2017-10-18 07:01:40 clouds 27o High | Kigali Rwanda

Dukurikire:
 
 

Kayonza:Biyemeje kurwanya ingengabitekerezo ya Jenoside

Yanditswe na IMVAHO NSHYA

Kuya 2017-04-08 11:54:36

 
Share on:
 
Yasuwe:213
 
Yavuzweho:200
 
10
 
10

Abayoboke b’ishyaka rya PSD mu karere ka Kayonza, biyemeje kurwanya ingengabitekerezo ya Jenoside aho iva ikagera, kuko ngo bamaze gusobanukirwa ububi bwayo ndetse bakamenya ko gahunda ya Ndi umunyarwanda yabafasha kurandura ingengabitekerezo n’imizi yayo.

Abayoboke b’iri shyaka riharanira imibereho myiza na demokarasi, bemeza ko gahunda ya Ndi umunyarwanda yabafashije gusobanukirwa n’amateka y’igihugu cy’u Rwanda, bafata ingamba zo gukumira icyatuma Jenoside yongera kuba mu Rwanda.

Nzanyurwa Jean Paul, umwe mu bayoboke b’ishyaka PSD yagize ati “Twe abari mu mitwe ya politiki hari ideni dufitiye abanyarwanda n’igihugu, ni uguhindura aho turi kandi tukahahindura neza, guhindura abanyarwanda bagifite imyumvure iri hasi, ibi kandi tugomba kubikora tutarebeye ku banyarwanda duhuriye mu mitwe ya politiki imwe gusa.

Umunyarwanda agaterwa ishema no kuba ari mu gihugu cye kandi akagira uruhare mu kucyubaka, Jenoside yabaye yatweretse ko gusenya ubumwe bw’abanyarwanda bishoboka ari twe twabigizemo uruhare, kubaka ubumwe bwabo no kubusigasira na byo bikeneye imbaraga nyinshi zirusha iz’abashenye bakoresheje kandi twe icyiza ni uko tuvuga ibintu bifatika, ubumwe bw’abanyarwanda amajyambere umutekano ibi byose twagejejweho na leta yacu ntabwo bikwiye gusubira inyuma.”

Mukankwaya Beathe nawe yagize ati “Ndi umunyarwanda ni gahunda ikangura buri wese, imwereka ko nta kindi afite nk’u Rwanda, niyo mpamvu gukorera igihugu cyacu bisaba imbaraga nyinshi kurwanya abakidutekereza mu bitekerezo bishaje, ingengabitekerezo ya Jenoside kugira ngo uyirwanye neza uhereye mu mizi ni uko usobanukirwa na gahunda ya Ndi umunyarwanda.

Iyi gahunda yampaye gukunda igihugu cyanjye no kukishimira nkubahiriza gahunda za Leta, nkima amatwi ushaka kudusubiza aho twavuye.”

Umuyobozi w’ishyaka PSD mu ntara y’Uburasirazuba Dukuzumuremyi Francois, yemeza ko kwibuka Jenoside yakorewe abatutsi mu 1994 ku nshuro ya 23 bibaha imbaraga zo kubaka ubunyarwanda butajegajega, ku buryo uwashaka aho amenera aza kwigisha amacakubiri mu banyarwanda atabona aho ahera.

Yemeza kandi ko gahunda ya Ndi umunyarwanda yaje gusubiza ibibazo by’amateka mabi u Rwanda rwaciyemo harimo na Jenoside yakorewe abatutsi mu 1994.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE