2017-12-13 06:59:31 clouds 27o High | Kigali Rwanda

Dukurikire:
 
 

Uwayezu Jean Thierry afite inzozi zo kwagura muzika nyarwanda

Yanditswe na IMVAHO NSHYA

Kuya 2017-04-05 20:42:00

 
Share on:
 
Yasuwe:547
 
Yavuzweho:200
 
10
 
10

Umuhanzi w’umunyarwanda Uwayezu Jean Thierry, aravuga ko afite inzozi zo kwagura umuziki nyarwanda ukagera ku rwego mpuzamahanga, akaba ari yo mpamvu yagiye gukarishya ubwenge mu bijyanye na muzika muri Afurika y’Epfo.

Uyu musore ukomoka mu karere ka Rubavu yiga mu ishuri ryitwa Film Television Production Entertainment, (AFDA), muri Africa y’Epfo, ishuri avomamo ubumenyi yizera ko buzagira uruhare rukomeye mu kurushaho guteza imbere muzika nyarwanda, ikagera ku rwego mpuzamahanga.

Mu kiganiro yagiranye n’Imvaho Nshya, Uwayezu yasobanuye ko impano ye muri muzika yigaragaje akiri muto, kuko yarangije amashuri yisumbuye muri 2012 amaze gukora alubumu y’indirimbo zihimbaza Imana, ari nazo yatangiriyeho.

Nyuma gato ngo yaje kwagura inganzo ye, aririmba n’indirimbo zisanzwe agamije kwagura ubutumwa atanga mu ndirimbo ze nk’uko bamwe mu bafana be babimusabaga.

JPEG - 84.9 kb
Uwayezu Jean Thierry wiga gutunganya umuziki muri Afurika y’Epfo

Uwayezu ahamya ko yasanze nta yindi nzira yamufasha gukabya inzozi ze zo kwagura muzika nyarwanda ku rwego mpuzamahanga itari ukujya kwihugura mu gukora muzika igezweho by’umwihariko mu gutunganya amashusho y’indirimbo, mu gihugu gifite amashuri ateye imbere mu bya muzika n’ibijyanye na byo.

Yagize ati “Muri Afurika y’Epfo nahaje mu rwego rwo guteza imbere umwuga wanjye w’ubuhanzi.Nahaje ngamije kwagura umuziki nyarwanda no kongeramo ubundi bumenyi nyafurika, aho biri ngombwa.”

Yakomeje agira ati “Biranashoboka ko twanafatanya n’abanyamahanga mu bihangano byimakaza urukundo, duhereye muri Afurika.Ibi byose birasaba kwiga no gukora cyane.”

Uwayezu avuga ko n’ubwo arimo gukarishya ubwenge muri muzika, bitamubuza gukomeza gukora indirimbo, ubu iheruka ikaba ari iyitwa “Ni Wowe”, yasohotse mu buryo bwa Audio na Video.

Mu mbogamizi uyu muhanzi agaragaza nk’izikizitiye abahanzi nyarwanda bakorera mu mahanga, ku isonga haza ikibazo cyo kumenyekanisha ibihangano byabo bikibagora cyane, ari naho ahera asaba ibitangazamakuru byo mu Rwanda kubashakira umwanya wihariye.

Yagize ati “Turacyafite imbogamizi yo kugeza ibihangano byacu ku maradiyo na televiziyo byo mu Rwanda, ku buryo twifuza ko bajya baduha umwanya wihariye, tukageza ibihangano byacu ku banyarwanda.”

Uwayezu Jean Thierry ubura imyaka 2 ngo arangize amasomo ye muri Afurika y’Epfo, yemeza ko muri gahunda ze za vuba apanga gukorera igitaramo mu Rwanda agashimisha abakunzi be.

Kanda hano wumve indirimbo ya Thierry yitwa Ni Wowe:

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE