2017-09-20 12:30:19 clouds 27o High | Kigali Rwanda

Dukurikire:
 
 

Ibiciro bikomeje kuzamuka mu Rwanda, muri Kanama byiyongereyeho 6.4%

Yanditswe na IMVAHO NSHYA

Kuya 2016-09-13 05:40:57

 
Share on:
 
Yasuwe:4
 
Yavuzweho:200
 
10
 
10

Ikigo cy’Igihugu cy’Ibarurishamibare kigaragaza ko mu kwezi gushize kwa Kanama 2016 ibiciro mu Rwanda byazamutse ku gipimo cya 6.4% ugereranyije no muri Kanama 2015.

Mu kwezi gushize kwa Kanama, Ikigo cy’Igihugu cy’Ibarurishamibare kigaragaza ko ibiciro mu mijyi yo mu Rwanda byazamutse ku gipimo cya 6.4%, kandi igipimo ngenderwaho cyifashishwa mu bukungu bw’u Rwanda kiboneka hifashishijwe ibiciro byakusanyijwe mu mijyi gusa.

Ni mu gihe muri Nyakanga 2016 ibiciro byari byazamutse ku gipimo cya 6.9%, Kamena byari byazamutseho 5.5%, Gicurasi ho ibiciro byari byazamutseho 4.6%, Mata 4.7%, Werurwe 4.6%, Gashyantare byari byazamutse ku gipimo cya 4.3% naho Mutarama uyu mwaka wa 2016 ibiciro mu Rwanda byari byazamutse ku gipimo cya 4.5%.

JPEG - 299.7 kb
Ibiciro by’imbuto biri mu bizamuka cyane mu gihugu

Muri aya mezi atatu ashize ya 2016 ni ho ibiciro mu Rwanda byazamutse cyane kurusha ahandi.

Muri rusange, bimwe mu byatumye ibiciro bizamuka mu kwezi kwa Kanama 2016, ni ibiciro by’ibiribwa n’ibinyobwa bidasembuye byazamutseho 12.0%, ibiciro by’inzu, amazi, amashanyarazi, gazi n’ibindi bicanwa byazamutseho 3.0% n’ibiciro by’ibijyanye n’ubwikorezi byazamutseho 8.6%.

Iyo ugereranyije Kanama 2016 na Kanama 2015, usanga ibiciro by’ibintu bitarimo ibiribwa n’ibikomoka ku ngufu byarazamutseho 4.5%. Wagereranya Kanama 2016 na Nyakanga 2016, ibiciro byazamutseho 0.5%. Iri zamuka ryatewe n’ibiciro by’ibiribwa n’ibinyobwa bidasembuye byazamutseho 0.9% ndetse n’ibiciro by’inzu, amazi, amashanyarazi, gazi n’ibindi bicanwa byazamutseho 0.5%.

Ibiciro ku masoko yo mu byaro mu kwezi gushize byiyongereyeho 8.1% bigereranyijwe na Kanama 2015. Ni mu gihe ihinduka ry’ibiciro mu byaro muri Nyakanga 2016 ryari ku kigereranyo kingana na 8.3%.

Bimwe mu byatumye ibiciro bizamukaho 8.1% mu byaro muri Kanama, ni ibiciro by’ibiribwa n’ibinyobwa bidasembuye byazamutseho 13.6% n’ibiciro by’amazu, amazi, amashanyarazi, gazi n’ibindi bicanwa byazamutseho 2.1%.

Iyo ugereranyije Kanama 2016 na Nyakanga 2016, ibiciro mu byaro byazamutseho 1.9%. Iri zamuka ahanini ryatewe n’izamuka ry’ibiciro by’ibiribwa n’ibinyobwa bidasembuye byazamutseho 3.0% n’ibiciro by’amazu, amazi, amashanyarazi, gazi n’ibindi bicanwa byazamutseho 1.2%.

Ibiciro bikomatanyirijwe hamwe mu mijyi no mu byaro, mu kwezi gushize kwa Kanama 2016 ibiciro mu Rwanda byiyongereyeho 7.5% ugereranyije na Kanama 2015. Ni mu gihe mu kwezi kwa karindwi 2016 byari byiyongereyeho 7.8%.

Bimwe mu byatumye ibiciro byiyongeraho 7.5% mu kwezi kwa Kanama 2016, ni ibiciro by’ibiribwa n’ibinyobwa bidasembuye byazamutseho 13.3%, ibiciro by’amazu, amazi, amashanyarazi, gazi n’ibindi bicanwa byazamutseho 2.5% n’ibiciro by’ibijyanye n’ubwikorezi byazamutseho 5.5%.

Iyo ugereranyije Kanama 2016 na Nyakanga 2016 ibiciro byazamutseho 1.4%. Ikigo cy’Igihugu cy’Ibarurishamibare kivuga ko iri zamuka ahanini ryatewe n’izamuka ry’ ibiciro by’ibiribwa n’ibinyobwa bidasembuye byazamutseho 2.5% n’ibiciro by’amazu, amazi, amashanyarazi, gazi n’ibindi bicanwa byazamutseho 0.9%.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE