2017-11-17 14:59:33 clouds 27o High | Kigali Rwanda

Dukurikire:
 
 

U Rwanda rugiye gufatanya na Congo mu gushakisha peteroli mu Kivu

Yanditswe na IMVAHO NSHYA

Kuya 2017-04-04 14:12:26

 
Share on:
 
Yasuwe:513
 
Yavuzweho:200
 
10
 
10

U Rwanda na Repubulika Iharanira Demokarasi ya Congo byasinye amasezerano yo gufatanya ubushakashatsi bwo gushakisha peteroli mu kiyaga cya Kivu, ibihugu byombi bihuriyeho.

Mu muhango wo gusinya aya masezerano wabereye mu karere ka Rubavu kuwa 4 Mata 2017, igihugu cy’u Rwanda cyari gihagarariwe na Minisitiri w’umutungo kamere Dr Vincent Biruta, mu gihe Congo yari ihagarariwe na Minisitiri w’ingufu zikomoka kuri peterori Prof Aime Ngoyi Mukena.

Minisitiri Dr Biruta yavuze ko aya masezerano agamije gushimangira ubushake bw’abakuru b’ibihugu byombi, bahuriye i Rubavu kuwa 12 Kanama 2016, mu biganiro byari bigamije guteza imbere no kubyaza umusaruro umutungo ibihugu byombi bihuriyeho.

Yagize ati “Gusinyana amasezerano ni ingenzi kuko bizatuma dukora ubushakashatsi tubuhuriyeho kuko n’ubundi ntawashaka mu kiyaga ngo ashakire ku ruhande rumwe, twe twari dufite aho tumaze kugera dushakisha ibijyanye na peteroli.

JPEG - 170.5 kb
Minisitiri Dr Vincent Biruta (wa mbere iburyo) na Minisitiri Prof Aime Ngoyi basinya amasezerano

Hari ibyakozwe n’ubwo igihugu cy’abaturanyi kitari cyakabitangiye, twiyemeje gusangira amakuru twamaze kubona ngo tugendere ku murongo umwe ugamije kumenya niba peterori iri mu kiyaga cya Kivu cyangwa itarimo.”

Minisitiri Dr Biruta yagaragaje ko kuba igihugu cya Congo cyemeye ko bafatanya ubushakashatsi, ari uko bagize icyizere bitewe n’imishinga igihugu cy’u Rwanda cyakoze bakabona ko hari ibishoboka.

Yagize ati “Igihugu cyacu ibyo kimaze kugeraho byatumye n’abandi bashaka ko dufatanya kuko twaberetse ko hari ibikorwa bifatika byakozwe hifashishijwe umutungo uri mu kiyaga duhuriyeho.

Kuba barabonye ko Gaze Metane yatangiye kubyarira igihugu ingufu n’ibindi byagiye bikorwa biraha icyizere impande zombi ko hari ibishoboka, tugiye gukora ubushakashatsi dufatanyije turebe ko harimo peterori tumenye aho iherereye kandi niboneka tuzanafatanya kuyicukura.”

Prof Aime Ngoyi Mukena, Minisitiri w’ingufu zikomoka kuri peterori muri Congo, yagize ati “Imana yaduhaye ikiyaga cya Kivu natwe tugomba gukoresha ubwenge bwacu mu kukibyaza umusaruro, tugiye gufatanya gushakisha peterori dukeka ko iri mu kiyaga, iki cyizere tugikura ku kuba igihugu cy’u Rwanda hari ibyo cyagerageje tukabona ko hari byinshi bishoboka.”

Yakomeje agira ati “Ibihugu byacu hari amasezerano byigeze gusinya hashize imyaka 45 nta cyakozwe, ubu rero igihe ni iki tukimara gushyira umukono kuri aya masezerano turahita dutangira gushyira mu bikorwa uyu mushinga, ntabwo tugiye kubishyira mu kabati.”

Biteganyijwe ko aya masezerano y’ubushakashatsi azamara imyaka 5 ishobora kongerwa.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE