2017-10-17 06:58:11 clouds 27o High | Kigali Rwanda

Dukurikire:
 
 

Byinshi kuri Jonathan Boyer wazamuye umukino wo gusiganwa ku magare mu Rwanda

Yanditswe na IMVAHO NSHYA

Kuya 2017-04-02 12:57:47

 
Share on:
 
Yasuwe:374
 
Yavuzweho:200
 
10
 
10

Uyu munsi taliki 02 Mata 2017 ni bwo Jonathan Boyer wazamuye umukino wo gusiganwa ku magare mu Rwanda asubira iwabo muri Leta Zunze ubumwe z’Amerika nyuma y’imyaka 10 yari amaze mu Rwanda.

Jonathan Jock Boyer yageze mu Rwanda muri Gashyantare 2007 aho yari aje muri gahunda yo gushaka abakinnyi bafite impano mu mukino wo gusiganwa ku magare ariko akaba yari afite gahunda yo kumara amezi 3.

Mbere yo gusubira iwabo, Jonathan Boyer yagize byinshi atangariza Imvaho Nshya ku rugendo rwe mu guteza imbere umukino w’amagare mu Rwanda.

Jonathan Boyer ni muntu ki?

JPEG - 233.7 kb
Jonathan Boyer agiye gusubira iwabo ariko akazakomeza gufasha mu bikorwa byo guteza imbere umukino wo gusiganwa ku magare mu Rwand

Amazina ye ni Jonathan "Jacques" Boyer akaba azwi ku kazina ka Jock. Yavutse taliki 8 Ukwakira 1955 avukira Moab mu ntara ya Utah muri USA. Yabaye umukinnyi w’umukino wo gusiganwa ku magare mu muhanda “Road race” aho yabaye umukinnyi wabagize umwuga kuva mu 1977 kugeza mu 1987.

Jonathan Boyer yanditse amateka yo kuba ari we mukinnyi ukomoka muri Amerika witabiriye Tour de France, irushanwa rya mbere ku isi ku nshuro ya mbere hari mu 1981.

Uko Jonathan Boyer yaje mu Rwanda
Nk’uko yabitangarije Imvaho Nshya, yaje mu Rwanda muri Gashyantare 2017 aje kumara amezi 3 agasubira muri Amerika.

Ati “Naje mu Rwanda ngomba kumara amezi 3 aho narinje kureba ko haba hari abakinnyi bafite impano mu mukino wo gutwara igare nyuma naje kubabona mfata icyemezo cyo kuhaguma gusa ariko ntabwo natekerezaga ko namara imyaka 10”. Yakomeje avuga ko icyamuteye imbaraga ari ubufatanye bwiza yagiranye n’abayobozi.

Ati “ Abakinnyi narababonye ndetse dutangira no gukora amasiganwa nyuma Bayingana araza dutangira gukorana kugira ngo duteze imbere umukino wo gusiganwa ku magare”.

Uyu mutoza yatangiranye n’abakinnyi 6 barimo Niyonshuti Adrien ugikina, Byukusenge Nathan na Ruhumuriza Abraham bagaritse umwaka ushize. Hari kandi Ruvogera Abed, Uwimana Rafiki nabo bahagaritse na Nyandwi Uwase watandukanye n’uyu mutoza muri 2010.

Muri iyi myaka 10, u Rwanda rwatangije isiganwa mpuzamahanga muri 2009 “Tour du Rwanda 2009” rijya kuri gahunda y’impuzamashyirahamwe y’uyu mukino ku isi “UCI”. Kuva 2009 kugeza 2013 iri rushanwa ryegukanwaga n’abakinnyi bo hanze.
Muri 2009 mu magambo ye, umutoza Jonathan Boyer yatangaje ko arimo kubaka ikipe izitwara neza mu myaka iri imbere. Muri 2014, Tour du Rwanda ibaye ku nshuro ya 6 ni bwo, umukinnyi w’umunyarwanda, Ndayisenga Valens yegukanye Tour du Rwanda.

Boyer yarabyishimiye cyane atangaza ko ibyo yifuje kuva kera abigezeho. Uyu mwaka uyu mutoza ntabwo azawibagirwa kuko nibwo ikipe y’igihugu yavuye aho yitorezaga mu mujyi wa Musanze aho babaga mu nzu zisanzwe bajya kuba mu Kinigi ahantu hahoze hakorera sosiyete ikora imihanda “Sogea Satom”.

Aho yahise atangiza ikigo cy’imyitozo “Africa Rising Cycling Center” mu rwego rwo kuzamura imikino yo gusiganwa ku magare irimo gusiganwa mu muhanda, mu misozi mu byiciro byose yaba abakuru, ingimbi ndetse n’abakobwa.

Nyuma yo kwegukana Tour du Rwanda ku nshuro ya mbere, Perezida w’u Rwanda Paul Kagame yakiriye iyi kipe ndetse n’uyu mutoza maze abemerera kubagurira amagare ndetse n’aho babaga bakodesha asaba ko bahabwa anemera kujya atanga ibitunga ikipe mu gihe iri mu myitozo n’ibindi. Nyuma muri 2015, umunyarwanda, Nsengimana Jean Bosco nanone yongeye kwegukana Tour du Rwanda ndetse n’umwaka ushize wa 2016, Ndayisenga Valens arayeguka.

Umutoza Jonathan Boyer akaba yaratangarije Imvaho Nshya ko mu myaka 10 yaramaze mu Rwanda hari ibitaragenze neza ariko ko ibyo yabyibagiwe kubera ibyiza byinshi byagezweho mu mukino wo gusiganwa ku magare. Aha akaba yaragarutse mu mwaka wa 2012 ubwo Niyonshuti Adrien yabona itike yo kwitabira imikino Olempike ya 2012 mu gusiganwa mu misozi ari nabwo bwari ubwa mbere umukinnyi w’u Rwanda mu gusiganwa ku magare yitabiriye imikino Olempike.
Kuri ubu Jonathan Boyer yari umuyobozi w’ikigo cy’imyitozo cya Musanze ndetse akaba n’umuyobozi wa tekinike w’Ishyirahamwe ry’umukino wo gusiganwa ku magare mu Rwanda “FERWACY”.

Kuba agiye kuva mu Rwanda yabwiye Imvaho Nshya ko ntacyo bizahungabanya ahubwo ubu ari bwo agiye gukora cyane. Jonathan azakomeza kuba umuyobozi ahubwo hashizweho uzaba amwungirije ari we Mutabazi Richard uzajya akurikirana umunsi ku munsi imirimo y’iki kigo.

Jonathan Boyer yagize ati “Ngiye gutura muri Amerika ariko nzakomeza kuza mu Rwanda, icyo mpinduye ni aho kuba ariko nzakomeza gukorana na FERWACY na MINISPOC muri gahunda yo gukomeza guteza imbere umukino wo gusiganwa ku magare mu Rwanda nko guhugura abatoza , gushaka ibikoresho, kuzana amakipe yo hanze akaza gukorera imyitozo mu Rwanda ndetse no gufasha ikipe y’u Rwanda kwitabira amarushanwa atandukanye. Ubu nibwo ngiye kubona umwanya wo kubikora neza”.

Yavuze ko nta mpungenge kuri Mutabazi wabaye umuyobozi wungirije w’ikigo cy’imyitozo kuko bari bamaze iminsi bakorana kandi ko yarasanzwe amenyereye iby’umukino wo gusiganwa ku magare.

Hari byinshi uyu mugabo w’imyaka 61 yagejeho u Rwanda mu mukino wo gusiganwa ku magare birimo kuba rwarashyize isiganwa ku ngengabihe ya UCI, gufasha u Rwanda kwitabira amarushanwa akomeye ku isi arimo n’imikino Olempike (2012 na 2016). Hari kandi umudali wa zahabu u Rwanda rwegukanye mu mikino y’Afurika “All Africa Games 2015” no kwegukana Tour du Rwanda inshuro 3 zikurikiranya (2014, 2015 na 2016).

Mu bindi byagezweho ni uko hari abakinnyi benshi bagiye gukina nk’ababigize umwaga barimo Niyonshuti Adrien ukinira Dimension Data ikipe nkuru kuva 2009, Ndayisenga na Uwizeyimana nabo bakiniye iyi kipe (2015), Mugisha na Areruya bari muri iyi kipe y’abato. Hari kandi Hadi Janvier na Nsengimana Bosco nabo babaye mu ikipe ya Bike Aid yo mu Budage (2016).

Mu butumwa Jonathan Boyer yageneye abakunzi b’umukino w’amagare yagize ati “Ubu igare nibwo ritangiye iyi myaka 10 ishize kwari ugushyira ibintu ku murongo ubu ni umwanya wo gukomeza gutera imbere”.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE