2017-12-12 14:14:08 clouds 27o High | Kigali Rwanda

Dukurikire:
 
 

Rubavu:Abahoze ari abayobozi barokoye abatutsi muri Jenoside bashimiwe

Yanditswe na IMVAHO NSHYA

Kuya 2017-04-15 11:00:57

 
Share on:
 
Yasuwe:1345
 
Yavuzweho:200
 
10
 
10

Ndabarinze Faustin wahoze ari Burugumesitiri w’icyahoze ari komini ya Mutura na Baributsa Juvenal wahoze ari Resiponsabure wa selile Hehu muri Segiteri ya Mutovu, akaba yari n’umuvugabutumwa, bashimiwe ku mugaragaro kubw’ibikorwa bakoze byo kurokora abatutsi bahigwaga mu gihe cya Jenoside yakorewe abatutsi.

Bamwe mu barokotse Jenoside yakorewe abatutsi bavuga ko Ndabarinze Faustin wari Burugumesitiri w’icyahoze ari komine Mutura, yishwe muri Jenoside yakorewe abatutsi mu 1994, bitewe nuko atigeze yifatanya n’ubutegetsi bwariho mu mugambi wo gushyira mu bikorwa Jenoside, ahubwo akagira uruhare mu kurokora bamwe.

Ubuyobozi bw’umuryango Inyenyeri uhuriweho n’abarokotse Jenoside yakorewe abatutsi ndetse n’abayigizemo uruhare mu rwego rwo kubaka ubumwe no kurwanya ko ibyabaye byasubira, uvuga ko bushimira na n’uwahoze ari Resiponsabule wa selile Hehu muri komini Mutura witwa Baributsa Juvenal warokoye abantu babiri, abakuye mu cyobo bari bajugunywemo, abakuramo abahungisha muri Repubulika Iharanira Demokarasi ya Congo.

JPEG - 55.9 kb
Umuryango wa Umutoni wari uhagarariye se warokoye abantu muri Jenoside washimiwe uhabwa inka

Umutoni Justine, umukobwa wa Ndabarinze wari Burugumesitiri wakiriye iryo shimwe ry’inka, yishimiye ko umubyeyi we ibikorwa yasize akoze bikizirikanwa.

Yagize ati «Ibi bitweretse ibyiza ababyeyi bacu basize bakoze, iyo bataza kugira neza natwe uko turi si ko tuba tukimeze, inyigisho bimpaye ni uko ngomba gukora neza kugira ngo n’abankomokaho ntibazagire ipfunwe.»

Baributasa Juvenal nawe washimiwe ku mugaragaro, ahabwa urupapuro (Certificat) y’ishimwe iherekejwe n’amafaranga ibihumbi 50,000, yavuze ko gutabara abantu babiri bari bajugunywe mu cyobo, yabishobojwe n’umutima wamuhatiraga kubatabara, by’umwihariko anabifashwa no kumenya Imana kuko icyo gihe yari umuvugabutumwa.

Yagize ati «Inkuru y’abo narokoye nayimenye mvuye muri nibature, mbwirwa ko baroshye abakobwa mu buvumo kandi n’imbwa yasaze ari mo bayirohaga, nahise ntabara mpageze mbona umwe asa n’utitira ndavuga ngo reka mbarokore, narabafashe ngenda mbacikisha mbajyana muri Congo.Nishimiye iri shimwe mpawe ariko agaciro ni uko nabahungishije bakaba bararokotse. »

Mudenge Boniface, umuyobozi w’umuryango Inyenyeri, avuga ko kugenera ishimwe aba bagize uruhare mu kurokora ubuzima bwabo ari urugero rwiza ku bakiri bato.

Yagize ati «Ubu turatoza abana bacu kumenya ko ishuri ry’ibyiza ritarangira, hari uguharanira ibyiza kuko aba babaye abayobozi beza bakitandukanya n’ubuyobozi bubi, bazigirweho baraturokoye kandi abakiri bato bakwiye kubyigiraho.»

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE