2017-12-11 14:03:29 clouds 27o High | Kigali Rwanda

Dukurikire:
 
 

Kirehe:Abaturage biyubakiye ivuriro rya miliyoni 83

Yanditswe na IMVAHO NSHYA

Kuya 2017-03-28 06:07:55

 
Share on:
 
Yasuwe:506
 
Yavuzweho:200
 
10
 
10

Abaturage bo mu kagari ka Kiyanzi, umurenge wa Nyamugali, mu karere ka Kirehe bagorwaga no gukora ingendo ndende bajya kwivuza, ubu barishimira ko baruhutse, kuko biyujurije ivuriro ‘Poste de Santé Kiyanzi-Rusumo’ ryuzuye ritwaye amafaranga y’u Rwanda miliyoni 83 ibihumbi 735 n’amafaranga 800.

Ni ivuriro ryafunguwe ku mugaragaro, kuwa 25 Werurwe 2017, nyuma yo gusoza umuganda, wanakorewe aho ku rwego rw’akarere haterwa ubusitani ahakikije iyi nyubako.

Ni vuriro rigizwe n’ibice 2, birimo ahavurirwa indwara zinyuranye n’izindi serivisi n’aho ababyeyi babyarira. Ryamaze kugezwamo ibikoresho n’abaganga, ku buryo na serivisi zo kuvura abaturage bazihabwa.

JPEG - 205.4 kb
Poste de Sante Kiyanzi-Rusumo yuzuye itwaye miliyoni zisaga 83 (Foto Manishimwe N)

Igitekerezo cyo kubaka iyi Poste de Santé ya Kiyanzi cyavuye mu batuye aka kagari ubwabo.Binyuze mu buryo bwo gukusanya umusanzu w’amafaranga kuri buri muryango, no kubaka binyuze mu muganda, muri miliyoni zisaga 83 ryuzuye ritwaye, uruhare rw’abatuye Kiyanzi rugera kuri 70%, ibindi ni inkunga bahawe n’umuryango w’abagiraneza w’Abanyamerika barangajwe imbere na Jack Taggart.

Abatuye Kiyanzi babwiye Imvaho Nshya ko batewe ishema nuko ivuriro ‘Poste de Santé Kiyanzi_Rusumo’ bagize uruhare mu kwiyubakira ryuzuye, banagaragaza ko bishimiye ko batazongera kugorwa n’ingendo ndende bajya kwivuza kure, kandi abagore by’umwihariko bakaba babonye aho bazajya babyarira hafi.

Musabyeyezu Viateur wo mu mudugudu wa Kagera yagize ati “Byatugoraga ko umurwayi agera kwa muganga ku buryo n’ubuzima bushobora gutakarira mu nzira.
Twivurizaga kure, nko mu birometero bisaga 3, ku kigo nderabuzima cya Nyamugali, hari n’abajyaga i Bukoora, ariko hose hari kure cyane.

Indi nyungu nini ni ku bagore babyara, biraboroheye cyane kuko inda imufashe yahita aza hano hafi.”

Mukeshimana Sofia utuye mu mudugudu wa Rwamura we yagize ati “Dufite ibyishimo byinshi! Hari igihe umuntu ajya kubona akabona umwana afashwe n’indwara by’ikubagahu, kumugeza Nyamugali byatugoraga cyane.

Ababyeyi tubonye aho tubyarira hafi, kuboneza urubyaro ku gihe tukabyara abo dushoye kurera…kandi iri vuriro rizatuma dufata n’izindi ngamba zo kurwanya imirire mibi n’ibindi bituma ubuzima burushaho kuba bwiza.”

Muzungu Gerard, Umuyobozi w’akarere ka Kirehe yavuze ko igikorwa cy’ubudashyikirwa no kwishakamo ibisubizo abatuye mu kagari ka Kiyanzi bagezeho, gikwiye kubera abandi urugero rwo gukurikizwa.

Yagize ati “Ibi nibyo bigaragaza uruhare rw’abaturage mu majyambere y’igihugu. Iyi Poste de santé iragaragaza kwigira. Iyo abayobozi b’iguhugu cyacu avuga ko abanyarwanda ari wo mutungo munini w’igihugu cyacu, buriya abatabyumva; bakwiye kuzaza hano i Kiyanzi bakabireba, bakabyiga.

Ibi biragaraza ko mwaciye umuco mubi wo gutega amaboko, uzaza kugira icyo adushyigikiramo, azaza yubakire ku byo dukora, kandi nataza nabwo tukaba twabyikorera.N’abo mu yindi mirenge bakwiye gukura isomo kuri iki gikorwa kiza.”

Ikindi abatuye Kiyanzi na Nyamugari muri rusange bibutswa ni ukwirinda indwara.

Ivuriro ‘Poste de Santé Kiyanzi_Rusumo’ ryafunguwe ku mugaragaro kuwa 25 Werurwe 2017, ryatangiye kubakwa tariki ya 4 Gicurasi 2016. Abazaryivurizaho benshi ni abo mu kagari ka Kiyanzi na Kagasa two mu murenge wa Nyamugali, n’abo mu gice cy’umurenge wa Kigarama cyegereye Kiyanzi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE