2017-06-25 13:58:23 clouds 27o High | Kigali Rwanda

Dukurikire:
 
 

Umukino wa Rayon Sports na APR FC wo gutangiza shampiyona ushobora kutaba

Yanditswe na IMVAHO NSHYA

Kuya 2016-10-05 06:25:40

 
Share on:
 
Yasuwe:1
 
Yavuzweho:200
 
10
 
10

Umukino wagombaga guhuza APR FC ikipe yatwaye igikombe cya shampiyona cy’umwaka ushize na Rayon Sports yatwaye igikombe cy’amahoro cya 2015/2016 ushobora kutaba nk’uko byari biteganyijwe.

Impamvu nyamukuru ni uko aya makipe yandikiwe amabaruwa n’ishyirahamwe ry’umupira w’amaguru mu Rwanda (FERWAFA) amenyeshwa ko uyu mukino uzaba mu mpera z’iki cyumweru taliki 07-8 Ukwakira; ntiyagira icyo asubiza.

Aganira n’Imvaho Nshya, Dr Hakizimana Moussa, umuvugizi wa FERWAFA, yavuze ko bategereje igisubizo cy’aya makipe kugeza kuri uyu wa Kane, bakabona kwemeza ko utakibaye, cyane ko nta wundi mwanya waboneka mu gihe shampiyona izatangira ku wa Gatanu w’icyumweru gitaha.

JPEG - 184.4 kb
APR FC yaherukaga gutsinda Rayon Sports 3 0 muri rushanwa ryateguwe na AS Kigali

Dr Hakizimana yagize ati: ‘’Amakipe ntacyo arasubiza.Turategereje kugeza nko ku wa Kane, kugira ngo babone kubitangaza. Bisaba ubundi ko amakipe agaragaza ubushake ko azakina, ubu turategereje rero.’’

Gakwaya Olivier, Umunyamabanga mukuru n’umuvugizi wa Rayon Sports avuga ko nta baruwa ya FERWAFA babonye, yongeraho ko badashobora gukina uyu mukino kuko bafite gahunda bamaze igihe bategura yo kumurika umushinga wo kubarura abakunzi uzaba ku cyumweru kuri Stade Amahoro hakaba n’umukino wa gicuti wa Rayon Sports na AS Kigali.

Gakwaya ati ‘’Twebwe ntabyo tuzi, nta n’ibaruwa twari twabona, ntitwari kumenya iyo gahunda batatwandikiye kandi mu mpera z’icyumweru twifitiye indi gahunda tumaranye igihe yo kumurika umushinga wo kubarura abakunzi ba Rayon Sports. ‘’

Kazungu Claver, umuvugizi wa APR FC, avuga ko bo biteguye gukina niba uwo mukino uhari. Ati” Bo ntibakabaye bandika basaba, ahubwo bakabaye bashyiraho gahunda. Gusa mu magambo make twe turiteguye. Twe niba ihari tuzayikina.’’

Amakuru agera ku Mvaho Nshya, avuga ko umuterankunga wa shampiyona yari yamaze gutanga miliyoni eshanu z’amafaranga y’u Rwanda yo kuzaha ikipe izatwara igikombe.

Mu bihugu byinshi ku isi, mbere y’uko shampiyona itangira haba imikino nk’iyi ihuza amakipe yatwaye igikombe cy’igihugu n’icya shampiyona; mu Rwanda ariko iki gikombe cyaherukaga mu 2013 ubwo Rayon Sports yari yatwaye shampiyona yatsindwaga na AS Kigali yatwaye igikombe cy’amahoro igitego 1-0.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE