2017-09-20 12:30:19 clouds 27o High | Kigali Rwanda

Dukurikire:
 
 

U Budage bwahaye u Rwanda Miliyari 13 zo kubaka Rusizi ya III

Yanditswe na IMVAHO NSHYA

Kuya 2016-05-18 12:45:25

 
Share on:
 
Yasuwe:6
 
Yavuzweho:200
 
10
 
10

Leta y’u Rwanda n’u Budage byasinye amasezerano y’inkunga ingana na Miliyoni 15 z’amayero, zingana na Miliyari 13 z’amafaranga u Rwanda izakoreshwa mu kubaka urugomero rw’amashanyarazi rwa Rusizi III.

Urwo rugomeri ruhuriweho n’ibihugu bitatu ari byo u Rwanda, u Burundi na Repubulika Iharanira Demokarasi ya Kongo.

Ambasaderi w’u Budage mu Rwanda, Peter Fahrenholtz, yagize ati “Aya masezerano yerekana, akanashimangira umubano mwiza hagati y’ibihugu byombi bigaragaza ubucuti n’ubufatanye. U Budage bukaba bwiyemeje kugeza ku Banyarwanda n’abaturanyi babo ingufu z’umuriro w’amashanyarazi zizewe kandi zujuje ubuziranenge ku buryo burambye”.

Yakomeje avuga ko kuba igihugu cy’u Rwanda gishyize imbere ingufu bizafasha abaturage bacyo kugera ku iterambere.

Ati “Ni gute wagira ubuzima bwiza udafite ingufu z’umuriro w’amashanyarazi zihagije? Kuba u Rwanda rushyize imbere ingufu, na twe twishimiye kugaragaza uruhare rwacu muri icyo gikorwa.”

JPEG - 92.6 kb
Minisitiri w’imari n’igenamigambi Amb. Claver Gatete (iburyo) na Ambasaderi w’u Budage mu Rwanda, Peter Fahrenholtz bamaze gusinya amasezerano y’ubufatanye Foto (Foto James R)

Uyu mushinga uhuriweho n’Akarere utegerejweho byinshi, Amb Fahrenholtz ati “ Tuzi ibibazo biri mu Burundi ndetse n’imbogamizi igihugu cya Kongo gihura nacyo turatekereza ko mu gutangiza uyu mushinga bizagira uruhare ku mahoro n’umutekano muri biriya bihugu.”

Minisitiri w’Imari n’Igenamigambi Amb. Gatete Claver, yashimiye u Budage ku bw’iyi nkunga ndetse ashimira n’abandi batera nkunga barimo Banki y’Isi, Banki Nyafurika Itsura Amajyambere, Umuryango w’Ibihugu by’u Burayi n’abandi.

Umushinga wo kubaka urwo rugomero izamara imyaka 5, Minisitiri Gatete yavuze ko ikiri gukorwa kugira ngo wihute ari ukuganira n’abo bireba kugira ngo harebwe ko wakwihuta, bikazaterwa n’igihe amafaranga yose arebana n’iki gikorwa aboneke.

Urugomero rwa Rusizi ya III rwitezweho gutanga ingufu zingana na Megawati 147, bikaba biteganyijwe ko ruzuzura rutwaye akayabo k’amadorali y’Amerika Miliyoni 650 azatangwa ku buryo bungana n’ibi bihugu byose bihuriye kuri uru rugomero.

U Budage bufatanya n’u Rwanda mu bikorwa bitandukanye birimo Uburezi binyuze muri gahunda ya TVET, kwegereza ubuyobozi abaturage, guteza imbere abikorera n’ibindi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE