2017-11-18 15:01:27 clouds 27o High | Kigali Rwanda

Dukurikire:
 
 

Musanze: Baravuga imyato uko guturana n’ingagi byabahinduriye ubuzima

Yanditswe na IMVAHO NSHYA

Kuya 2016-09-02 09:14:15

 
Share on:
 
Yasuwe:8
 
Yavuzweho:200
 
10
 
10

Abaturiye Pariki y’Igihugu y’Ibirunga ku masantere atandukanye yo mu mirenge ya Kinigi na Nyange baravuga imyato uburyo guturana n’ingagi byabahinduriye ubuzima kuko amadovize igihugu cyinjiza akomotse kuri zo ari bo ageraho bwa mbere.

Mu gihe kuri uyu wa 2 Nzeri habaye umuhango wo Kwita Izina abana b’Ingagi 22, abaturiye iyi pariki bahamya ko biteguye gukirigita ifaranga riturutse mu kugurisha ibikoresho gakondo, iby’ubugeni, gufasha ba mukerarugendo n’ibindi byinshi.

Aba baturage bamaze igihe kinini bitegura gukirigita ifaranga ku buryo bakoze ibishoboka byose ngo uyu muhango uzasange hari udushya twinshi bafite bamurikira abaturutse mu mpande zose z’igihugu ndetse no mu mahanga.

JPEG - 121.7 kb
Abanyabukorikori biteguye gukirigita ifaranga (Foto N. Protais)

Abafite imyiteguro idasanzwe ni abanyabukorikori kuko ngo ba mukerarugendo baje muri aka gace bahaha ibihangano bakoze n’indi mitako itandukanye.

Ibi byose bavuga ko bikomoka ku mahirrwe bagize yo guturana n’ingagi kuko zibakururira isoko rigari batari kubasha kwishakira.

Mukandayambaje Elizabeth wo mu murenge wa Nyange yagize ati “Njye mboha agaseke ariko kuri uyu munsi ndateganya nibura kwinjiza amafaranga y’u Rwanda agera ku bihumbi 100; uretse n’ibi kandi birantunze n’umuryango mbikesha Pariki y’Ibirunga”.

Akomeza avuga ko kubera yiteguye abakiriya benshi ku gaseke ubu ngo yaranguye n’utundi twinshi ku mashyirahamwe y’abagore atuboha.

JPEG - 120.8 kb
Imwe mu mitako abanyabukorikori bagurisha ba mukerarugendo(Foto N. Protais)

Ati “Mbere twajyaga tubona iyi Pariki n’ibintu biraho gusa, ariko nyuma y’aho haziye Leta y’Ubumwe bw’Abanyarwanda twahungukiye byinshi, ubu tubona amafaranga 5% akomoka ku yo Pariki iba yinjije , aya ni yo ubonamo amashuri, amazi meza, ibigo nderabuzima n’ibindi, kubera umutekano kandi ubu abanyamahanga barayisura, by’akarusho mu gihe cyo kwita izina, ba mukerarugendo baza ari benshi.”

Ndagijimana yongeyeho ati “Natangiye ndi umuhigi nicaga inyamaswa mbonye yose, ariko ubu ntwaza ba mukerarugendo imizigo. Ku munsi nibura sinabura amadorari 10; mu gihe cy’imyaka 6 nkora uyu murimo maze kwiyubakira inzu ndetse ndihira n’abana banjye amashuri. Ntawavuga iterambere iyi Pariki imaze kugeza ku banyamusanze ngo arirangize, natwe twiyemeje kuyirinda.”

Uwiragiye Honorine umukozi wa Pariki y’Ibirunga ushinzwe kumenya aho inyamaswa ba mukerarugendo baba baje gusura na we abona ko Pariki yaramwongereye icyizere cy’ubuzima nk’umugore, akaba afite uruhare runini mu iterambere ry’umuryango we n’iry’igihugu muri rusange.

JPEG - 190.3 kb
Uwiragiye avuga ko kurinda Pariki byamuteje imbere (Foto N. Protais)

Kwita Izina bimenyekanisha na EAC

Itsinda ryabahagarariye ibigo by’ubukerarugendo, amahoteli n’abandi bafite aho bahurira n’ubukerarugendo muri Uganda bagaragaza inyungu bakura mu birori byo Kwita Izina abana b’ingagi mu Rwanda.

Abahagarariye Uganda mu imurikabikorwa ryatangiye ku wa 27 Kanama kugeza ku ya 1 Nzeri 2016 bagaragaje ko Uganda ndetse n’ibindi bihugu bya EAC bikura inyungu ifatika mu muhango wo Kwita Izina.

Stephen Asiimwe Umuyobozi Nshingwabikorwa w’Ikigo cy’Ubukerarugendo cya Uganda (UTB) yashimangiye ko Kwita Izina ari imwe mu mamurika akomeye muri Afurika y’Iburasirazuba afite uruhare rukomeye mu kumenyekanisha u Rwanda n’akarere muri rusange.

JPEG - 115.4 kb
Umuhango wo Kwita Izina ubona nk’amahirwe akomeye mu Muhora wa Ruguru

Yagize ati “ Binyuze mu mushinga w’Ibikorwa remezo by’Umuhora wa Ruguru (NCIP), Kenya, u Rwanda na Uganda byimenyekanisha nk’agace kamwe kuzuyemo amahirwe y’;ubukerarugendo. Mu gushimangira uruhare rwa buri gihugu u Rwanda rwahisemo Kwita Izina, Kenya ihitamo Magical Kenya Expo mu gihe Uganda yo ikoresha Umunsi w’Abihayimana (Martyrs Day) mu gukurura amahanga.”

Yakoemje agaragaza ko ubufatanye bw’ibi bihugu bugira umusaruro ukomeye mugukurura abashoramari, ba mukerarugendo ndetse no kurema amahirwe mashya y’ishoramari.

Imibare itangwa na Ikigo cy’Igihugu cy’Iterambere yerekana ko Pariki y’Ibirunga icumbikiye ingagi zo mu misozi 304 zigize 35% by’iziboneka ku Isi hose.

Kureba amafoto y’Abana b’Ingagi bitwa amazina kuri uyu wa Gatanu kanda hano

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE