2017-10-17 06:58:11 clouds 27o High | Kigali Rwanda

Dukurikire:
 
 

Ikoranabuhanga rifashe Abanyarwanda kunyomoza abapfobya Jenoside - Guverineri Musabyimana

Yanditswe na IMVAHO NSHYA

Kuya 2017-04-13 11:12:24

 
Share on:
 
Yasuwe:162
 
Yavuzweho:200
 
10
 
10

Guverineri w’Intara y’Amajyaruguru Musabyimana Jean Claude, yasabye urubyiruko rw’abanyeshuri biga mu ishuri rikuru ry’ikoranabuhanga rya Tumba (TCT) kwifashisha ikoranabuhanga banyomoza abahakana bakanapfobya Jenoside yakorewe Abatutsi.

Mu muhango wo kwibuka abazize Jenoside yakorewe abatutsi wabereye muri iri shuri, Guverineri Musabyimana yagarutse ku kibazo cy’ingengabitekerezo ya Jenoside ikwirakwizwa hifashishijwe imbuga nkoranyambaga, asaba abiga muri iri shuri kubanyomoza bakoresheje izo mbuga, kuko ababikora batabarusha ikoranabuhanga.

Yagize ati “Urubyiruko rwahagaritse Jenoside rwari rufite imyaka nk’iyanyu, mugomba kwamagana abagifite ivangura n’ingengabitekerezo ya Jenoside muri sosiyete nyarwanda, abahakana n’abapfobya Jenoside ntacyo babarusha, ntibabarusha ubwenge n’ubuhanga, ahubwo mugomba kubarwanya mubinyujije mu mbuga nkoranyambaga”.

Yakomeje agira ati “Iki kigo cya Tumba College of Technology cyigisha ikoranabuhanga, mukwiriye kugira uruhare mu gukwirakwiza ubutumwa bwiza mukerekana ibyiza igihugu kimaze kugeraho, mugomba kwamagana ingengabitekerezo ya Jenoside yabibwe n’abakoloni bigatuma abanyarwanda barenga miliyoni bicwa urw’agashinyaguro”.

Ubu butumwa kandi bwagarutsweho n’umuyobozi w’iri shuri Eng Gatabazi Pascal wagize ati “Tumenyekanishe ibyiza twagezeho n’abandi babimenye ko ari byiza, kuba tuzi ko igihugu cyacu gikataje mu iterambere, mu bumwe bw’abanyarwanda ari na bwo musingi w’iterambere ryacu, ntabwo bihagije tutabimenyekanshije….Tugomba gutoza urubyiruko kwandika ibyiza ku gihugu cyacu, kugira ngo tunyomoze ikinyoma kitazagira uwo gifatirana, akagira ngo ni ukuri”.

Mutabazi Alexis, Umuyobozi w’umuryango w’abanyeshuri barokotse Jenoside yakorewe Abatutsi muri iki kigo AERG/Imenagitero, yavuze ko biyemeje kurwanya ingengabitekerezo ya Jenoside, barwanya abashaka kuyikwirakwiza.

Yagizen ati “Nk’urubyiruko tugiye gukoresha interineti kugira ngo dusenye abahakana n’abapfobya Jenoside, kuko mu gihe tutabikoze bishobora gusenya igihugu, twafashe ingamba zo kwandika ku mbuga nkoranyambaga twerekana ibyiza igihugu cyacu kimaze kugeraho”.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE