2017-09-23 09:22:12 clouds 27o High | Kigali Rwanda

Dukurikire:
 
 

Impuguke yasobanuye isano iri hagati y’u Rwanda na Singapore

Yanditswe na IMVAHO NSHYA

Kuya 2016-07-05 15:24:43

 
Share on:
 
Yasuwe:29
 
Yavuzweho:200
 
10
 
10

Umwarimu wo muri Kaminuza ya SIM yo muri Singapore witwa Dr Ameen Talib yagaragaje ko umurage w’iterambere w’abasekuruza b’icyo gihugu ugaragara cyane mu Rwanda.

Ibi abishingira ku iterambere u Rwanda rugenda rugeraho ndetse n’uburyo bw’imiyoborere bwamamaye ku isi yose ku gihugu kidafite umutungo kamere cyangwa ngo gikore ku nyanja cyahereye ku busa kikivana mu bukene.

Iki gitekerezo yanyujije mu kinyamakuru Today Online iyi mpuguke yakigize ubwo yitabiraga inama yitwa ‘Africa Mindset: An Indian Perspective” yari yateguwe n’ikigo kitwa NTU-SBF Centre for African Studies. Ngo uwatangaga ikiganiro yazamuye ingingo igaragaza uburyo Ubuhinde busangiye amateka n’Africa biturutse ku Bahinde bari barashinze imizi muri Africa y’Amajyepfo n’iy’Uburasirazuba mu bihe byo hambere.

Uyu mwigisha yongeye kwibutsa abamukurikiye ko Mahatma Gandhi yatangiye ibikorwa byo guhirimbanira ubwigenge ahereye muri Africa y’Epfo ari naho haturutse isano y’ibitekerezo by’impinduramatwara hagati y’Africa n’u Buhinde.

Yongeraho ko abari muri iyo nama bahise bazamura ibitekerezo bavuga ko Singapore itandukanye n’Ubuhinde kuko idafite diasipora muri Afurika, nkuko byagenze kuri Ghandi. Iki gitekerezo kikaba cyaratumye abantu bibaza isoko y’ubucuruzi bwa Singapore muri Afurika.

Ese koko amateka ya Singapore nta muzi afitanye n’Afurika ?

JPEG - 105.7 kb
Tariki 19 Nzeli uyu mwaka wa 2015, Perezida Paul Kagame yari mu ruzinduko mu gihugu cya Singapore, amakuru avuga ko yagiye ku butumire bwa Minisitiri w’Intebe w’icyo gihugu Lee Hsien Loong

Dr Ameen Talib avuga ko Singapore ari igihugu cyakozwe n’imiryango itandukanye y’abimukira .Bityo akaba yibaza uburyo igihugu kigizwe n’imiryango y’abimukira cyaba kidafitanye isano n’umugabane w’Afurika.

Yagize ati “Ibi byatumye nibuka urugendo nagiriye mu Rwanda mu mwaka wa 2005. Nanyuze mu mujyi wa Nairobi muri Kenya nerekeza mu Rwanda. Muri Nairobi, Hotel narayemo yari “Al-Junied Mosque”, yakomoye iri zina ku muryango wa Al-Junied wabaye muri Singapore kuva mu mwaka wa 1800.”

Uyu muryango w’aba Al-Junied wari uw’abacuruzi bakize cyane ahitwa Palembang muri Indonesia baje kwimukira muri Singapore mu mwaka wa 1819 nyuma y’ibibazo bagize.

Umuryango wa Al-Junied yahageranye n’imiryango yitwa Hadrami yo muri Yemen yawukurikiye baterana intambwe yerekeza muri Singapore.

Mu nyandiko ye yagize ati “Nk’umuntu ufite inkomoko mu miryango y’abarabu ya Arab-Hadrami, ndetse kuba uyu muryango wo muri Singapore ugaragara no muri Africa y’Uburasirazuba mpamya ntashidikanya ko hari ihuriro hagati ya Singapore n’Africa.”

Umurage w’intwari Lee Kuan ku Rwanda

JPEG - 104.2 kb
Lee Kuan Yew afatwa nk’ipfundo ry’iterambere rya Singapore

Uyu mugabo avuga ko usibye ihuriro ry’amasano yaba ari hagati y’Afurika na Singapore hari ikindi kintu cy’ingenzi aricyo umurage wa Minisitiri w’Intebe wabaye ikirangirire mu mateka ya Singapore, Lee Kuan Yew. Uyu ni umwihariko cyane cyane uri gushibuka mu Rwanda, aho urebye imiyoborere ndetse n’icyerekezo 2020 kigenda kiganisha u Rwanda ku iterambere nk’irya Singapore. Ibi byiyongeraho ko n’u Rwanda rukunda kwiyita ‘Singapore y’Africa”.

Ibi kandi ngo byashimangiwe na Perezida wa Repubulika Paul Kagame ubwo yabazwaga umuntu w’icyitegererezo kuriwe akagira ati “Mu by’ukuri. Ni umugabo ukomeye, waranzwe n’indangagaciro zihambaye ndetse wagejeje igihugu gito kuri byinshi. Lee Kuan Yew yahinduye Singapore ndetse n’ubuzima bw’abaturage be. Ibi ni nabyo turi gukora mu Rwanda”.

Lee Kuan Yew yari azwiho ku mahame yagiraga ati “Iterambere mbere, Demukarasi nyuma’ bikaba byarabaye ikitegererezo ku bihugu by’Afurika birimo Nigeria, u Rwanda ndetse na Ethiopia.

Uyu Lee yahoraga avuga ko Demukarasi iririmbwa mu Burengerazuba idashobora gukemura ibibazo ku bihugu bikennye ndetse agahamya ko ibihugu bito bikeneye umutekano n’iterambere ry’ubukungu kurusha kwihinga cyane ku Burenganzira bwa muntu na Demukarasi bishyirwa imbere n’ibihugu byo mu Burengerazuba.

Ubutegetsi bwa Lee bwaje gufasha iki gihugu gutera imbere maze uburyo bw’imiyoborere bwe buyobokwa n’abakuru b’ibihugu benshi muri Afurika kuko nkuko yabivugaga habanje iterambere rikenewe ibindi bikitabwaho nyuma.

Uyu mwarimu avuga ko Perezida Kagame nawe amaze imyaka yubaka igihugu gifite byinshi gihuriyeho na Singapore nko kuba ari ibihugu bito no kuba bifite aturage bake. Gusa ibitangaje ibi bihugu bidahuriyeho nuko u Rwanda rudakora ku nyanja ndetse ruherereye muri Africa ku mugabane ukennye.

U Rwanda rukaba rwaragerageje kwigira ku bigwi bya Singapore muri byose uhereye ku iterambere ry’umujyi ari nabyo byatumye isura ya Singapore yigaragaza mu Rwanda.

Usibye kuyigiraho kandi umubano w’ibi bihugu waje gukomera cyane ku buryo hari ibigo byo muri Singapore bimaze igihe bikorera mu Rwanda ndetse n’imirongo ya Politiki igenda isa harimo nko gusukura umujyi, guca amashashi, kurwanya ruswa n’ibindi.

Abagereranya imiterere y’ibihugu byombi mu rwego rw’ubukungu bifashisha imiterere y’ibihugu byombi idashingiye ku mutungo kamere ahubwo ubukungu bw’ibyo bihugu byombi bukazamurwa n’icuruzwa rya serivisi.

Agendeye ku gika kiri mu mvugo y’umwarimu muby’ubukungumuri Harvard University, Professor Michael Porter, yatangaje ko u Rwanda rwihariye ati “Nanjye ntekereza ko u Rwanda ari igihugu kihariye, mu bunararibonye bwanjye kugirango Guverinoma yese imihigo, iba ifite indangagaciro, ireba kure, ishyira ingufu mu kumenyesha no gusobanura ibyo ushinzwe.” Ibyo yavugaga ku Rwanda benshi bagizengo ni Singapore bavuga nkuko Dr Ameen Talib abyemeza.

Asoza inyandiko ye avuga ko kuri ubu Ubuhinde bubinyijije mu murage wa Mahatma Gandhi bwubatse ikiragano gikomeye. Gusa ngo na Singapore ibinyujije mu murage wa Mr Lee Kuan Yew n’imiyoborere ye biri kwigaragaza muri Africa cyane mu Rwanda nk’imbarutso.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE