2017-11-23 07:40:03 clouds 27o High | Kigali Rwanda

Dukurikire:
 
 

Perezida Kagame yakiriye abambasaderi bashya babiri

Yanditswe na IMVAHO NSHYA

Kuya 2017-04-14 07:41:06

 
Share on:
 
Yasuwe:186
 
Yavuzweho:200
 
10
 
10

Ambasaderi w’u Buhinde, Ravi Shankar n’uw’u Bushinwa Rao Hongwei bashyikiriye Perezida wa Repubulika Paul Kagame impapuro zibemerera guhagararira ibihugu byabo mu Rwanda.

Nyuma yo guhura na Perezida Kagame, ambasaderi Shankar, yabwiye itangazamakuru ko baganiriye ku mubano mwiza ugaragara hagati y’ibihugu byombi, ndetse akaba afite intego yo kurushaho kuwuteza imbere.

Ati”Twaganiriye ku mubano n’ubufatanye hagati y’u Rwanda n’u Buhinde, nzashyira ingufu mu gutsura uwo mubano cyane cyane mu mishinga irebana n’ibikorwa remezo.”

JPEG - 43.3 kb
Perezida Kagame yakira ambasaderi w’u Buhinde mu Rwanda Ravi Shankar

Amb. Shankar, usanzwe afite icyicaro i Kampala muri Uganda, yongeyeho ko u Rwanda n’u Buhinde bizakomeza gufatanya mu burezi no mu buvuzi aho mu minsi iri imbere Abanyarwanda batazajya bagomba kujya kwivuriza mu Buhinde kuko amavuriro akomeye yaho azatangira gukorera mu Rwanda.

Amb. Rao Hongwei nawe yavuze ko yaganiriye na Perezida Kagame ku bufatanye hagati y’u Bushinwa n’u Rwanda kandi ko yiyemeje kuzarushaho kubuteza imbere.

U Bushinwa n’u Rwanda bisanzwe bifatanya mu nzego zitandukanye zirimo ibikorwa remezo, uburezi, ishoramari, ubucuruzi n’ibindi.

Perezida Kagame aheruka mu Bushinwa mu kwezi gushize aho yaganiriye na Xi Jinping uyobora icyo gihugu, bakemeranya guteza imbere imishinga igamije imibereho myiza y’abaturage.

Muri iyo mishinga harimo guteza imbere agace kahariwe inganda mu karere ka Musanze no kureshya abashoramari b’Abashinwa ku isoko ry’u Rwanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE