2017-10-16 07:05:01 clouds 27o High | Kigali Rwanda

Dukurikire:
 
 

Kigali: Perezida Kagame yafunguye Ikigo Nyafurika cy’Ubumenyi bw’Imibare

Yanditswe na IMVAHO NSHYA

Kuya 2017-04-03 11:03:25

 
Share on:
 
Yasuwe:398
 
Yavuzweho:200
 
10
 
10

Perezida w’u Rwanda, Paul Kagame yafunguye ku mugaragaro ikigo nyafurika cy’ubumenyi bw’imibare, AIMS gifite icyicaro mu Rwanda kuri uyu wa Gatatu, Mata 2017.

Iki kigo kizafasha abahanga b’Abanyafurika, kibubakemo ubushobozi bwo gukemura ibibazo birangwa kuri uyu mugabane no guhanga udushya tugamije iterambere.

Mu ijambo rya Perezida Kagame mu nama ya Next Einstein Forum, yavuze ko u Rwanda rwishimiye kubakwamo icyicaro, asobanura ko kiyongereye ku bindi bigo by’ubumenyi n’ikoranabuhanga bifite icyicaro mu Rwanda.

Ati “Ibyo bigo byose bifite intego yo guha amahirwe abahanga kurusha abandi muri Afurika, bakazamuka bitezweho gukemura ibibazo. Nta shoramari mu hazaza ha Afurika ryatanga umusaruro kurusha kurera no kongerera ubushobozi urubyiruko rwifitemo impano.”

Umukuru w’Igihugu yakomeje avuga ko kugira ngo umugabane wa Afurika uzagere ku mpinduka z’ubukungu n’imibereho myiza, bizayisaba kuzamura abaturage bafite ubushobozi, binyuze mu masomo y’ubumenyi , tekiniki n’udushya.

Ati “Kugira ngo Afurika igire uruhare mu bukungu bw’Isi, tugomba kubaka ubushobozi bukomeye bushingiye ku bumenyi n’ikoranabuhanga. Ubushobozi tuzubakira hano ku butaka bwa Afurika buzaba bugendanye n’ibibera kuri uyu mugabane bityo bushobore gukemura imbogamizi neza.”

Perezida Kagame kandi yagarutse ku ntego z’ikigo cya AIMS Rwanda, zirimo kongera umubare w’abanyeshuri b’imibare binyuze mu guhugura abarimu no kubaka ubufatanye hagati y’abahanga mu mibare n’inganda.

Binyuze muri AIMS kandi, u Rwanda ruzashinga itsinda ry’abanyamwuga n’abashakashatsi, rizayobora gahunda y’impinduka ku mugabane wa Afurika.

Yanongeyeho ko AIMS Rwanda izafatanya na Leta y’u Rwanda mu gushinga Ikigo cy’Ubushakashatsi mu Bugenge (Quantum Physics Research Center).

Inama ku Bumenyi bw’Imibare ku rwego mpuzamahanga iherutse kubera I Dakar muri Senegal muri Werurwe 2016. Itaha izabera I Kigali muri Werurwe 2018.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE