishyira hamwe, turanezerewe cyane, kandi tuzakomeza kwita kuri iyi nyubako n’ibikoresho byayo.”

Iyi nyubako yatangiye kubakwa muri 2014, ifite ubushobozi bwo kwakira abacuruzi banini n’abato bagera ku bihumbi bibiri, ikaba igizwe n’amagorofa atanu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE