2017-10-16 07:05:01 clouds 27o High | Kigali Rwanda

Dukurikire:
 
 

Tanzania: Kwirukana bamwe mu ishyaka rya CCM bishobora kuzarisigamo imvune

Yanditswe na IMVAHO NSHYA

Kuya 2017-03-26 14:19:25

 
Share on:
 
Yasuwe:133
 
Yavuzweho:200
 
10
 
10

Ishyaka riri ku butegetsi muri Tanzania, Chama Cha Mapinduzi(CCM), riherutse gufata ibyemezo bishobora kuzayisigamo imvune ariko nta kundi byagenda kuko aribyo bigomba kurifasha ngo rigumane icyubahiro n’igikundiro byakomeje kuriranga.

Mu cyumweru gishize komite nyobozi (NEC) ya CCM yafatiye ibyemezo bikomeye bamwe mu bayobozi bo mu nzego zitandukanye z’iryo shyaka, ibyemezo ubundi byajyaga bitinywa cyangwa bititabwagaho gufatwa.

Inama idasanzwe ya NEC iherutse guteranira Dodoma yafashe icyemezo cyo kwirukana mu ishyaka bamwe mu banyamuryango, bakaba n’abayobozi mu nzego zitandukanye za CCM, abandi bamburwa inshingano bari bafite banihanangirizwa bikomeye, hakaba n’abategetswe gusaba imbabazi.

JPEG - 24.8 kb
Perezida Magufuli ari mu ishyaka rya CCM

Abirukanwe muri iryo shyaka, wavuga ko riri ku butegetsi kuva Tanzania yabona ubwigenge muri za 60, harimo Sophia Simba wari ukuriye ihuriro ry’abagore ku rwego rw’igihugu (UWT); Chairman wa CCM wintara ya Mara, Christopher Sanya; Chairman wa CCM w’intara ya Shinyanga, Ernest Kwirasa; Chairman wa CCM mu ntara ya Iringa, Jesca Msambatavangu; na Chairman wa CCM mu ntara ya Dar es Salaam, Ramadhan Madabida, hanirukanwa n’uwitwa Gurete wari umwe mu bagize NEC kimwe n’uhagarariye Arumeru muri NEC, Mathias Manga na Ali Sumaye, wari userukiye Arusha muri NEC.

Abandi NEC yafashe icyemezo cyo kwirukana muri CCM ni ba Chairmen b’uturere twa Kinondoni, Ilala, Longido, Gairo, Muleba, Babati, kimwe n’uwa Akarere ka Bunda.
Ali Mchumo, wari uhagarariye Kilwa muri NEC, yihanangirijwe bikomeye anamburwa inshingano yari afite muri CCM.

Abandi CCM yafatiye icyemezo nk’icyo cya Mchumo ni Hassan Mzaha wari uhagarariye intara ya Singida muri NEC, Chief Kalolo wari uhagarariye Kilwa muri NEC kimwe na Ali Sumaye wari uhagarariye Arusha muri NEC. Undi ni Ahmed Kiponza wari Chairman wa CCM mu Karere ka Iringa y’Umujyi n’uwari ukuriye UWT mu karere ka Gezabulu.

Abafatiwe ibyemezo wavuga ko biciriritse ni ba ambasaderi Emmanuel Nchimbi na Adam Kimbisa, bategetswe gusaba imbabazi. Ibihano abanyamuryango ba CCM bafatirwa na NEC ntabwo bijya bijuririrwa.

Nk’uko itangazo ubuyobozi bwa CCM bwashyize ahagaragara ny’uma y’iyo nama NEC yafatiyemo ibyo bihano ribigaragaza, ibyaha byatumye abo bantu bafatirwa ibihano harimo kugambanira ishyaka mu gihe cy’amatora, amatiku, ruswa, ubwirasi no kutuzuza inshingano umuyobozi mu ishyaka aba ashinzwe.
Nk’uko biteganywa n’amategeko agenga CCM, umuntu wirukanywe mu ishyaka kubera ibyaha yakoze abizi kandi abigambiriye, ntabwo yemerewe kuzapfa asubiye mu ishyaka ariko abirukanywe kubera ibyaha bakoze kubera uburangare cyangwa ubujiji bashobora kuzongera gusaba ubunyamuryango bwa CCM nyuma y’amezi 48.

Abahanishijwe kwamburwa imyanya y’ubuyobozi bari basanzwe bafite muri CCM ariko batayirukanywemo, bemerewe kuba bakongera kuzayihatanira nyuma y’amezi 40.

Ibi byemezo NEC yafatiye abo bayobozi ba CCM mu nzego zitandukanye bije bikurikira ibyari biherutse gufatwa na CCM mu ntara ya Mwanza aho abantu 96 bambuwe ubunyamuryango bw’iryo shyaka.

Umunyamabanga nshingwabikorwa wa CCM muri iyo ntara ya Mwanza, Simon Mangelipa, avuga ko abirukanwe bajijijwe kuba baragambaniye CCM mu gihe cy’amatora yashyize John Pombe Magufuli ku mwanya wa Perezida wa Repubulika, akanahesha CCM intebe nyinshi mu nteko nshingamategeko.

Ibi byemezo CCM yafashe ni ibyemezo bikarishye kandi yafatiye abantu bakomeye, bafite amaboko hirya bo hino mu gihugu. CCM ariko gufatira ibihano ibantu nk’abo byari ngombwa kuko bizwi neza ko hari abantu bakomeye mu nzego z’ubuyobozi bw’ishyaka n’ubw’igihugu barangwa n’ibikorwa byo kurisenya aho kuryubaka.
Nta kamaro rero kugumana abantu nk’abo, ahubwo kubikiza byarushaho kuryubaka no kugarurira icyizere abanyamuryango beza. Nk’ishyaka wagira umubare uciriritse wubaka aho kugira umubare ugamije gusenya, cyangwa uri aho ariko nta kintu cy’akamaro ufite.

Twakomojeho ko uwavuga ko CCM iri ku butegetsi kuva Tanzania yabona ubwigenge muri za 60 yaba atari kure y’ukuri. Kuri benshi ibi ntabwo byoroshye kubyumva ariko niko bimeze, kandi ni ngombwa kubishimangira muri iki gihe ubona CCM ishaka kwiyuburura.

Kumenya neza CCM ni ngombwa ngo umuntu avugeho gato ku gihugu cyahoze kyitwa Tanganyika n’ikitwaga Zanzibar. Tanganyika yabonye ubwigenge mu 1961, iba Repubulika mu 1962. Ishyaka ryagejeje Tanganyika ku bwigenge no kuri iyo Repubulika ni Tanganyika African Union (TANU).

Zanzibar yo yabonye ubwigenge mu Kuboza 1963, mu ntangiriro ya za 64 ishyaka Afro Shiraz Party (ASP) rifata ubutegetsi, rihiritse ubw’Abarabu bwari bwasimbuye ubukoloni bw’Abongereza muri icyo gihe cy’ubwigenge.

Muri uwo mwaka w’i 1964 ubutegetsi bwa TANU muri Tanganyika n’ubwa ASP muri Zanzibar byafashe icyemezo cyo gushyira hamwe Tanganyika na Zanzibar biba igihugu kimwe, ubu tuzi ku izina rya Tanzania.

N’ubwo tariki 26 Mata 1964 Tanganyika na Zanzibar byishyize hamwe bikabyara Tanzania, ariko igice cya Tanzania kitwaga Tanganyika cyagumanye rya shyaka ryakigejeje ku bwigenge, ariryo TANU. N’igice cya Tanzania kitwa Zanzibar kigumana rya shyaka ryakigejeje kuri revolisiyo, ariryo ASP. Mu 1977 nibwo TANU na ASP byishize hamwe bibyara CCM tubona uyu munsi.

Iyi CCM rero kuva Perezida Julius Nyerere yava ku butegetsi mu 1985 yakomeje kugenda yirara gahoro gahoro, kugeza n’aho bamwe aho kuyita Chama Cha Mapinduzi bari basigaye bayita Chama Cha Majambazi. Twizere ko ayo majambazi ari muri abo NEC iherutse gufatira ibyemezo.

N’ubwo ariko tuvuga ko abo bafatiwe ibyemezo ari abantu bagomba kuba bakomeye ariko na none twibuke ko banakomejwe na CCM, kandi ibimenyetso byose bigaragaza ko muri CCM intugu zitarakura ngo zisumbe ijosi n’ubwo ubona zarafashe gahunda yo kugerageza.

Na none ariko uko mbibona n’uko hari ibindi bintu bigomba gushyirwa mu buryo kuko bigomba kuba bikurura bimwe muri ibyo bibazo.

Uko bimeze muri CCM n’uko umukandida wayo watorewe umwanya wa Perezida wa repubulika, anegurirwa n’umwanya wo kuba Perezida wa CCM ku rwego rw’igihugu. Ubu ariko Perezida wa CCM aracyari Jakaya Kikwete wasimbuwe na Magufuli ku mwanya wa Perezida wa Repubulika.

Mu gihe cyose Kikwete akiri Chairman wa CCM, Perezida Magufuli yitegure ko azakomeza guhura n’ibibazo kuko abenshi birukanywe babanye nawe imyaka 10 yose ari Perezida wa Repubulika ya Tanzania akaba na Chairman wa CCM ku rwego rw’igihugu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE