2017-12-12 14:14:08 clouds 27o High | Kigali Rwanda

Dukurikire:
 
 

Rusizi: Barashimira Perezida Kagame wabahaye umuhanda wa kaburimbo

Yanditswe na IMVAHO NSHYA

Kuya 2017-04-04 05:20:25

 
Share on:
 
Yasuwe:584
 
Yavuzweho:200
 
10
 
10

Abaturage bo mu murenge wa Bugarama, abagenda n’abacururiza muri santere y’ubucuruzi ya Bugarama mu karere ka Rusizi yitegura kuba umujyi mu minsi iri imbere, barashimira Perezida wa Repubulika Paul Kagame wabahaye kaburimbo ica muri iyi santere y’ubucuruzi rwagati.

Uyu muhanda ngo bawuhawe ubwo hubakwaga umuhanda Bugarama-Cimerwa, uyu muhanda ukaba wararushijeho gutuma iyi santere y’ubucuruzi igira isuku mu gihe mbere byari bigoranye kuyisukura.

Aba baturage bavuga ko mu myaka 3 ishize ngo kugenda muri iyi santere y’ubucuruzi uvuga ngo urahaha ikintu ugisangane isuku byari bikomeye kuko ibintu byinshi mu mpeshyi byabaga byuzuye ivumbi, mu gihe cy’imvura urwondo rukaba ari rwose, ndetse bikagera no mu maduka n’amaresitora make ahari no mu mazu y’abaturage, ku buryo abantu ngo binubiraga kuyagana.

JPEG - 185.1 kb
Basigaye bakorera ahasukuye kubera uyu muhanda wa Kaburimbo

Bavuga ko ariko ubwo Umukuru w’igihugu yabagendereraga ku wa 17 Mutarama 2013 bagahurira mu murenge wa Nyakabuye, yabemereye umuhanda wa Kaburimbo Bugarama–CIMERWA uhita ukorwa, ngo mu gihe gito wari urangiye, haza gukorwa n’agashami kawo gaca hagati muri iyi santere y’ubucuruzi katezagamo umwanda, ubu bakaba bameze neza.

Mukasine Drocella uhacururiza yabwiye Imvaho Nshya ko ubu acuruza ibisukuye yanabiha abakiliya be bakanezerwa, mu gihe mbere wasangaga isuku igoranye, akabona ubwo bagiye no kugira iyi santere y’ubucuruzi umujyi umunezero ugiye kurushaho kwiyongera.

Yagize ati “Abacururiza muri iyi santere y’ubucuruzi turanezerewe cyane rwose kuko ubu umuntu aza gucuruza yambaye umwenda wera agataha acyera de, mu gihe mbere utashoboraga kuza wambaye umweru, haba mu zuba cyangwa mu mvura, ariko kano gahanda kaciyemo gashamikiraho uriya wa Bugarama-CIMERWA karahasukuye cyane, kikaba ari kimwe mu byo abanyabugarama dushima Perezida wacu, none agiye no kuhagira umujyi, umunezero ni wose.”

Umumotari uhakorera na we yagize ati “ Washyiraga umugenzi kuri moto nk’igihe cy’imvura imodoka zikamutera icyondo ukumva urababaye yaba ari nk’umunyekongo akaguseka cyane ngo nibe n’iwabo kaburimbo yabaye ibinogo ariko irahari tukumva tubabaye, ariko Perezida wacu yadukuye mu isoni ubu tumeze neza, turasukuye rwose.”

Bavuga ko bategereje ko igishushanyombonera cy’umujyi giherutse kwakirwa n’ubuyobozi bw’akarere gitangira gushyirwa mu bikorwa, bakizera ko bazabona n’indi mihanda ya kaburimbo, bakizeza kuzayifata neza no kuzayicungira umutekano, ngo ntizangirika bareba.

Umunyamabanga nshingwabikorwa w’uyu murenge wa Bugarama, Rukazambuga Gilbert, na we yunga mu ry’aba baturage, akavuga ko bishimishije cyane kubona umwanda wahabaga kaburimbo itarahagera warahavuye, akizeza gusigasira ibyagezweho.

Yagize ati “Birashimishije cyane uburyo Bugarama igenda itera imbere, uyu muhanda wagize uruhare mu kuduha isura nshya kandi natwe tuzakomeza gukora ibishoboka byose tuwifashishe tugera no ku bindi bikorwa byiza by’iterambere twifuza.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE