2017-12-12 14:14:08 clouds 27o High | Kigali Rwanda

Dukurikire:
 
 

Icyo u Burundi bukurikiranye muri SADC gishobora kutazaboneka

Yanditswe na IMVAHO NSHYA

Kuya 2017-03-28 11:37:36

 
Share on:
 
Yasuwe:677
 
Yavuzweho:200
 
10
 
10

Mu muryango w’ubukungu w’ibihugu byo mu majyepfo ya Afurika (SADC) hamaze igihe hari ubusabe bw’ibihugu bibiri byifuza kuba abanyamuryango bashya ariko ubwo busabe ntibwangwe cyangwa ngo bwemerwe.

Ibyo bihugu bitegereje kwemererwa cyangwa ngo byangirwe kwinjira muri SADC, yari isanzwe ifite abanyamuryango 15, ni u Burundi n’ibirwa bya Comoros.

Amakuru asohoka mu bitangazamakuru bitandukanye agaragaza ko igihugu cya Comoros gifite amahirwe menshi yo kwemererwa kwinjira muri SADC kurusha u Burundi, kuko amateka mabi ya za kudeta zidashira muri icyo gihugu cya Comoros asa nk’atangiye kugenda afatwa nk’ibyahise.

Muri Kanama 2016 ikipe y’ubunyamabanga bukuru bwa SADC bwasuye u Burundi, bugaruka butanga raporo ivuga ko icyo gihugu gikwiye kubanza gukemura ibibazo byacyo mbere yo kuba cyakwemererwa kwinjira muri SADC.

JPEG - 44.7 kb
Perezida w’u Burundi, Pierre Nkurunziza

Nyuma ikibazo cy’ubusabe bw’u Burundi cyaje gushyirwa mu rwego rugizwe na ba Minisitiri b’ububanyi n’amahanga narwo rwanzura ko icyo gihugu kitaritegura bihagije mu kwakirwa muri SADC.

Nyuma muri Gashyantare 2017, Perezida Jacob Zuma wa Afurika y’Epfo yatangaje ko ubusabe bw’u Burundi bwari gusuzumirwa mu nama idasanzwe y’abakuru b’ibihugu na za guverinoma yari iteganyijwe kubera muri i Mbabane muri Swaziland tariki 18 Werurwe 2017. Iyo nama yarateranye ariko ikibazo cy’u Burundi ntikigera kigwaho.

Impamvu zituma SADC idashishikajwe no kwakira u Burundi mu muryango ntabwo zisobanutse nk’uko n’izituma icyo gihugu gishishikajwe cyane no kwinjira muri SADC usanga nazo zidasobanutse.

Amategeko agenga SADC ( South African Development Community) ateganya ko kugira ngo igihugu cyemererwe kuba umunyamuryango, kigomba kuba kigendera ku mahame ya Demokarasi kikanagira n’ubutegetsi burangwa no kubahiriza amategeko. Kuva igihugu cy’u Burundi cyajya mu ntambara muri Gicurasi 2015, henshi gifatwa nk’igihugu gifite ubutegetsi butubahiriza ibyo bisabwa na SADC.

Kuva imvururu zatangira mu Burundi abantu bagera ku bihumbi 400 bahunze igihugu, benshi muri bo bakaba babarizwa mu nkambi z’impunzi muri Tanzania, mu Rwanda no muri Congo (DRC). Bamwe muri SADC babona ko kwakira u Burundi mu muryango byaba binavuze kwishyiraho umuzigo w’izo mpunzi, cyane ko n’ishami rizishinzwe ku isi (UNHCR) riherutse gutangaza ko abantu benshi bagikomeza guhunga ubutegetsi bwa Petero Nkurunziza.

Ku ruhande rumwe umuntu ashishoje yasanga u Burundi butemerewe kwinjira muri SADC ngo ni uko butegetswe nabi kaba ari akarengane kuko no mu bisanzwe muri SADC harimo ibifite za leta zesa umuhigo mu kugira ubutegetsi butagendera ku mategeko. Urugero rwa hafi ni nka Zimbabwe, DRC na Swaziland.

Aha ariko hari ibintu bibiri bitakwirengagizwa. Icya mbere n’uko ibihugu bya Zimbabwe, DRC na Swaziland bisanzwe muri SADC. Kwihanganira amafuti y’umunyamuryango biroroshye kurusha kwinjiza undi umeze nkawe.

Icya kabiri n’uko n’ubwo ubutegetsi muri Zimbabwe, DRC na Swaziland bwaba bwitwara nabi, ariko nta maraso ameneka nk’uko bimeze mu Burundi. Nta n’umubare munini w’abantu urahunga ubutegetsi bw’ibyo bihugu bitatu byo muri SADC ngo ujye kuba mu nkambi z’impunzi mu bihugu bituranyi nk’uko bimeze ku Burundi.

DRC ariko ishobora kuba urugero rwiza umuntu yaheraho yibaza impamvu SADC itinza cyangwa igamije kwangira u Burundi kwinjira muri uwo muryango. Perezida Joseph Kabila afite ibibazo biteye nk’ibya Perezida Nkurunziza n’ubwo muri DRC bitarateza imvururu zifite ubukana nk’izakomeje kuranga u Burundi kuva muri 2015.

Imvururu mu Burundi zatejwe n’icyemezo cya Nkurunziza cyo gushaka kwiyamamariza manda ya gatatu, binyuranijwe n’itegeko nshinga kimwe n’amasezerano ya Arusha. Nkurunziza ubu arategeka manda ya gatatu, nyuma y’amatora yakozwe kandi igihugu kiri mu ntambara.

Kabila nawe yagerageje kwiyamamariza manda ya gatatu naho imvururu ziratangira, cyane muri Kinshasa na Katanga, ibyo gushaka kwiyamamaza arabireka imvururu zirahosha. Kabila warangije manda yagombaga kuba iya nyuma mu mpera z’umwaka ushize, ubu ari mu gisa nka manda ya gatatu hatarabayeho nibura n’amatora yo mu buriganya.

Ariko mu gihe Nkurunziza arimo ategeka manda ya gatatu ku gitugu, Kabila we arayitegeka nyuma y’ubwumvikane n’abatavuga rumwe n’ubutegetsi bwe, cyane abibumbiye muri Rassemblement ihuriza hamwe amashyaka akomeye muri opozisiyo ya DRC. Nk’uko bimeze muri DRC, ubutegetsi mu Burundi buri mu mishyikirano n’abatavuga rumwe nabwo.

DRC nk’umunyamuryango usanzwe ntacyo SADC iyibwiriza kuba yakora muri iyo mishyikirano nk’uko ihatira leta y’u Burundi kubanza kurangiza imishyikirano n’abatavuga rumwe nayo, cyane abo mu mashyaka yibumbiye muri CNARED.

Ubutegetsi bwa Nkurunziza bwo ibyo gushyikirana n’abo muri CNARED ntabwo burabikozwa kuko bushinja benshi mu bayobozi bayo kuba baragize uruhare muri ya kudeta yapfubye muri Gicurasi 2015, ahubwo bugasaba ko aho bagaragara hose bafatwa bagafungwa.

Hagati y’itariki 16 na 18 Gshyantare 2017, abatavuga rumwe mu bibazo by’u Burundi bahuriye Arusha ku butumire bw’umuhuza, Benjamin Mkapa, ariko Bujumbura itangaza mbere y’igihe y’uko itari kwitabira iyo mishyikirano ngo kuko yari yanatumiwemo n’abo muri CNARED, ahubwo isohora nyandiko mpuzamahanga zisaba Tanzania kubata muri yombi.

Ubwo busabe bw’u butegetsi bwa Nkurunziza leta ya Tanzania, umunyamuryango w’ikubitiro wa SADC, yabwimye agaciro. Icyo gikorwa cya Tanzania cyasuzuguje ubutegetsi bwa Nkurunziza, kinashimangira ibyo SADC yari isanzwe izi y’uko nk’uko bimeze kuri Rassemblement muri DRC, no ku Burundi imishyikirano itarimo CNARED yaba ari imishyikirano yo gutakaza igihe cy’ubusa.

Kuba u Burundi buri mu bibazo ariko bukibwira ko SADC yabwakira mu muryango, bugomba kuba bwishuka bukishyira mu ishusho ya DRC mu 1997, kuko muri uwo mwaka icyo gihugu cyakiriwe muri SADC kandi nacyo cyari mu bibazo.
kwemerera DRC kwinjira muri SADC byatumye bimwe mu bihugu biyigize bijya kurwanirira ubutegetsi bwa Kabila incuro ebyiri zose.

Ubutegetsi bwa Nkurunziza bugomba kuba bwifuza kwinjira muri SADC kugira ngo uwo muryango ube waza kuburwanirira nk’uko bwabikoreye ubutegetsi bwa Kabila.

Ibyo bihugu byo muri SADC ariko byagiye kurwanirira Kabila bizi icyo byari gukura muri DRC mu rwego rw’ubukungu, ariko mu Burundi nta cyakurwayo muri urwo rwego.

DRC kandi yasabye kwinjira muri SADC itari mu wundi muryango umeze nkayo. Kuba u Burundi buri muri EAC bukaba bunasaba no kwinjizwa muri SADC bigomba kubanza kwigwaho bihagije, kubera ko busanzwe buzwiho kuba butuzuza neza inshingano zabwo muri EAC.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE