2017-12-12 14:14:08 clouds 27o High | Kigali Rwanda

Dukurikire:
 
 

Muri Gare ya Rusizi abagore binubira gusangira ubwiherero n’abagabo

Yanditswe na IMVAHO NSHYA

Kuya 2017-04-04 10:45:43

 
Share on:
 
Yasuwe:416
 
Yavuzweho:200
 
10
 
10

Abagenzi bategera imodoka muri Gare ya Rusizi, abakozi bahakora, abashoferi, abahacururiza utuntu tunyuranye n’abandi bahagenda baravuga ko hashize umwaka wose abagore n’abagabo basangira ubwiherero, bakabibonamo ikibazo gikomeye.

Iki kibazo ngo giteye impungenge abakenera ubu bwiherero kuko ubundi ngo bwari bwubatse mu mpande 2 z’inzu imwe burimo, uruhande rw’iburyo ari urw’abagabo, urw’ibumoso ari urw’abagore buri ruhande rukajya mu bwiherero bwarwo nta kibazo.

Ngo mu ntangiriro z’umwaka ushize ni bwo ubw’abagore bwose bwafunzwe bavuga ngo bwarapfuye, ubuyobozi bwizeza ko bugiye gukorwa ariko na n’ubu nta kirakorwa.

JPEG - 249.9 kb
Abagore n’abagabo bahurira mu bwiherero bumwe (Foto Bahuwiyongera S)

Bavuga ko kwinjiramo ari amafaranga 100, abagore n’abagabo benshi bagenda iyi Gare bagahurira mu twumba 8 gusa turi mu bwiherero bw’abagabo, mu gihe nabo bari bafite utwabo 8 twapfuye tugafungwa, ugasanga bigaragara nabi, hakaba ngo n’abagaore batinya ko byababera intandaro yo gufatwa ku ngufu mu buryo bubatunguye n’abagabo bagenda bahuriramo,cyane cyane mu masaha y’umugoroba.

Nyiraneza Noella Imvaho Nshya yasanze muri iyi Gare yagize ati “Ni ikibazo rwose ubuyobozi bwari bukwiye gukemura kandi kimaze igihe.Nk’abagore tubona dushobora kuhandurira indwara nyinshi, ikindi ni uko kujyamo n’abagabo barimo usanga bigaragara nabi, kuko hari nk’igihe umugabo ajyamo atajyanywe no kwiherera ahubwo agiye gucunga umugore wagiyemo gusa, twe bikatubangamira, cyane cyane ko n’utwumba ari duto kandi twegeranye cyane.”

Beruye Mathieu na we yagize ati “Natwe abagabo n’abasore ntitwishimira kujya mu bwiherero bwa Gare ngo duhuriremo n’abagore gutya ariko twizeye ko ubuyobozi buzabikemura, cyane cyane ko bimaze igihe kirekire, kandi n’ubundi twari dusanzwe twinubira ko n’ubwiherero 8 gusa budahagije abagabo bose bagera hano.”

Umunyamabanga nshingwabikorwa w’aka karere Mushimiyimana Ephrem, avuga ko atari abizi, akavuga ko bigenze gutyo cyaba ari ikibazo gikomeye kandi cyumvikana, akavuga ariko ko barimo bashakisha rwiyemezamirimo ugomba gukora ibikorwa remezo byose by’akarere n’icyo kirimo, kigakemuka.

Yagize ati “Nanjye binteye kujya kureba uko iki kibazo cyifashe kuko ndumva abashinzwe gukurikirana iriya Gare umunsi ku munsi bataratubwiye ko ikibazo giteye gityo, ko ubwiherero bwageze aho bufungwa ariko tugiye kubyihutira, igisigaye ni ugusinyana na rwiyemezamirimo gusa agakurikirana ibikorwaremezo byose by’akarere bitarasanwa akabisana.

Mu minsi mike iri imbere ikibazo nk’iki ntikizongera kumvikana muri aka karere.”

Asaba abaturage kumenya ko ari uburenganzira bwabo kuvuga ibitameze neza bikwiye gukosorwa, akavuga ko nk’iki kibazo baba barakigaragaje hakiri kare, cyane cyane ko ari bo babukoresha, kikaba cyarakosowe mu byihutirwa bitagombye ko rwiyemezamirimo abifatanya n’ibindi bikorwa remezo by’akarere byangiritse.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE