2017-12-11 14:03:29 clouds 27o High | Kigali Rwanda

Dukurikire:
 
 

Ngoma:Urubyiruko rushamikiye ku muryango FPR Inkotanyi rwaremeye imfubyi

Yanditswe na IMVAHO NSHYA

Kuya 2017-03-22 07:22:31

 
Share on:
 
Yasuwe:432
 
Yavuzweho:200
 
10
 
10

Binyuze mu buryo bw’umuganda, urugaga rw’urubyiruko rushamikiye ku muryango FPR Inkotanyi mu Karere ka Ngoma rwasaniye inzu, runubakira ubwiherero ndetse n’akarima k’igikoni abana b’imfubyi babiri.

Abubakiwe ni Nsengiyumva Ildephonse w’imyaka 15 na Ngarukiye Emmanuel w’imyaka 13 bo mu murenge wa Jarama mu Karere ka Ngoma.

Iki gikorwa urubyiruko rwagikoze mu mpera z’icyumweru gishize, nyuma yo kubona abo bana bo mu kagari ka Kibimba, ari imfubyi zibana mu nzu.

Ibikorwa byo gukurungira inzu aba bana bibanamo, gushyiraho amabati mashya, kubumba amatafari yo kubaka ubwiherero buboneye, no gukora akarima k’igikoni, nibyo byaranze uyu muganda.

Ngarukiye Emmanuel, umwe muri aba bana, yiga mu mwaka wa 4 w’amashuri abanza yashimiye ko yasaniwe inzu.

Ati “Ndishimye kubera ko nabaga mu nzu yavaga, none bakaba banyubakiye inzu. ndumva nabashimira, Imana ibahe umugisha.”

Umuvandimwe we Nsengiyumva Ildephonse na we yagaragaje ko yishimiye iki gikorwa anavuga ko akarima k’igikoni bakorewe bazagafata neza, ku buryo n’imvura yaba, n’igihe itaguye bazajya bakuhira, kagahoraho imboga.

Bamwe mu rubyiruko rugize urugaga rw’urubyiruko rushamikiye ku muryango FPR Inkotanyi bari bitabiriye iki gikorwa cy’umuganda, bavuga ko ibikorwa nk’ibi basanzwe babikora mu rwego rwo gufasha abababaye kongera kugarura icyizere.

Ikindi ni uko abo uru rubyiruko rufasha rukomeza kubakurikirana no kubaba hafi kugeza bageze ku rwego rwo gutera intambwe nziza mu iterambere.

Umwe muri uru rubyiruko yagize ati “Tuba tugomba kwishakamo ibisubizo, kandi tumenyereye ko urubyiruko ari imbaraga z’igihigu zubaka kandi vuba.Twaje hano rero kugira ngo dufashe aba bagenzi bacu.

Ikindi ni uko mu mateka yacu, hari aho urubyiruko rwabayeho rusenya aho kubaka, ariko ubu turi kubaka ntabwo turi gusenya. Nkaba mpamagarira n’urundi rubyiruko bagenzi bajye hirya no hino mu gihugu gufatanya tugatera imbere.”

Uwizeye Méthode, uhagarariye urugaga rw’urubyiruko rushamikiye ku muryango FPR Inkotanyi mu Karere ka Ngoma, avuga ko iki gikorwa cyo kufasha izi mfubyi bagitekerejeho mu rwego rwo kubaba hafi, no kubafasha guha ubuzima bwabo icyerekezo.

Yagize ati “Iki gikorwa ni inyigisho tuvana ku bayobozi bakuru b’igihugu cyacu, cy’uko tugomba kwitanga, tugafasha abandi, nk’uko natwe hari aho twafashijwe tukava, ubu tukaba dufite aho tugeze.

Ibyiza tugezeho rero ni ngombwa ko tubisangiza n’urundi rubyiruko, ariko kandi tunabashishikariza kugira imibereho myiza. Kandi nk’urubyiruko rwa FPR Inkotanyi twifuza igihugu kiriho neza, gifite imiyoborere myiza, ijyana n’imibereho myiza.”

Uretse kubakira aba bana 2 b’imfubyi bo mu murenge wa Jarama ubwiherero buboneye, gusana inzu no kubakorera akarima k’igikoni; urugaga rw’urubyiruko rushamikiye ku muryango FPR Inkotanyi mu karere ka Ngoma rwanageneye izi mfubyi, inkunga y’amafaranga y’u Rwanda asaga ibihumbi 600, yo kuzifasha kubaka icyerekezo cy’iterambere ry’ubuzima bwabo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE