2017-11-24 09:36:46 clouds 27o High | Kigali Rwanda

Dukurikire:
 
 

Kurwanya ikibi ni inshingano ya buri wese-Minisitiri Kaboneka

Yanditswe na IMVAHO NSHYA

Kuya 2017-04-18 05:05:31

 
Share on:
 
Yasuwe:163
 
Yavuzweho:200
 
10
 
10

Minisitiri w’Ubutegetsi bw’Igihugu, Francis Kaboneka, yanenze cyane Leta yateguye ikanashyira mu bikorwa Jenoside yakorewe Abatutsi, n’abaturage bayigizemo uruhare, yibutsa ko kurwanya ikibi ari ishingano ya buri wese.

Ubu butumwa Minisitiri Kaboneka yabutangiye mu muhango wo kwibuka Abatutsi biciwe mu bitare bya Rutonde, wabereye ku rwibutso rwa Jenoside ruherereye mu bitare bya Rutonde mu murenge wa Kigabiro, mu karere ka Rwamagana.

Minisitiri Kaboneka yanenze bikomeye ubuyobozi bubi bwateguye Jenoside yakorewe Abatutsi bukanayishyira mu bikorwa, agaragaza ko bwirengagije inshingano ikomeye yo kurengera umuturage, kimwe n’uko abaturage bagize uruhare muri Jenoside na bo biyambuye inshingano ya buri wese, yo kurwanya ikibi aho kiva kikagera.

Yagize ati “Ni inshingano za Leta kurengera abaturage b’Abanyarwanda, ni n’inshangano zacu twese zo gushyigikira icyiza no kurwanya ikibi. Nasabaga abaturage bagifite ingengabitekerezo ya Jenoside kuyiyambura bitaba ibyo amategeko akazabakurikirana, kandi bazabihanirwa by’intangarugero.”

JPEG - 138.4 kb
Francis Kaboneka, Minisitiri w’Ubutegetsi bw’Igihugu

Mbihire Jean Baptiste, umwe mu barokotse Jenoside yakorewe Abatutsi warokokeye mu bitare bya Rutonde, yagaragaje ko mbere abaturage bo muri aka gace bari babanye neza, ariko nyuma bakaza kubihinduka, bakabahemukira.

Yagize ati “Mbere abaturage bose twari duhuje, turi bamwe, nyuma ni bwo baje gutoranyamo abantu babo bavuga ngo Abatutsi basigare, nyuma yaho ni bwo baje kutwica bifashishije intwaro gakondo, imbunda n’amagerenade.”

Umuyobozi w’Akarere ka Rwamagana, Mbonyumuvunyi Radjab, yavuze ko harimo gukorwa ibishoboka byose ngo abarokotse Jenoside yakorewe Abatutsi bakemurirwe bimwe mu bibazo bagifite, imibereho yabo irusheho kuba myiza.

Meya Mbonyumuvunyi yanashimye cyane ingabo zahoze ari iza FPR Inkotanyi zahagaritse Jenoside yakorewe Abatutsi, ndetse zikagira uruhare rukomeye mu kongera kubaka igihugu, no guteza imbere imibereho y’Abanyarwanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE