2017-10-17 06:58:11 clouds 27o High | Kigali Rwanda

Dukurikire:
 
 

Police Fc: Nyuma yo gufungurwa, Ndatimana agarukanye ubwira

Yanditswe na IMVAHO NSHYA

Kuya 2016-04-06 06:56:48

 
Share on:
 
Yasuwe:6
 
Yavuzweho:200
 
10
 
10

Umukinnyi wo hagati muri Police FC, Ndatimana Robert wari watawe muri yombi mu Kuboza 2015 akekwaho gutera inda umwana uri munsi y’imyaka 18; yagaragaje ko arimo gukora cyane kugira ngo yongere kugaruka mu ruhando rw’abakinnyi bakomeye mu Rwanda.

Ibi yabitangarije Imvaho Nshya ejo hashize taliki 05 Mata 2016 nyuma y’icyumweru kimwe atangiye imyitozo mu ikipe ye ya Police FC. Ndatimana yatangiye asobanura ko kuva yarekurwa taliki 02 Gashyantare 2016, yahise ajya mu kiruhuko aho yaganiraga n’inshuti ze n’abandi bantu bamugira inama nk’umuntu wari uvuye mu bibazo bikomeye by’ubuzima akeneye ko bamuba hafi.

Yagize ati "Ingamba mfite ni ugukora cyane, ni nabyo umutoza wanjye yambwiye. Biriya bibazo byansubije inyuma ariko nzi ko bizagenda neza. Naricaye ndisuzuma mbifashijwe n’inshuti n’abajyanama, ndibaza ko ntasubiye inyuma cyane kandi nanjye niteguye gukora".

Ndatimana anemeza ko azaba ari ku rwego rwiza mu mikino yo kwishyura nk’uko umutoza we yabyifuje. Ati "Imikino ibanza irarangiye ariko ndifuza ko imikino yo kwishyura izatangira ndi kuri rwa rwego umutoza ashaka. Ndashaka kwerekana ko nkiri nka Robert wa mbere. Nk’ubu ndimo gukora imyitozo y’ikipe nkongeraho n’iyanjye bwite".

Uyu musore wageze muri Police FC muri Nyakanga 2015, asaba abakunzi b’iyi kipe kwibagirwa ibyabaye bagategereza impinduka azazana mu mikino yo kwishyura ya shampiyona.

Umutoza wa Police FC Casa Mbungo yahamirije Imvaho Nshya ko Ndatimana ameze neza mu mutwe gusa agisigiranye ikibazo cy’imyitozo. Ati "Kugira ngo agarure imbaraga yatakaje birasaba igihe. Ikibazo si mu mutwe ahubwo ingufu ziracyari ikibazo. Nizeye ko mu mikino yo kwishyura azaba ameze neza".

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE