2017-10-19 07:53:31 clouds 27o High | Kigali Rwanda

Dukurikire:
 
 

Gicumbi:Abacuruza inzoga nibo batanga serivise za nijoro

Yanditswe na IMVAHO NSHYA

Kuya 2016-05-18 11:32:38

 
Share on:
 
Yasuwe:1
 
Yavuzweho:200
 
10
 
10

Umuyobozi w’akarere ka Gicumbi Juvenal Mudaheranwa, yasabye abikorera bo muri aka karere gukanguka, bagakora cyane kugira ngo babashe gutera imbere.

Ubu butumwa uyu muyobozi yabutanze mu gihe abacuruzi bo muri aka karere banengwa gufunga kare, ku buryo ngo uretse serivise zicururizwa mu kabari, kubona indi serivise bigorana cyane.

Uyu muyobozi yabivuze ubwo yatangizaga igikorwa cy’imurikabikorwa ry’akarere ayoboye, aho yanagaragarije ko abona abatuye umujyi wa Gicumbi batabyaza umusaruro amahirwe bafite mu bucuruzi.

Yagize ati:“Iyo ngenda muri uyu mujyi wacu n’ijoro nta bantu wabona bakora ubucuruzi butari akabari bakinguye imiryango, usanga abanyweye aribo bahanganye n’abashinzwe umutekano, nkibaza impamvu andi maserivise adakora kandi bafite ayo mahirwe.”

JPEG - 225.9 kb
Iyo bugorobye abacuruzi bo mu mujyi wa Gicumbi bahita bakinga bakitahira

Yakomoje ku muhanda wa kaburimbo ugiye kubakwa uhuza Intara y’Uburasirazuba n’iy’Amajyaruguru unyuze mu karere ka Gicumbi, avuga ko ari andi mahirwe bagiye kubona, bityo bakwiye guhindura imikorere kugira ngo babashe guhangana ku isoko.

Yagize ati:“Ku mahirwe dusanganwe hagiye kwiyongeraho umuhanda navuga ko ari mpuzamahanga, mu gihe abantu bagikora mu buryo butanoze ntabwo aka karere twazatera imbere uko tubyifuza.”

Abakora ubucuruzi muri uyu mujyi wa Gicumbi, bavuga abaguzi ubwabo badashobora kugeza mu masaha akuze, ibyo bikaba intandaro yo kuba nabo bataha hakiri kare.

Sandrine Murorunkwere, yagize ati:“Ntushobora kugeza saa yine z’ijoro kandi nta baguzi ubona, abagana umujyi wa Byumba benshi baturuka mu byaro nabo bataha kare, wenda bizageraho bihinduke ariko sinzi ko byaba vuba.”

Ibikorwa by’iterambere bigera mu mujyi wa Gicumbi, ndetse birakiyongera, ariko ikibazo gihari ubuyobozi bwifuza ko cyakemuka ni icy’imikorere y’abacuruzi badakora menshi.

Kugera mu mujyi wa Gicumbi mu masaha y’umugoroba biragoye kubona ahantu hafunguye, uretse ahacururizwa manyinya gusa.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE