2017-12-13 09:46:30 clouds 27o High | Kigali Rwanda

Dukurikire:
 
 

Karongi: Imibiri 45 y’abazize Jenoside igiye gushyingurwa mu cyubahiro

Yanditswe na IMVAHO NSHYA

Kuya 2017-04-07 11:57:50

 
Share on:
 
Yasuwe:337
 
Yavuzweho:200
 
10
 
10

Ubuyobozi bw’akarere ka Karongi buravuga ko muri iki gihe cyo kwibuka ku nshuro ya 23 Jenoside yakorewe abatutsi, hazashyingurwa mu cyubahiro imibiri 45 y’abazize Jenoside, yabonetse mu mirenge itandukanye y’aka karere, ikazashyingurwa mu rwibutso rwa Gashari na Bisesero.

Umuhuzabikorwa wa komosiyo y’igihugu yo kurwanya Jenoside mu karere ka Karongi na Rutsiro Mutabazi Moise, avuga ko mu kwibuka ku nshuro ya 23 Jenoside yakorewe abatutsi, hazashyingurwa imibiri 45 yabonetse bwa mbere.

Yagize ati “Imibiri imaze kuboneka kugeza ubu ni 45, nibwo igiye gushyingurwa mu cyubahiro bwa mbere kuko yavuye mu mirenge itandukanye.”

JPEG - 405.1 kb
Imibiri 45 y’abazize Jenoside izashyingurwa mu karere ka Karongi muri iki gihe cyo Kwibuka(Foto Vestine D).

Yagaragaje ko iyi mibiri yabonetse mu mirenge ya Rubengera, Gitesi, Bwishura, Mubuga, Gishyita,Twumba na Mutuntu, bikaba biteganyijwe ko tariki ya 26 Mata 2017 hakaba hari imibiri izashyingurwa mu rwibutso rwa Birambo, tariki ya 27 Kamena 2017 indi ishyingurwe mu rwibutso rwa Bisesero.

Umuyobozi w’akarere ka Karongi wungirije ushinzwe imibereho myiza mu karere ka Karongi, Mukashema Drocella, agaragaza uko imyiteguro y’icyunamo ihagaze, yasabye urubyiruko kuzitabira gahunda zo kwibuka zateguwe mu midugudu iwabo.

Yagize ati “Turi gukomeza gutegura abaturage bakazitabira ibiganiro mu cyumweru cy’icyunamo, n’ibindi bikorwa byo kwibuka mu minsi 100, agaseke gakoreshwa mu kuremera abarokotse Jenoside kakuweho kubera ko hajya haboneka amagambo mabi agaherekeza, turi gutegura imibiri izashyingurwa mu cyubahiro, gushishikariza ibigo kwibuka, gutanga amakuru mu gihe cyo kwibuka, dukomeje gukora inyingo yo kubaka urwibutso rwa Gatwaro n’ibindi.”

Gahunda yo kwibuka yatangiye kuri uyu wa 7 Mata 2017, ibera mu midugudu yose, by’umwihariko akarere ka Karongi kakaba karahisemo gutangiriza ibikorwa byo kwibuka mu murenge wa Gitesi.

Kuri uyu mugoroba w’itariki 7 Mata haraba igikorwa cyo gusura, guhumuriza no kuremera abarokotse Jenoside yakorewe abatutsi.

Nk’uko ku rwego rw’igihugu hazacanwa urumuri rw’icyizere, no mu turere hose ruzahacanwa, mu karere ka Karongi ruzacanirwa mu murenge wa Gashari na Bwishyura nk’uko ubuyobozi bw’akarere bwabitangaje.

Mutangana Frederic, Perezida wa njyanama y’akarere, asaba abaturage gukomeza kurwanya ingengabitekerezo ya Jenoside, gushyigikira ibyagezweho no gufata mu mugongo abarokotse Jenoside yakorewe abatutsi, birinda amagambo yabakomeretsa.

Kwibuka Jenoside yakorewe abatutsi ku nshuro ya 23 bizakorwa hagendewe ku nsanganyamatsiko igira iti “Twibuke Jenoside yakorewe abatutsi, turwanya ingengabitekerezo ya Jenoside, dushyigikire ibyiza twagezeho.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE