2017-12-11 14:03:29 clouds 27o High | Kigali Rwanda

Dukurikire:
 
 

VTC Ruhango igiye gukora imodoka ’ya mbere izaba ikorewe mu Rwanda’

Yanditswe na IMVAHO NSHYA

Kuya 2017-03-26 09:07:47

 
Share on:
 
Yasuwe:1048
 
Yavuzweho:200
 
10
 
10

Ishuri ry’imyuga n’ubumenyingiro “VTC Ruhango” ryahize ayandi mu kugaragaza udushya mu imurikabikorwa ry’abafatanyabikorwa mu Iterambere ry’Akarere ka Ruhango JADF, riboneraho no gutangaza ko ryiyemeje gukora imodoka mu myaka ibiri iri imbere.

Umuyobozi w’iryo shuri, Bimenyimana Alphonse, avuga ko batangiye ubushakashatsi bwo gukora imodoka mu biti n’ibyuma bishaje ngo hakaba hari icyizere ko iyi modoka izaba yuzuye mu mezi abiri, naho mu myaka ibiri hakazaba harakozwe imodoka ikozwe mu byuma bishya.

Bimenyimana avuga ko bazi neza ko gukora imodoka bidasaba kuba umuntu abasha kwikorera buri gikoresho cyose mu biyigize. Bityo ngo nubwo byatangiye ari nk’inzozi batangiye kubigeraho.

Ati “Umuhigo dufite ni uko mu gihe kitarenze imyaka ibiri tuzaba tumaze gukora imodoka yakorewe mu Rwanda mu karere ka Ruhango nshyashya ya ‘zéro kilomètre’, kandi twamaze kubona ko gushaka ari ugushobora; tuzabigeraho.”

JPEG - 300 kb
Nyuma yo gukora televiziyo muri mudasobwa zishaje, VTC Ruhango irashaka no gukora imodoka

Yakomeje ati “Nta bwo uwakoze moteri y’imodoka ari we wakoze amapine, nta bwo ari we wakoze ‘volant’, si we wakoze ikizu, si we wakoze n’ibindi bitandukanye. Muri ziriya nganda na bo batumiza buri kantu kose, ibintu byinshi cyane mu nganda zitandukanye bakabyegeranya, bagahuza akantu n’akandi kugeza imodoka ibonetse.

“Ubwo ni bwo buryo natwe niba twarabashije gukora ishaje, nitumara kuyinoza neza tubona twishimiye igikorwa cyacu, tuzashaka aho dukura amafaranga, tuyashake kugeza abonetse dutumize buri kantu kose mu gihugu gakorerwamo, nitugera mu Ruhango twicare dufate iburo, twegeranye akantu ku kandi dukore imodoka nshyashya, dusabe uburenganzira bwo kuyiha pulake. Izo ni zo nzozi zacu kandi byanga bikunda tuzazigeraho”.

Iri shuri kandi ryigaragaje mu guhindura ibikoresho bishaje bikavamo ibishobora gukoreshwa. Mu bikoresho bakora harimo amateleviziyo ahendutse bakora muri mudasobwa zishaje n’ibikoresho bifata amashusho y’ibibera mu nyubako n’ahateranira abantu benshi (Camera de surveillance).

Bimenyimana ati “Tumaze kubona ko televiziyo zihenze, twaricaye turatekereza tuza kugera ku ikoranabuhanga ryo gukora amateleviziyo twise ‘Made in Rwanda From Ruhango District’. Ni televiziyo igura ibihumbi 40 kandi ifite ishusho ryiza nk’irya ya yindi ihenze.”

Akomeza agira ati “Umuturage wese ashobora kuyigura, bityo mu gikorwa cya Tunga TV Munyarwanda tukaba tugizemo uruhare. Dufasha abanyeshuri biga iwacu bakabona ibyo bazahangamo imirimo, n’abaturage bakabona serivise bakeneye”.

Umuyobozi wa VTC Ruhango kandi ahamya ko bagikora n’ubundi bushakashatsi buzafasha u Rwanda kugera ku ntego yo kugabanya ibikorerwa mu mahanga.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE