2017-06-24 09:49:51 clouds 27o High | Kigali Rwanda

Dukurikire:
 
 

Umutoza wa APR FC aracyafite icyizere cyo kwegukana igikombe

Yanditswe na IMVAHO NSHYA

Kuya 2017-03-20 14:50:34

 
Share on:
 
Yasuwe:321
 
Yavuzweho:200
 
10
 
10

Nyuma y’umunsi wa 21 wa shampiyona y’icyiciro cya mbere, ikipe ya APR FC iri ku mwanya wa 2 n’amanota 41 irushwa amanota 2 na Rayon Sports iri ku mwanya wa mbere n’amanota 43 gusa iyi kipe ikaba ifite imikino 3 y’ibirarane.

Umutoza wa APR FC, Mulisa Jimmy avuga ko nubwo batarimo kwitwara neza agifite icyizere cyo kwegukana igikombe.

Kuva imikino yo kwishyura yatangira, APR FC imaze gukina imikino 6 muri yo yatsinze umukino umwe, itsindwa umwe inganya imikino 4 indi 5 yose irayinganya.

Umutoza Mulisa Jimmy yemeza ko amahirwe yo kwegukana igikombe agihari n’ubwo arimo kugenda agabanuka.

Ati “Haracyari imikino myinshi hari igihe n’amakipe duhanganye yajya mu bihe nk’ibyo turimo ni ukwiha icyizere tugakomeza gukora”.

JPEG - 1.3 Mb
Umutoza wa APR FC, Jimmy Mulisa

Ikipe ya APR FC ni imwe mu makipe akunze kutihanganira umutoza utitwara neza, ibi bivuga ko Mulisa Jimmy ashobora gusezerewa mu gihe ikipe yakomeza kwitwara nabi gutya. Aha Mulisa yavuze ko agifite amasezerano ko akomeje akazi ariko hagize ikiba nta kibazo yabyakira.

APR FC yanganyije na Pepiniere FC iri ku mwanya wa nyuma igitego 1-1. Umutoza Mulisa Jimmy, yatangaje ko bitameze neza kuko bamaze imikino 4 batabona intsinzi. Yakomeje avuga ko abakinnyi bari ku gitutu ariko ko aba yagerageje kubaganiriza.

Mu yindi mikino y’umunsi wa 21 yabaye, ikipe ya Police FC yanganyije na Musanze ibitego 2-2, Kirehe FC itsinda Kiyovu igitego 1-0, Mukura itsinda Espoir FC ibitego 3-2, Amagaju FC yatsinze Marines FC igitego 1-0 naho Sunrise FC itsinda Etincelles FC igitego 1-0.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE