2017-12-11 14:03:29 clouds 27o High | Kigali Rwanda

Dukurikire:
 
 

Rusizi:Uwarokotse Jenoside ahohotewe inshuro 6 zikurikiranya

Yanditswe na IMVAHO NSHYA

Kuya 2017-04-11 13:12:23

 
Share on:
 
Yasuwe:1147
 
Yavuzweho:200
 
10
 
10

Uwizeyimana Bernadette w’imyaka 32 warokotse Jenoside yakorewe abatutsi, arwariye mu kigo nderabuzima cya Kiyisilamu cya Bugarama, mu murenge wa Bugarama, nyuma yo gukomeretswa n’umuntu avuga ko atabashije kumenya.

Uyu mubyeyi avuga ko iyi ari inshuro ya 6 yikurikiranya ahohoterwa kandi bikaba mu gihe cyo kwibuka Jenoside yakorewe abatutsi, agasaba ubuyobozi ko bwamwimura aho atuye kuko ngo nta mutekano ahafite.

Mu kiganiro yagiranye n’Imvaho Nshya aho arwariye muri iki kigo nderabuzima, Uwizeyimana yavuze ko kuwa mbere mu ma saa moya z’igitondo yari agiye mu murima gushaka ibyo abana barya, akanyura inzira igana mu mudugudu wa Nyehonga, akagari ka Ryankana aho asanzwe ahinga, akahahurira n’umuntu yabonaga yambaye imyenda ya gisirikari akamupfukamisha akamuhondagura imigeri mu mugongo no mu nda akanamukomeretsa mu gahanga.

JPEG - 305.8 kb
Uwizeyimana Bernadette avuga ko atumva impamvu akomeza guhohoterwa atya (Foto Bahuwiyongera S)

Avuga ko uwo muntu yari afite imbunda n’icyombo yavuganiragaho n’abantu atumvaga neza ibyo bavuga, amaze kumukomeretsa gutyo ahita yiruka, undi mu kuvuza induru ni bwo ngo yaje gutabarwa n’umugore w’umuturanyi wamujyanye mu rugo rw’umugabo utuye hafi aho bagafatanyiriza hamwe kumujyana ku kigo nderabuzima, aho avuga ko yaviriranaga cyane.

Yagize ati “Nazindutse saa moya z’igitondo njya gushaka amateke ntekera abana mu murima wo mu mudugudu wa Nyehonga, mu kagari ka Ryankana, igihe nzamutse mu kayira kagana mu murima mbona umusore mugufi wambaye gisirikare yegamiye kawa zari munsi y’akayira, ndamusuhuza anyikiriza atabishaka, nkomeje gato mbona arankurikiye atangira kumbaza amazina y’abishwe muri Jenoside yakorewe Abatutsi n’ay’abayirokotse n’ababyeyi banjye barimo, mubwira ko ntabazi, ni ko kumfukamisha atangira kumpondagura abanje kunshyira ibuye mu kanwa.”

Yakomeje agira ati “Yabanje kunkubita umugeri wo mu mugongo, ankubita uwo mu nda, ahita ankubita ikintu mu gahanga ntamenye icyo ari cyo amaraso atangira kuvirirana, ariruka ari bwo n’abantu bahise batabara, banzana kuri iki kigo nderabuzima.”

Yemeza ko ihohoterwa yakorewe rijyanye n’ingengabitekerezo ya Jenoside kuko iyi ari inshuro ya 6 agirirwa nabi gutya,akababazwa n’uko aba bashaka kumwica badafatwa kugeza ubu.

Yagize ati “Kuva muri 2012 buri mwaka mu gihe cyo kwibuka ndahohoterwa.Muri 2012 bantegeye ku kibuga cy’umupira ntashye mvuye gucuruza barampondagura bansiga ndi intere njyanwa kwa muganga ntarashiramo umwuka.

2013 kuwa 8 Mata ngiye hanze gato, ngize ngo nsubire mu nzu umuntu araza amfuka igitambaro mu maso na bwo barampondagura kugeza ubwo ntabawe ngiye gushiramo umwuka na bwo ababikora barabura.2014 bansanga mu nzu na bwo barampondagura baranansahura.

2015 bamenaguriraho amadirishya bankomeretsa ndyamye nijoro, umwaka ushize bwo banyandikira ibaruwa ko icyunamo kitarangira ntishwe icyakora ubuyobozi bundindira umutekano mu buryo budasanzwe none dore uko bangize uyu mwaka buri gihe mu gihe cyo kwibuka, ngasaba ko nakwimurwa nkava ino batarahanyicira.”

Umuyobozi w’aka karere, Harelimana Frédéric yagize ati “Turacyabikurikirana ngo turebe uko byagenze, tukaba tutahita twemeza ko ari ingengabitekerezo ya Jenoside, abo twabishinze icyo batubwira tuzakibatangariza.”

Hagati aho abo mu muryango w’uyu Uwizeyimana bakomeje kwibaza impamvu ari we uhura n’ibi bibazo wenyine mu gihe cyo kwibuka, bagasanga akwiye kurindirwa umutekano mu buryo budasanzwe cyangwa akahimurwa.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE