2017-09-23 09:22:12 clouds 27o High | Kigali Rwanda

Dukurikire:
 
 

Umutoza w’Amavubi yatangaje abakinnyi 22 bazakina na Tanzania

Yanditswe na IMVAHO NSHYA

Kuya 2017-07-04 06:50:39

 
Share on:
 
Yasuwe:102
 
Yavuzweho:200
 
10
 
10

Abakinnyi 22 b’ikipe y’igihugu “Amavubi” bazatangira umwiherero ejo tariki 05 Nyakanga 2017 bitegura umukino bazakina n’ikipe y’igihugu ya Tanzania mu gushaka itike ya CHAN 2018 izabera muri Kenya kuva tariki 11 Mutarama kugeza 02 Gashyantare 2018.

Uyu mukino uzaba tariki 15 Nyakanga 2017 kuri Sitade CCM Kirumba mu mujyi wa Mwanza. Ejo hashize tariki 03 Nyakanga 2017, umutoza w’ikipe y’igihugu “Amavubi”, Antoine Hey yashyize ahagaragara urutonde rw’abakinnyi 22 bagomba gutangira umwiherero n’imyitozo bakazavamo abakinnyi 18 bazerekeza muri Tanzania tariki 13 Nyakanga 2017.

Mu bakinnyi bahamagawe, harimo Nshuti Innocent uhamagawe bwa mbere mu ikipe y’igihugu akaba ari rutahizamu ukiri muto w’ikipe ya APR FC. Hari kandi Muvandimwe Jean Marie Vianney ukina inyuma iruhande rw’ibumoso muri Police FC nawe uhamagawe bwa mbere ndetse na myugariro wa AS Kigali, Bishira Latif.

JPEG - 377.7 kb
Uhereye ibumoso, Manzi Thierry, Nsabimana Aimable, Niyonzima Ally na Rucogoza Aimable ni bamwe mu bakinnyi bahamagawe mu mwiherero wo kwitegura umukino wa Tanzania (Foto Gentil)

Mu bataherukaga guhamagarwa harimo Mukunzi Yannick wa APR FC, Mpozembizi Mohamed wa Police FC na Kayumba Soter wa AS Kigali.

Abakinnyi bari bamenyerewe batagaragara muri iyi kipe ni rutahizamu, Usengimana Dany na Rusheshangoga Michel, aba bakinnyi bakaba bararangije kumvikana n’ikipe ya Singida FC yo muri Tanzania.

Mu kiganiro n’abanyamakuru, umutoza w’Amavubi, Antoine Hey yatangaje ko bahisemo abakinnyi bizera ko bazagira icyo bafasha mu kubona umusaruro mwiza. Uyu mutoza yakomeje avuga ko akazi kabo nk’abatoza ari ugufasha abakinnyi kuzamura urwego rw’imikinire ndetse no kwigirira icyizere bakazakina umukino mwiza muri Tanzania.

Nyuma y’umukino ubanza na Tanzania tariki 15 Nyakanga 2017, Amavubi azakina na Tanzania umukino wo kwishyura i Kigali tariki 22 Nyakanga 2017. Ikipe izakomeza izahura n’izatsinda hagati ya Uganda na Sudani y’amajyepfo nyuma itsinze ihite ibona itike.

Umukino uheruka guhuza aya makipe wabaye muri 2015 muri CECEFA, Amavubi atsindwa na Tanzania ibitego 2-1. Gusa muri 2011 Amavubi abona itike bwa mbere muri CHAN yasezereye Tanzania nyuma yo kunganya igitego 1-1 muri Tanzania, umukino wo kwishyura Amavubi yatsinze igitego 1-0.
Abakinnyi bahamagawe

Abanyezamu: Kwizera Olivier (Bugesera FC), Ndayishimiye Eric Bakame (Rayon Sports) na Nzarora Marcel (Police FC).

Myugariro: Nsabimana Aimable, Imanishimwe Emmanuel (APR FC), Manzi Thierry (Rayon Sports), Muvandimwe Jean Marie Vianney, Mpozembizi Mohamed (Police FC), Rucogoza Aimable (Bugesera FC), Bishira Latif, Kayumba Soter na Iradukunda Eric (AS Kigali).

Hagati: Bizimana Djihad, Mukunzi Yannick (APR FC), Niyonzima Olivier Sefu, Muhire Kevin (Rayon Sports), Nshuti Dominique Savio (AS Kigali) na Niyonzima Ally (Mukura).

Rutahizamu: Nshuti Innocent (APR FC), Mico Justin (Police FC), Mubumbyi Barnabe (AS Kigali) na Mugisha Gilbert (Pepiniere FC).

Aba bakinnyi bazajya baba muri Golden Tulip Hotel i Nyamata bakazajya bakora imyitozo 2 ku munsi kuri Sitade Amahoro i Remera kugeza tariki 12 Nyakanga 2017 nyuma tariki 13 Nyakanga 2017 berekeze Mwanza.

BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE