2017-12-13 09:46:30 clouds 27o High | Kigali Rwanda

Dukurikire:
 
 

Ingabo z’u Rwanda zirahugurwa ku kurinda ikoreshwa ry’abana mu gisirikare

Yanditswe na IMVAHO NSHYA

Kuya 2017-03-21 06:31:05

 
Share on:
 
Yasuwe:444
 
Yavuzweho:200
 
10
 
10

Abasirikare 30 batangiye amahugurwa azamara ibyumweru bibiri, aho bazahabwa ubumenyi buzabafasha kugira uruhare mu gukumira iyinjizwa n’ikoreshwa ry’abana mu gisirikare.

Ni amahugurwa biteganyijwe ko azitabirwa n’abasirikare 60, ariko ku ikubitiro abagera kuri 30 akaba ari bo barimo guhugurwa. Aya mahugurwa akaba atangwa ku bufatanye bw’ikigo cyashinzwe na Gen. Romeo Dallaire cyitwa ‘Child soldiers Initiative’ na Rwanda Peace Academy.

JPEG - 149.2 kb
Abitabiriye amahugurwa bizeye ko bazayungukiramo byinshi (Foto Ngaboyabahizi P)

Maj. Bizimana Paul, umwe mu basirikare bitabiriye aya mahugurwa, yagaragaje ko biteze kuzayungukiramo ubumenyi bwinshi ku bijyanye no gukumira iyinjizwa n’ikoreshwa ry’abana mu gisirikare.

Yagize ati “Muri iyi minsi tugiye guhabwa amahugurwa ku birebana no kurinda abana iyinjizwa n’ikoreshwa ry’abana mu gisirikare, numva nzakuramo ubumenyi buzamfasha mu mirimo yanjye ya buri munsi ku bijyanye no kumenya uburyo umwana afatwa mu burenganzira bwe.

Nzamenya umwana ni iki?, ni gute abana binjira mu gisirikare, ni izihe mpamvu zikurura abana kwinjira mu gisirikare bakiri bato? Ni gute umuntu yakwitwara, mu gihe aramutse ari ku rugamba akahahurira n’umwana n’ubwo na we aba ari ku rugamba, umurwanyi yamufata ate, ibi byose bizatuma menya neza uburenganzira bw’umwana mu buryo bwimbitse”.

Umuyobozi w’ikigo Child Soldiers Initiative, Darin Reevers, yagize ati “ Twahisemo gukorana n’u Rwanda kubera ko ari igihugu kuri ubu cyakataje mu kubungabunga uburenganzira bw’abana, kandi gifite ubunararibonye, ibi kandi bishingira ku masezerano twagiranye na Minisitiri w’Ububanyi n’Amahanga Louise Mushikiwabo ku wa 23/2/ 2017. Amasomo bazahabwa azibanda ku kumenya uburyo abana bafatwa mu gisirikare n’uburyo binjiramo, uburenganzira bw’umwana, ihohoterwa rikorerwa abana mu gisirikare, kuko nyine babakoresha bataragira imyaka y’ubukure”.

Umuyobozi w’ikigo Rwanda Peace Academy, Col Jill Rutaremara, yagize ati “Kuba aya mahugurwa yabereye mu gihugu cyacu ntibivuze ko dufite abana mu gisirikare cy’u Rwanda, oya…..Ibi na byo bikaba ari isomo n’ubunararibonye ibihugu bigenda bibona ku Rwanda, aba basirikare bahugurwa bazavamo abazahugura abandi, bimwe mu bihugu ku isi biracyashyira kandi bigakoresha abana mu gisirikare cyane mu gihe cy’amakimbirane.”

Kugeza ubu ku isi yose habarurwa abana bari mu gisirikare bagera ku bihumbi 25. Rutaremara yemeza ko iki ari cyorezo gikwiye kurwanywa abantu bahuje imbaraga mu bihugu byose byo ku isi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE