2017-12-10 12:22:00 clouds 27o High | Kigali Rwanda

Dukurikire:
 
 

U Rwanda rwashimye ibihugu byitabiriye FESPAD 2016

Yanditswe na IMVAHO NSHYA

Kuya 2016-08-04 19:53:25

 
Share on:
 
Yasuwe:5
 
Yavuzweho:200
 
10
 
10

Minisitiri w’Umuco na Siporo Uwacu Julienne, yashimiye byimazeyo ibihugu byitabiriye FESPAD anabyizeza gukomeza gufatanya mu bikorwa bitandukanye birimo n’ibijyanye n’umuco.

Mu birori byo gusoza iserukiramuco nyafurika ry’imbyino ryaberaga mu Rwanda kuva ku ya 1 Kanama 2016 byabereye mu Karere ka Nyanza ku wa Kane ku ya 4 Kanama 2016 ni bwo Minisitiri Uwacu yashimiye bidasubirwaho ibi bihugu.

Yagize ati “Ndashimira abaturutse muri Senegal, Repubulika Iharanira Demokarasi ya Kongo, Misiri na Kenya babanye na twe kuva twatangira iri serukiramuco. Turi kumwe, twishimiye umuco wacu, Afurika yacu kandi tuzamoza ubufatanye nk’ibihugu by’Afurika binyuze mu muco wacu nyafurika.”

JPEG - 360.9 kb
Minisitiri w’Umuco na Siporo Uwacu Julienne washimiye cyane ibihugu byari byaraje mu iserukiramuco

Minisitiri Uwacu yanabashimiye cyane uko bataramiye Abanyarwanda bakanyurwa binyuze mu mbyino zijyanye n’imico yo mu bihugu byabo.

Yakomeje avuga ko ubufatanye bw’ibihugu bukwiye kugaragarira muri byinshi bihuriyeho ari na byo abaperezida biyemeje guha imbaraga ubwo baheruka i Kigali mu nama y’Umuryango w’Ubumwe bwa Afurika.

Minisitiri yagaragaje ko u Rwanda rwishimira kuba ibirori by’i Rusizi, Musanze na Kayonza byagenze neza guhera ku wa 1 Kanama ubwo iserukiramuco ryatangiraga.

Mbere y’uko haba igikorwa cyo gusoza iryo serukiramuco i Nyanza, mu masaha ya mu gitondo abari bavuye mu bindi bihugu byitabiriye iserukiramuco basuye urwibutso rwa Jenoside yakorewe Abatutsi rwa Kigali ku Gisozi ahashyinguye ibihumbi 259.

Mu kurisoza hakozwe umutambagiro waturutse ahitwa ku Gasoro mu Karere ka Nyanza, ahari ikigabiro cy’Umwami Musinga wa V ku kigo cy’ishuri cya Mather Dei rukomereza kuri Kiliziya yitiriwe Mutagatifu Ludoviko rukomereza na none mu mujyi rwa gati rusozerezwa ahazwi nko mu Rukari mu ngoro y’Umwami Rudahigwa.

Itorero ry’Igihugu Urukerereza n’Urugangazi ni byo byataramiye abantu bijyanye n’umuco nyarwanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE