2017-08-19 07:41:08 clouds 27o High | Kigali Rwanda

Dukurikire:
 
 

Uwikunda araharanira kuzasifura igikombe cy’isi

Yanditswe na IMVAHO NSHYA

Kuya 2017-05-02 13:06:52

 
Share on:
 
Yasuwe:1004
 
Yavuzweho:200
 
10
 
10

Uwikunda Samuel, umwe mu baheruka kugirwa abasifuzi mpuzamahanga n’ishyirahamwe ry’umupira w’amaguru ku isi “FIFA” kuva mu 2017 yemeza ko inzozi ze ari izo kuzasifura imikino y’igikombe cy’isi.

Uyu musore w’imyaka 30 yabivugiye mu kiganiro kirambuye yagiranye n’Imvaho Nshya kibanze ku buzima bwe nk’umukinnyi utarahiriwe mu mupira yinjira mu mwuga gusifura ahereye ku ruhande nyuma agirwa uwo hagati. Yanagarutse kandi kuri amwe mu mabanga y’ubuzima bwe anerekana imikino yamugoye.

Uwikunda ni muntu ki?

JPEG - 248.4 kb
Uwikunda Samuel ubwo yasifuraga umukino wa AS Kigali na Rayon Sports, umwe mu mikino avuga ko yamugoye cyane

Ni umusore wabonye izuba taliki 04 Ukwakira 1987 avukira i Nyamagabe mu Ntara y’Amajyepfo. Ni umwana wa gatanu mu muryango w’abana barindwi, Papa wabo akaba yari Pasiteri mu itorero rya ADEPR.

Yatangiye amashuri y’inshuke kuri SOS mu Murenge wa Gasaka i Nyamagabe, nyuma ya Jenoside yakorewe abatutsi mu 1994, aza kuhakomereza amashuri abanza ayasoza mu 2001.

Yize imyaka y’icyiciro rusange mu rwuge rw’amashuri rwa Kigeme i Nyamagabe akomereza mu rwunge rw’amashuri rwa ACEPR i Nyamagabe maze mu 2007 ahabwa impamyabumenyi y’amashuri yisumbuye mu ndimi n’ubuvanganzo.

Ku mpamvu zirimo no kubura amikoro, Uwikunda yamaze imyaka itatu atiga, yinjira mu 2010 muri Kaminuza y’abadiventiste (UNILAK) i Nyanza ahakura impamyabushobozi y’icyiciro cya kabiri cya Kaminuza mu mategeko .

Yakiniye Amagaju FC ariko ntibyamuhira

Mu buhamya bwe, Uwikunda avuga ko yabanje kuba myugariro wo hagati w’ikipe y’iwabo y’abana y’Amagaju FC ariko akabikora abivanga no kwiga binahurirana ko n’iyi kipe yashakaga kuza mu cyiciro cya mbere biba ngombwa ko izana abakinyi benshi b’abanyamahanga bagombaga kuyifasha kandi banahabwa agaciro maze benshi muri ba bana bo babura amahirwe gutyo yo kubona ibyangombwa byo kuyikinira.

Uwikunda asobanura ko yinjiye mu mwuga wo gusifura abigiriwe inama na Muhire Jean de Dieu uwari umuyobozi ushinzwe urubyiruko na Nshimiyimana Jean Pierre wari umunyamabanga nshingwabikorwa w’akarere ka Nyamagabe.

Ati “Barambwiye bati wowe urangije kwiga kandi Federasiyo iri kutwaka abana twakohereza mu mahugurwa y’ubusifuzi ni uko bahise banyohereza n’abandi tuza kuri FERWAFA duhugurwa na ba Gasingwa Michel na Ntagungira Celestin ndibuka ko hari mu mpera za 2007’’.

Yongeraho ati ’’Usibye n’izo nama abo bagabo bangiriye, nanjye nari mfite umuhamagaro wo gusifura kuko tukiga nabwo najyaga nsifura mu marushanwa ahuza amashuri yo mu kigo. Numvaga ari byiza n’ubwo ntari nziko ariyo mpano yanjye. Nk’umuntu ukunda umupira cyane navuga ko nyuma yo guhugurwa aribwo nahise mbikunda cyane numva ko ngiye kubikora kinyamwuga’’.

Yatangiye ari umusifuzi wo ku ruhande

Uyu musore yatangiye gusifura mu 2008 ahera mu mikino y’amakipe y’ingimbi yabanzirizaga amakipe makuru , abitangira nk’umusifuzi wo ku ruhande. Mu 2012, abahugura abasifuzi babonye ko Uwikunda yavamo umusifuzi mwiza wo hagati bamusaba kuva ku ruhande akajya hagati, ibyo yemeza ko byamusabye igihe kugira ngo yongere abimenyere. Icyo gihe asifura mu cyiciro cya kabiri.

Mu 2014 Uwikunda yazamuwe mu cyiciro cya mbere akomeza kumvira inama z’abamuhuguraga, abamutanze muri uyu mwuga n’inshuti, maze mu 2017 abikesheje ingabire y’Imana yemezwa na FIFA nk’umusifuzi mpuzamahanga.

Mu ndoto z’ubuzima bwe, uyu musore avuga ko byanze bikunze agomba kuzagira amahirwe yo gusifura imikino y’igikombe cy’isi.

Ati ’’Intego nkuru y’ubuzima ni ugusifura rimwe mu marushanwa akomeye cyane mu mupira w’amaguru. Iyo ni yo ndota, ni nacyo mparanira, ni cyo gituma nkora cyane. Kandi iryo rushanwa nta rindi ni igikombe cy’isi, hamwe n’Imana inadushoboza wenda nzabigeraho. Ariko bisaba gukora ukabikora ubikunze, ukabishyiraho umuhate ukumva inama. Nizera nzabigeraho’’.

Imikino ibiri ya Rayon Sports yamubijije icyuya

Mu myaka 9 amaze mu mwuga wo gusifura, Uwikunda yemeza ko imikino ibiri ya Rayon Sports ariyo yamugoye mu buzima bwe.

Uwa mbere n’uwo yasifuye mu 2008 ku nshuro ya mbere wahuje ingimbi za Rayon Sports n’iz’Amagaju zabanje gukina mbere y’uko ikipe nkuru zikina.

Uwikunda ati ’’Nibwo nari nkiva guhugurwa, nkiri uwo ku ruhande. Ntabwo byari byoroshye, urumva ni ahantu mu cyaro Rayon Sports ije kuhakinira n’Amagaju (yari akizamuka), abantu bose bari bamanutse abafana buzuye bategereje umukino w’amakipe makuru. Narebaga inyuma yanjye umurindi w’aba Rayon yari inakomeye nkanibuka ko ari ubwa mbere igitambaro mfashe, narasenze mbere yo kwinjira mu kibuga nti Mana umfashe ibyo nize mbyibuke, Mana uhankure..Iyo ni imwe mu mikino ntazibigirwa mu buzima bwanjye yamvunnye’’.

Umukino wa kabiri atazigagrwa n’uwahuje Rayon Sports na AS Kigali mu mikino ibanza ya shampiyona ya 2016/2017 warangiye Rayon Sports itsinze AS Kigali 2-0 ibitego byo minota itanu ya nyuma harimo ikitaravuzweho rumwe cya Kwizera Pierrot ku munota wa 85 n’icya Nahimana Shassiri ku munota wa 87.Icyo gihe Ndoli Jean Claude umunyezamu wa AS Kigali yavugaga ko Camara yabanje kumusunika.

Uwikunda anagaragaza ko we buri mukino wose awuha agaciro kangana kuko aba azi neza ko uko yitwaye ari byo bimuhesha kuzamuka ku rwego rwisumbuyeho kuko buri gihe haba hari komiseri umuha amanota.

Abantu afatiraho urugero

Uwikunda avuga ko agitangira yakunze cyane gukurikirana imisufurire y’abasifuzi Ntagungira Celestin ’’Abegga’’ wasifuraga ku ruhande anamaze gusifura igikombe cy’isi, hamwe na Gasingwa Michel. Nyuma yanakomeje kwigira kuri bakuru be barimo Issa Kagabo, Hakizimana Louis na Munyemana Hudu, bamubanjirije mu gusifura hagati.

Hanze y’u Rwanda, Uwikunda agaragaza ko yigira cyane kuri Mark Clattenburg umwongereza yemeza ko azi kuyobora neza umukino na Fernande Fernadez wasifuye El Classico iheruka guhuza Real na Barca hamwe n’umutaliyani Nichola Rizzori akabakundira uburyo bahagararamo mu kibuga n’ibyemezo bafata.

Gusifura mu Rwanda byatunga umuntu

N’ubwo atinjira cyane mu bijyanye n’amafaranga babona, Uwikunda yasobanuriye Imvaho Nshya ko umwuga wo gusifura ari umwuga bakuramo byinshi birimo inshuti n’amafaranga.

Arasaba abantu kumva ko n’abasifuzi ari abantu bashobora kwibeshya

Mu gusoza, uyu musifuzi asaba abantu kutajya bacira imanza abasifuzi bakumva ahubwo ko nabo ari abantu bashobora kwibeshya.

Ati ’’Mumbabarire nkoreshe ijambo dufite ururimi rukennye kuko hari igihe umusifuzi yibeshya, twe tukavuga ko yibye. Kwiba ni uko hari uwo uhemukiye. Naho kwibeshya turabikora nabo bo hanze bageze kure baribeshya ni yo mpamvu FIFA irimo ishaka kuzana uburyo bw’amashusho kuko iziko hari ibyarenga ubwenge bw’umuntu bikaba atabishaka. Niyo mpamvu iyo uvuze ngo runaka yibye, uba umwangije, ntibyagakwiye. Umva ko uko wibeshya ni nako nawe yakwibeshya’’.

Uwikunda anasaba kandi barumuna be bari mu cyiciro cya kabiri n’abakizamuka, kudacika intege bagakora ikintu bumva ko bagikunze kandi bafite icyo bashaka kugeraho.Ibyo bigaherekezwa no kumvira inama za bakuru babo.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE