2017-12-11 14:03:29 clouds 27o High | Kigali Rwanda

Dukurikire:
 
 

Rusizi: Ibigo by’amashuri bifite amacumbi byabuze ababyigamo

Yanditswe na IMVAHO NSHYA

Kuya 2017-03-21 08:33:01

 
Share on:
 
Yasuwe:740
 
Yavuzweho:200
 
10
 
10

Abayobozi b’amwe mu mashuri acumbikira abanyeshuri mu karere ka Rusizi, baravuga ko muri uyu mwaka bagize igihombo cyatewe no kutabona abanyeshuri bahagije.

Rimwe mu mashuri avugwamo iki kibazo Imvaho Nshya yasuye ni Koleji ya Nkanka, iri mu murenge wa Nkanka, aho mu mwaka wa mbere bari basabye abanyeshuri 92 bagombaga kwigira mu byumba 2, REB iboherereza 43 b’ishuri rimwe gusa, nyamara nabo ngo haje abana 5 gusa, bakaba ari bo bari mu ishuri gusa kuko abandi 38 bose nta n’umwe waje.

Ngo byakubitiyeho ko mu mwaka wa 4 bagombaga kwakira abana 138, nyamara ngo bakiriye 34 gusa, mu gihe mu kigo cyose bagombaga kuba bafite abana 311, hakaba hari 156 gusa.

JPEG - 131.5 kb
Umuyobozi wa Koleji ya Nkanka avuga ko kuba bakira abana bake bibatera igihombo

Umuyobozi w’iri shuri Habimana Emmanuel, avuga ko bariya bo mu mwaka wa mbere bataje byatewe n’uko REB yaboherereje abo mu ntara y’Uburasirazuba gusa, banga kuza kubera ko ngo ari kure cyane, haboneka bariya 5 gusa.

Ngo biriyongera ku bibazo bagize umwaka ushize, aho bagombaga kwakira abana 248 mu kigo cyose, bakakira 122 gusa, bikaba bitera igihombo bigoye kwikuramo.

Yagize ati “bidutera igihombo gikomeye cyane ku mpande zose ari na byo twasobanuriye umuyobozi w’akarere na REB, kuko niba dukoresha nk’amashanyarazi y’amafaranga 50,000 ku kwezi yagombaga gukoreshwa ku bana 300 agakoreshwa ku 150 gusa, urumva igihombo kirimo.Ikindi ni uko nk’abo bana 5 bigishwa n’abarimu 14, abarimu bakaruta abanyeshuri mu ishuri.

Bihungabanya agahimbazamusyi ka mwarimu, kuko ayo yagombaga kubona ntayabona, bigatuma abashoboye bahora baducika bakigira aho babona agahimbazamusyi, ariko ubwo urumva ntidushobora kugira ibikorwaremezo bigaragara dukora, mu gihe amafaranga twagombaga kwinjiza atinjira.”

Asanga mu kubohereza bajya bareba aho umwana ava n’aho ajya kwiga, kuko iyo ari kure kandi amafaranga y’ishuri asigaye ari menshi cyane, abana bahitamo kwigira mu y’uburezi bw’ibanze abegereye, kuko bo bahabwa abo mu ntara y’uburasirazuba n’Amajyepfo ntibirirwe baza.

Umuyobozi w’aka karere wungirije ushinzwe imibereho myiza y’abaturage, Nsigaye Emmanuel, avuga ko iki kibazo kiri hose muri aka karere kandi cyabateye igihombo gikomeye cyane, ariko ngo bari kubiganiraho na REB ku buryo bishobora kuzakemuka, abana batarabona amashuri bakazoherezwa i Rusizi.

Ati “Batwoherereza abana ba kure ntibaze kandi twateguye ibyangombwa byose byo kubakira bikaduhombya, abenshi bakigira mu y’uburezi bw’ibanze abegereye, ariko kirazwi, turagikoraho na REB dushobora kuzabona igisubizo.”

Iyi nkuru Imvaho Nshya iracyakomeza kuyikurikirana, umwanzuro uzava mu biganiro aka karere kagirana na REB tuzawubamenyesha mu nkuru ikurikira.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE