2017-06-25 09:02:18 clouds 27o High | Kigali Rwanda

Dukurikire:
 
 

Turacyafite ubushobozi bwo kwegukana n’igikombe cy’Amahoro-Masudi

Yanditswe na IMVAHO NSHYA

Kuya 2017-05-19 05:26:50

 
Share on:
 
Yasuwe:461
 
Yavuzweho:200
 
10
 
10

Nyuma yo kwegukana igikombe cya shampiyona ya 2016-2017 habura mikino 4 ngo shampiyona isozwe, umutoza wa Rayon Sports, Irambona Masudi Djuma atangaza ko bagifite ubushobozi bwo kwegukana n’igikombe cy’Amahoro 2017.

Rayon Sports yegukanye igikombe nyuma yo gutsinda Mukura ibitego 2-1 byombi byatsinzwe na Moussa Camara na Habimana Jussuf ku ruhande rwa Mukura. Uyu mukino wabereye kuri Sitade ya Kigali i Nyamirambo tariki 17 Gicurasi 2017, ukaba wari uw’umunsi wa 23 utarakiniwe igihe.

Iyi kipe yasabwaga gutsinda uyu mukino ikagira amanota 67 igahita yegukana bidasubirwaho igikombe cya shampiyona ku nshuro ya 8 kuko ikipe ya APR FC iyikurikiye n’ubwo yatsinda imikino 4 isigaye nta cyahinduka.

JPEG - 471.6 kb
bakinnyi ndetse n’abakunzi ba Rayon Sports mu byishimo nyuma yo kwegukan igikombe cya shampiyona, aha bari bateruye umutoza Masudi Djuma

Akimara gutwara igikombe cye cya mbere cya shampiyona nk’umutoza mukuru, Masudi yatangaje ko yishimye cyane kandi ashimira abakinnyi, abafana ndetse n’abayobozi kuko bashyize hamwe buri wese akora akazi ke.

Uyu mutoza wanakiniye Rayon Sports yanavuze ko bagifite ubushobozi ndetse n’amahirwe yo kwegukana n’igikombe cy’Amahoro nk’uko byagenze umwaka ushize.

Ati “Twegukanye igikombe cya shampiyona, turacyafite ubushobozi bwo kwegukana n’icy’Amahoro, akazi rero karacyahari kandi tugiye gukomeza gukora cyane tuzabigereho”.

Mu gikombe cy’Amahoro Rayon Sports izakina na Police FC muri ¼ cy’irangiza.

Kapiteni w’ikipe ya Rayon Sports, Ndayishimiye Eric “Bakame” wegukanye igikombe mu ikipe ya gatatu mu Rwanda nyuma ya ATRACO FC na APR FC yatangaje ko shampiyona y’uyu mwaka yabagendekeye neza n’ubwo hari ibitaragenze neza.

Ati “ Yaba abakinnyi, ubuyobozi n’abandi hari igihe umwe acika intege ariko aho umwe ananiriwe undi aramubyutsa urugamba rugakomeza ari nayo mpamvu twageze ku musaruro mwiza nk’uyu”.

Umutoza wa Mukura, Ivan Minnaert watoje Rayon Sports akayivamo akajya muri Kenya akagaruka mu Rwanda ariko agasanga Masudi yarahawe ikipe, yavuze ko Rayon Sports itwaye igikombe ibikwiriye kuko yakoze cyane.

Bimwe mu bintu by’ingenzi byafashije Rayon Sports kwegukana igikombe

Rayon Sports yegukanye igikombe cya shampiyona inshuro umunani (1975, 1981, 1997, 1998, 2002, 2004, 2013 na 2017). Icyafashije iyi kipe ni umurongo uhamye mu mitoreze aho bitari biherutse ko imara umwaka wose ifite umutoza umwe. Masudi Djuma amaze umwaka urenga muri iyi kipe ayihesheje igikombe cy’Amahoro 2016 na shampiyona 2017.

Ikindi kuva muri 2016, Rayon Sports yagize abakinnyi bafite ubunararibonye nk’umunyezamu Ndayishimiye Eric “Bakame”, Kwizera Pierrot na Mugheni Fabrice bayirimo ubu, na Diarra na Kasirye bayivuyemo umwaka ushize. Hari kandi abakinnyi bakiri bato bagaragaje impano nka Nshuti Xavio, Manishimwe Djabel, Muhire Kevin, Nsengiyumva Moustapfa n’abandi.

Uretse ibi kandi, Rayon Sports yagerageje kwitwara neza mu mikino yayo aho andi makipe yakoze amakosa yo gutakaza imikino bo barayitsinda bituma kugeza ubu iyi kipe mu mikino 26, yaratsinze imikino 21, inganya imikino 4, itsindwa umukino umwe.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE