2017-10-19 07:53:31 clouds 27o High | Kigali Rwanda

Dukurikire:
 
 

Nyamasheke:Uwari Konseye aricuza kuba yaricishije abatutsi muri Jenoside

Yanditswe na IMVAHO NSHYA

Kuya 2016-05-30 05:58:29

 
Share on:
 
Yasuwe:1
 
Yavuzweho:200
 
10
 
10

Kanani Aphrodis w’imyaka 65, utuye mu kagari ka Ntendezi, umurenge wa Ruharambuga, mu karere ka Nyamasheke, avuga ko aterwa ipfunwe no kuba yarakoreye Leta mbi yamushoye mu kwicisha abo yayoboraga mu gihe cya Jenoside yakorewe Abatutsi.

Kanani yari konseye w’icyari segiteri Ruharambuga,mu cyari Komini Karengera.Avuga ko ubwo yari konseye w’iyo segiteri muri Jenoside yakorewe abatutsi yumviye ubutegetsi bubi bwamuyoboraga, akicisha abaturage yayoboraga.

Avuga ko uwari Burugumesitiri w’icyari komini Karengera Sinzabakwira Straton, ngo yakoze ikinamico yohereza itangazo mu masegiteri yose ko ihumure ryabonetse ngo Abatutsi aho bihishe hose bihishure bajye mu ngo zabo, kumbe yari amayeri yo kugira ngo bajye ku mugaragaro bicwe.

JPEG - 306 kb
Kanani Aphrodis avuga iby’ubugwari bwe imbere y’imbaga y’abakirisitu (Foto Bahuwiyongera S)

Kuba yari azi neza ko ubu butumwa bw’ihumure bwari ikinyoma, akabutanga muri segiteri yayoboraga bigatuma abatutsi bicwa, abyicuza nk’ubugwari bukabije, azahora yigaya.

Yagize ati:“Nabaye ikigwari gikomeye cyane kuko nicishije benshi muri Jenoside yakorewe abatutsi, kandi nari nshinzwe kubayobora, ubwo kuri komini haturukaga itangazo ngo tuvuge ko amahoro yabonetse nararyumviye mvuza ingoma ndarangurura mvuga cyane ko ihumure ryabonetse aho umututsi wese ari yihishe ahava akajya iwe, ko ntacyo aba, nyamara iyi ngoma navugije yatumye benshi bava mu bwihisho baricwa, sinagira n’icyo nkora ngo mbarengere.”

Avuga ko abo azi bahise bicwa ari abatutsi 7, icyakora ngo yasabye imbabazi imiryango yabo, nyuma yo kubifungirwa imyaka 12 muri gereza ya Rusizi.

Yakomeje agira ati:“Ikindi kimbuza amahoro iteka ni aho nabaye nka Pilato,ubwo interahamwe zanzaniraga umugabo mu bo nayoboraga kandi nari nzi, zikambaza uko tumugenza najye nkazisubiza nti aho mwajyanye abandi se ntimuhazi?

Bahise bamujyana baramwica, iyo mba intwari nkamurengera aba yarabayeho, ariko ahubwo naramwicishije.”

Avuga ko icyamukoze ku mutima cyane ari ukuntu yafunguwe muri 2007, muri 2008 agahita abona akazi k’ubuzamu kuri paruwasi gatulika ya Ntendezi n’ubu akigakora, bakakamuha batitaye ku byaha yakoze ahubwo bamufashe nk’abandi banyarwanda, ngo bikaba byararushijeho kumwigisha ubugwari bwe.

Ati:“Byatumye numva ngomba gutera intambwe noneho y’ubutwari ngasaba imbabazi abo nicishirije abantu muri Jenoside yakorewe abatutsi nkanagaragaza ukuri ku byo twakoze byose, kugira ngo mbashe kubona amahoro yo mu mutima kandi nabigezeho mbifashijwe n’ubutumwa bw’ubumwe n’ubwiyunge bwa Padiri Ubald Rugirangoga.”

Umuyobozi w’aka karere Kamari Aimé Fabien asaba abababaye ibigwari bakica cyangwa bakicisha abatutsi muri Jenoside yakorewe abatutsi, gutinyuka bagasaba imbabazi z’ibibi bakoze kuko abarokotse Jenoside bo bakomeje kubaramburira amaboko y’imbabazi ngo bazibahe.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE