2017-12-12 14:14:08 clouds 27o High | Kigali Rwanda

Dukurikire:
 
 

Abanyapolitiki bazize Jenoside bafitanye igihango n’Abanyarwanda - Hon. Makuza

Yanditswe na IMVAHO NSHYA

Kuya 2017-04-13 14:31:55

 
Share on:
 
Yasuwe:348
 
Yavuzweho:200
 
10
 
10

Perezida wa Sena, Bernard Makuza, yemeza ko kwibuka abanyapolitike bishwe muri Jenoside yakorewe Abatutsi mu 1994 bifite agaciro kanini, kuko bagiranye igihango n’abanyarwanda ubwo batangaga ubuzima bwabo.

Ubwo yari ku rwibutso rwa Rebero mu mujyi wa Kigali, Hon Makuza yasoje icyumweru cyahariwe kwibuka ku nshuro ya 23 Jenoside yakorewe Abatutsi mu 1994, yibutsa buri wese ko guha icyubahiro abanyapolitiki ari ingenzi kuko batanze urugero rwiza rwo kwitandukanya n’ikibi.

Ati “Twebwe nk’abanyapolitiki twaje kunamira no guha agaciro n’icyubahiro abatubereye urugero rwiza rwo kwitandukanye n’ikibi. Kubibuka biduha intego n’indangagaciro bikwiye kuranga umunyapolitiki wese ugomba guharanira no gushyira imbere inyungu n’imibereho myiza n’icyateza imbere buri wese nta vangura.”

JPEG - 260.4 kb
Perezida wa Sena Makuza Bernard ubanza ibumoso, Dr Bizimana umunyamabanga nshingwabikorwa wa CNLG hagati na Dr Dusingizemungu perezida wa IBUKA

Yakomeje avuga ko kuzirikana aba banyapolitiki byibutsa icurwa ry’ingengabitekerezo ya Jenoside n’itegurwa ry’umugambi n’ishyirwa mu bikorwa ryayo.

Yagize ati “Ukuri ni uko Jenoside atari impanuka kuko yateguwe imyaka myinshi, higishwa amacakubiri guhera mu gihe cy’ubukoroni, abanyarwanda bacibwamo ibice. Ubutegetsi bwa Repubulika bwimakaje imiyoborere mibi, irondakoko, irondakarere n’umuco wo kudahana, jenoside ishakirwa ibyangombwa byose, irageragezwe mu bice bitandukanye kugeza igihe umugambo ushyizwe mu bikorwa n’ubuyobozi bubi.”

Yanagarutse ku kibazo cya CPL Karamaga Thadee wahoze mu ngabo za FAR ashinzwe gushyingura abasirikare, akaza gucumbikira abatutsi akanabahungana kugera muri Congo, ndetse agahisha umurambo wa Agathe Uwiringiyimana, none ubu akaba akomeje guterwa ubwoba; amubwira ko nta numwe uzagira icyo amukoraho.

Bamwe mu byanyapolitiki bazize Jenoside bibutswe kuri uyu wa 13 Mata ni Joseph Kavaruganda wari perezida w’urukiko rushinzwe itegeko nshinga, Landouard Ndasingwa, Kabageni Venantie, Charles Kayiranga, Jean de la Croix Rutaremara, Augustin Rwayitare, Aloys Niyoyita n’abandi benshi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE