2017-12-11 14:03:29 clouds 27o High | Kigali Rwanda

Dukurikire:
 
 

APR FC yongeye kubona amanota atatu

Yanditswe na IMVAHO NSHYA

Kuya 2017-04-04 05:44:01

 
Share on:
 
Yasuwe:292
 
Yavuzweho:200
 
10
 
10

Ikipe ya APR FC yitwaye neza ku mukino w’umunsi wa 22 itsinda ikipe Etincelles FC ibitego 2-0 bya Bigirimana Issa na Nsabimana Aimable ikomeza gufata umwanya wa kabiri n’amanota 44 inyuma ya Rayon Sports ifite amanota 52.

Uyu wari umukino wa 7 mu mikino yo kwishyura ikinnye. Mu mikino 6 yaherukaga iyi kipe yatsinzwemo umukino umwe inganya imikino 4 itsinda umwe.

Nyuma yo kubona amanota atatu, umutoza wa APR FC, Mulisa Jimmy yatangaje ko hari hamaze iminsi havugwa byinshi kuko batitwaraga neza kandi n’abakinnyi bari babizi.

Ati “Twaraganiriye kandi nishimiye ko ibyo nababwiye babikoze, nabasabye kongera kugira ishyaka kandi babigaragaje kuko nabo bashakaga kwigarurira icyizere imbere y’ abafana”.

JPEG - 192.1 kb
Bigirimana Issa wafashije APR FC kubona amanota 3 y’umunsi wa 22 wa shampiyona

Kugeza ubu ikipe ya Rayon Sports irarusha APR FC amanota 8 mu gihe ifite umukino w’umunsi wa 22 izakina n’Amagaju FC, umutoza Mulisa abajijwe niba agifite icyizere ku gikombe cya shampiyona yatangaje ko hakiri imikino myinshi.

Ati “Shampiyona ni nka marato tuzakomeza dukine turebe aho tuzasoreza”.

Yongeye kugaruka ku bafana bagiye bagaragaza kutamwishimira.

Ati “ Abafana bafite uburenganzira bwo kwerekana uko babyuma iyo ikipe ititwaye neza aho ariho hose bigenda gutya ariko iyo utsinze wigarurira icyizere ku bafana”.

Mu mikino 8 ikipe ya APR FC isigaje ngo shampiyona isozwe harimo uwa Police FC, AS Kigali ndetse na Rayon Sports iyoboye urutonde.

Shampiyona igiye gusubikwa kubera icyumweru cyo kwibuka Jenoside yakorewe Abatutsi ku nshuro ya 23 izasubukurwe nyuma taliki 15 Mata 2017, APR FC isura Sunrise FC i Nyagatare.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE